សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បន្ទាយមានជ័យ ៖ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងបញ្ជាក់ថា បើទោះបីជាខេត្តបន្ទាយមានជ័យ ត្រូវបានប្រកាសបញ្ចប់ការវាស់វែងដីធ្លីជាប្រព័ន្ធកាលពីពេលថ្មីៗនេះក្ដី ក៏មន្ត្រីសុរិយោដី នៅតែមានការងារវាស់វែងដីនៅតាមបណ្ដាភូមិមួយចំនួន ដែលជាប់បណ្ដោយព្រំដែនកម្ពុជា-ថៃ ខណៈដែលការងារកំណត់ព្រំ និងការជួយសម្រួលដល់ម្ចាស់ក្បាលដីដែលមិនទាន់បានមកទទួលយកបណ្ណកម្មសិទ្ធិរបស់ខ្លួនក៏នៅតែបន្តធ្វើដដែល ។
ការលើកឡើងរបស់ឯកឧត្តមឧបនាយករដ្ឋមន្ត្រីខាងលើនេះត្រូវបានធ្វើឡើងក្នុងឱកាសអញ្ជើញជាអធិបតីនាពិធីប្រកាសបញ្ចប់ការវាស់វែងដីធ្លី និងប្រគល់វិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ ក្នុងភូមិសាស្ត្រខេត្តបន្ទាយមានជ័យ កាលពីថ្ងៃទី៣០ ខែមិថុនា ឆ្នាំ២០២៥ កន្លងទៅនេះ ។
ឯកឧត្តមបានមានប្រសាសន៍ថា ក្រៅពីនេះក៏នៅមានការដោះស្រាយបញ្ហា និងកំណត់ឱ្យបានច្បាស់លាស់នូវតំបន់បឹងទន្លេសាប ជាមួយអាជ្ញាធរទន្លេសាប ដូចជា តំបន់១ ជាតំបន់ដែលមានប្រជាពលរដ្ឋរស់នៅ, តំបន់២ ជាតំបន់កសិកម្មធ្វើស្រែប្រាំង និងស្រូវប្រដេញទឹក និងតំបន់៣ ជាតំបន់រក្សាទុកព្រៃលិចទឹក ដើម្បីរក្សាអាយុជីវិតបឹងទន្លេសាបឱ្យនៅស្ថិតស្ថេរគង់វង្ស។
ដោយឡែក ទាក់ទិននឹងបញ្ហាដែលនៅសេសសល់នៅអាងត្រពាំងថ្ម ក្នុងខេត្តបន្ទាយមានជ័យ ក្នុងនាមប្រធានគណៈកម្មការសុរិយោដីថ្នាក់ជាតិ ឯកឧត្តមឧបនាយករដ្ឋមន្ត្រី បានសម្រេចប្រគល់ទីតាំងណាដែលមានការពាក់ព័ន្ធនឹងប្រជាពលរដ្ឋនោះ ត្រូវប្រគល់ជូនដល់ប្រជាពលរដ្ឋ ហើយទីតាំងណាដែលពាក់ព័ន្ធនឹងទឹក ត្រូវប្រគល់ការគ្រប់គ្រងទៅឱ្យឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងត្រូវចុះបញ្ជីបែងចែកឱ្យបានត្រឹមត្រូវតាមការសម្រេចនេះ។
ឯកឧត្តម បានសង្កេតឃើញថា ទំហំសេដ្ឋកិច្ចនៅក្នុងខេត្តបន្ទាយមានជ័យគឺមានទំហំធំ ដោយប្រជាពលរដ្ឋភាគច្រើនគឺជាអ្នកដែលមានការងារធ្វើ មានប្រាក់ចំណូល ហើយពេលវេលានេះគឺអ្នកខេត្តបន្ទាយមានជ័យត្រូវរៀនរស់ដោយខ្លួនឯង តាមរយៈការខិតខំធ្វើកសិកម្ម ដាំដុះដំណាំឱ្យបានច្រើនប្រភេទ ដើម្បីបង្កើនជីវភាពគ្រួសារ និងរួមចំណែកជំរុញវិស័យសេដ្ឋកិច្ចក្នុងខេត្ត។ ទន្ទឹមនេះ ឯកឧត្តមបានបន្ថែមថា ការបញ្ចប់នូវការវាស់វែងដីធ្លីសម្រាប់ខេត្តបន្ទាយមានជ័យនេះគឺជាជំហានថ្មីមួយ ហើយជំហានបន្ទាប់គឺត្រូវគិតគូរពីសេដ្ឋកិច្ច រៀបចំលំហរសាធារណៈឱ្យបានល្អ ដើម្បីបង្កើនគុណភាពជីវិតសម្រាប់ប្រជាពលរដ្ឋក្នុងខេត្តនេះ ។
ឯកឧត្តមឧបនាយករដ្ឋមន្ត្រីបានបញ្ជាក់ផងដែរថា ៖
«កាលនៅដើមអាណត្តិទី ៧ យើងនៅសល់ប្រមាណ ៥លានក្បាលដី ដែលត្រូវចុះបញ្ជីដីធ្លីបង្ហើយ ប៉ុន្តែមកទល់ពេលនេះ យើងនៅសល់ត្រឹមតែក្រោម ២០ម៉ឺនក្បាលដីទៀតប៉ុណ្ណោះដែលត្រូវវាស់វែង ដូច្នេះ យុទ្ធនាការចុះបញ្ជីដីធ្លីបង្ហើយនេះនឹងត្រូវចប់សព្វគ្រប់ក្នុងពេលឆាប់ៗខាងមុខ ហើយនេះប្រហែលជាលើកទីមួយក្នុងប្រវត្តិសាស្ត្ររបស់ប្រទេសកម្ពុជាដែលយើងបានចុះបញ្ជីដីធ្លីបានចប់សព្វគ្រប់សរុបប្រមាណ ១៣លានក្បាលដីនៅទូទាំងប្រទេស ដោយកិច្ចការនេះទាមទារឱ្យមានការឯកភាពជាតិ និងការស្រុះស្រួលគ្នា នោះទើបអាចបញ្ចប់ការងារចុះបញ្ជីដីធ្លីបានជោគជ័យ»៕
Account
Security
Favourite Content