សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ចាប់ផ្ដើមពីទុនប្រមាណ ១ ម៉ឺនដុល្លារ បង្កើតសិប្បកម្មជាលក្ខណៈគ្រួសារកាលពីឆ្នាំ ២០០៧ អ្នកស្រី សេង ចិន្ដា បានពង្រីកអាជីវកម្មគ្រឿងទេសរបស់ខ្លួនក្រោមឈ្មោះ «ខេមហ្វូត» រហូតមានផលិតផលជាង ៧ មុខ និងកំពុងបង្កើនសមត្ថភាពផលិត ដើម្បីបំពេញតម្រូវការទីផ្សារក្នុងស្រុក។
ថ្លែងប្រាប់បណ្ដាញសារព័ត៌មាន AMS ក្នុងឱកាសចូលរួមដាក់តាំងបង្ហាញផលិតផលនៅវេទិកាឈានមុខស្តីពីវិស័យវេចខ្ចប់ ឆ្នាំ២០២៦ នៅសាលមហោស្រពកោះពេជ្រ កាលពីថ្ងៃទី២៨ ខែកញ្ញា អ្នកស្រី សេង ចិន្ដា បានឱ្យដឹងថា បច្ចុប្បន្ន ខេមហ្វូត កំពុងផ្តោតលើការបង្កើនសមត្ថភាពផលិត ដើម្បីបំពេញតម្រូវការទីផ្សារក្នុងស្រុក ហើយបានផ្អាកការនាំចេញទៅក្រៅប្រទេសជាបណ្ដោះអាសន្ន។
អ្នកស្រីបានឱ្យដឹងថា ផលិតផលដំបូងរបស់ ខេមហ្វូត គឺទឹកស៊ីអ៊ីវ និងទឹកម្ទេស ប៉ុន្តែបច្ចុប្បន្នសិប្បកម្មនេះបានពង្រីកការផលិតដល់ជាង ៧មុខ ដើម្បីជំនួសផលិតផលនាំចូល ជាពិសេសទឹកប៉េងប៉ោះ និងទឹកម្ទេសផ្អែម ដែលកំពុងត្រូវបានដាក់ចែកចាយនៅតាមផ្សារទំនើប និងហាងធំៗ។
អ្នកស្រី សេង ចិន្ដា បានមានប្រសាសន៍ថា៖ «សំខាន់ផលិតផលយើងគេស្គាល់ ទុកចិត្តលើគុណភាពស្រាប់ ព្រោះយើងមានស្ដង់ដារ Halal, CS, GMP, HACCP ច្បាស់លាស់» ។
បច្ចុប្បន្ន ខេមហ្វូត មានផលិតផលគ្រឿងទេសសំខាន់ៗចំនួន ៦មុខ ដែលជាអត្តសញ្ញាណរបស់ខ្លួន និងផលិតចេញពីវត្ថុធាតុដើមក្នុងស្រុកស្ទើរតែ ១០០% រួមមាន ទឹកស៊ីអ៊ីវ ទឹកម្ទេស ទឹកម្ទេសផ្អែម ទឹកសៀង ទឹកប៉េងប៉ោះ និងប្រេងខ្យង។
ផលិតផលទាំងនេះកំពុងចរាចរនៅលើទីផ្សារទូទាំងប្រទេស ហើយមានដាក់លក់នៅផ្សារទំនើប ជីបម៉ុង ឡាក់គី ហាងភីហ្សា ដូមីណូ និងតាមភោជនីយដ្ឋានធំៗនៅកម្ពុជា។
តាមអ្នកស្រី សេង ចិន្ដា ការពង្រីកផលិតកម្ម និងទីផ្សាររបស់ ខេមហ្វូត ក៏ទទួលបានការគាំទ្រពីសកម្មភាពរបស់រាជរដ្ឋាភិបាល តាមរយៈក្រសួងពាក់ព័ន្ធ ដែលបានផ្តល់ឱកាសដល់សហគ្រាស និងសិប្បកម្មខ្នាតតូច និងមធ្យមក្នុងការពង្រឹងសមត្ថភាព។
សកម្មភាពគាំទ្រទាំងនោះ រួមមានការបង្កើតឱកាសឱ្យអ្នកជំនាញកូរ៉េចែករំលែកបទពិសោធន៍ផ្នែកផលិតកម្ម និងការធ្វើអាជីវកម្ម ព្រមទាំងជួយសហគ្រិនខ្មែរ ពង្រឹងជំនាញផលិត និងទទួលបានទុន និងគំនិតអាជីវកម្មថ្មីៗ។
ជាក់ស្ដែង ចាប់ពីថ្ងៃទី២៨ ដល់ថ្ងៃទី៣០ ខែកញ្ញា ក្រសួងឧស្សាហកម្ម បច្ចេកវិទ្យា និងនវានុវត្តន៍ បានសហការជាមួយវិស័យឯកជន រៀបចំវេទិកាស្តីពីការវេចខ្ចប់ ឆ្នាំ២០២៦ ដោយមានការដាក់តាំងបង្ហាញផលិតផលរបស់សហគ្រាស និងសិប្បកម្មក្នុងស្រុក។
អ្នកស្រី សេង ចិន្ដា បានចាត់ទុកវេទិកានេះថា ជាឱកាសមួយដែលអាចជួយនាំអ្នកវិនិយោគឱ្យជួបអ្នកផ្គត់ផ្គង់ដោយផ្ទាល់ ដើម្បីពិភាក្សាអំពីបញ្ហាប្រឈមនានា ស្វែងរកដំណោះស្រាយ និងពង្រឹងលទ្ធភាពផ្គត់ផ្គង់ផលិតផលទៅកាន់ទីផ្សារ៕
Account
Security
Favourite Content