សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្មនិងសំណង់ ក្នុងអាណត្តិទី៧នេះ បានផ្ដោតលើការបញ្ចប់ការវាស់វែងដី ចុះបញ្ជី ចេញបណ្ណកម្មសិទ្ធិ និងបញ្ចប់វិវាទដីធ្លី នៅទូទាំងប្រទេស ក៏ដូចជាការងារជាសំខាន់ៗជាច្រើនទៀត ។សម្រាប់វិវាទដីធ្លី ក្នុងឆ្នាំ២០២៥នេះ ក្រុមការងារបានដោះស្រាយវិវាទដីធ្លីបានរហូតដល់១ ១២៥ករណី និងបន្តដោះស្រាយវិវាទដែលនៅសេសសល់បន្តទៀត ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់ បានឱ្យដឹងថា ដើម្បីឱ្យការដោះស្រាយទទួលបានជោគជ័យ ក្រសួងបានដាក់ចេញនូវយុទ្ធសាស្ត្រចំនួន៣ រួមមានការដោះស្រាយវិវាទក្រៅប្រព័ន្ធតុលាការ ការដោះស្រាយវិវាទតាមរយៈអង្គការសង្គមស៊ីវិល និងការដោះស្រាយជាគោលនយោបាយ ។
នៅក្នុងការដោះស្រាយនេះដែរ ក្រសួងក៏បានអនុវត្តយន្តការចំនួន៣ ដើម្បីដោះស្រាយប្រកបដោយប្រសិទ្ធភាពដែលយន្តការទាំងនោះរួមមាន គណៈកម្មការសុរិយោដី ក្រុមការងារដោះស្រាយវិវាទក្រសួង និង អាជ្ញាធរជាតិដោះស្រាយទំនាស់ដីធ្លី ។ ក្នុងឆ្នាំ ២០២៥ គណៈកម្មការសុរិយោដី បានទទួលពាក្យបណ្ដឹងចំនួន ១៨៩ករណី ហើយបានដោះស្រាយបញ្ចប់ចំនួន១៨១ករណី ។
សម្រាប់ក្រុមការងារដោះស្រាយវិវាទក្រសួង ក្នុងឆ្នាំ ២០២៥បានទទួលពាក្យបណ្ដឹងចំនួន៣៧ករណី ប៉ុន្តែបានដោះស្រាយបញ្ចប់រហូតដល់ ៦៧៦ករណី ពោលគឺករណីវិវាទដែលនៅ សេសសល់កាលពីឆ្នាំចាស់បានដោះស្រាយក្នុងឆ្នាំ ២០២៥នេះ ។ បើគិតចាប់ពីឆ្នាំ ២០១៦ ដល់ឆ្នាំ ២០២៥ ក្រុមការងារដោះស្រាយវិវាទក្រសួងបានទទួលករណីវិវាទចំនួន ៤ ២៤៥ករណី និងបានដោះស្រាយបញ្ចប់សរុបចំនួន ៤ ១៦៨ករណី និងកំពុងដោះស្រាយបន្តចំនួន ៧៧ករណី ។
ដោយឡែកអាជ្ញាធរជាតិដោះស្រាយទំនាស់ដីធ្លី ក្នុងឆ្នាំ ២០២៥ បានដោះស្រាយបញ្ចប់វិវាទចំនួន២៣ករណី ហើយបើគិតចាប់តាំងពីពេលមុនៗរហូតដល់ឆ្នាំ ២០២៥ អាជ្ញាធរជាតិដោះស្រាយវិវាទដីធ្លី បានទទួលពាក្យបណ្ដឹងចំនួន ២ ០១២ករណី និងបានដោះស្រាយចំនួន ២ ០០៧ករណី និងសល់៥ករណីទៀតកំពុងដោះស្រាយជាបន្តបន្ទាប់ ។
បើតាមរបាយការណ៍ក្រសួងបានបញ្ជាក់ថា នៅក្នុងឆ្នាំ ២០២៥នេះ យន្តការដោះស្រាយវិវាទដីធ្លីទាំង៣ បានទទួលបានពាក្យបណ្ដឹងចំនួន ២២៦ករណី និងបានដោះស្រាយបញ្ចប់ចំនួន ១ ១២៥ករណី ។ បើគិតចាប់តាំងពីដើមដល់ឆ្នាំ២០២៥ យន្តការដោះស្រាយវិវាទដីធ្លីទាំង៣នេះ បានទទួលពាក្យបណ្ដឹងសរុបចំនួន ១៦ ៣៦៤ករណី ដោះស្រាយបញ្ចប់នីតិវិធីចំនួន ១៦ ២៨២ករណី និងកំពុងដោះស្រាយចំនួន៨២ករណី ។
ឯកឧត្តមសាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានមានប្រសាសន៍ថា ក្នុងអាណត្តិថ្មីនេះ ក្រសួងរៀបចំដែនដី នគរូបនីយកម្មនិងសំណង់ បានដោះស្រាយវិវាទដីធ្លីបានរាប់ម៉ឺនករណី ដែលជាការងារដ៏ល្អប្រសើរសម្រាប់មន្ត្រីដែលបានដោះស្រាយវិវាទទាំងនេះ ។
ការបញ្ចប់វិវាទដីធ្លីនេះដែរ ក៏ធ្វើឡើងទន្ទឹមគ្នានឹងការបញ្ចប់ការវាស់វែងដីធ្លីនៅទូទាំងប្រទេស គឺក្នុងគោលបំណងឱ្យពលរដ្ឋរស់នៅមានសុខសុភមង្គល មិនឱ្យមានវិវាទកើតឡើងបន្តទៅទៀតក្នុងសង្គមខ្មែរ ។ យើងមិនចង់ឱ្យពលរដ្ឋខ្មែរបើកភ្នែកឡើងត្រូវមានរឿងក្ដៅក្រហាយដោយសារទំនាស់ព្រំដីជាប់គ្នា ។ យើងចង់ទុកពេលឱ្យពលរដ្ឋយកពេលវេលាឈ្លោះគ្នាទៅធ្វើការងារផ្សេងដែលមានប្រយោជន៍សម្រាប់គ្រួសារ សង្គមជាតិ និងប្រទេសទាំងមូល ។
គួរបញ្ជាក់ថា ដើម្បីពន្លឿនការដោះស្រាយវិវាទដីធ្លី បង្កើតបរិយាកាសគ្មានវិវាទ បញ្ចប់ភាពចម្រូងចម្រាស់ក្នុងសង្គម លុបបំបាត់វិវាទដីធ្លីដែលមានចរិតនយោបាយ យន្តការទាំង៣ បានសហការជាមួយអាជ្ញាធរមានសមត្ថកិច្ច រកដំណោះស្រាយចំពោះករណីវិវាទដែលនៅសេសសល់ដើម្បីបិទបញ្ចប់ពង្រឹងសុវត្ថិភាពការកាន់កាប់ដី បង្កើតភាពសុខដុមរមនាសង្គម បង្កភាពអនុគ្រោះដល់ដំណើរការអភិវឌ្ឍន៍សេដ្ឋកិច្ច សង្គមកិច្ចនៅតាមមូលដ្ឋាន និងឈានទៅបង្កើនល្បឿននៃការកាត់បន្ថយភាពក្រីក្រ ៕
Account
Security
Favourite Content