សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ស្ពឺ ៖ រហូតមកដល់ពេលនេះ កម្ពុជាទទួលបានគម្រោងរោងចក្រដំឡើងរថយន្តមួយចំនួន និងសុទ្ធសឹងតែជាររថយន្តម៉ាកល្បីនៅលើពិភពលោក ជាក់ស្ដែងនៅថ្ងៃទី២៩ ខែមីនា ឆ្នាំ២០២៣ រោងចក្រដំឡើងរថយន្តម៉ាក ISUZU របស់ជប៉ុន បានបើកដំណើរការជាផ្លូវការនៅបណ្ដោយផ្លូវជាតិលេខ៤ ក្នុងស្រុកគងពិសី ខេត្តកំពង់ស្ពឺ។
នៅក្នុងឱកាសចូលរួមជាអធិបតីនៃការបើកដំណើររោងចក្រដំឡើងរថយន្តនេះ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា រោងចក្រដំឡើងរថយន្តនេះ បានឆ្លុះបញ្ចាំងពីចក្ខុវិស័យរបស់រាជរដ្ឋាភិបាល ដែលបានសម្រេចឱ្យមានការធ្វើការសិក្សាអំពីរបៀងកំណើនសេដ្ឋកិច្ច រាជធានីភ្នំពេញ-ខេត្តព្រះសីហនុ កាលពីប្រមាណ២០ឆ្នាំមុន ដោយក្រសួងពាណិជ្ជកម្ម និងអង្គការ JICA របស់ជប៉ុនបាន។
ឯកឧត្តមបន្តទៀតថា ៖
“វត្តមាននៃគម្រោងវិនិយោគនៅខេត្តកំពង់ស្ពឺនេះ ក៏ជាជោគជ័យនៃគោលនយោបាយពង្រាយរោងចក្រនៅតាមបណ្តាខេត្តរបស់ សម្តេចតេជោនាយករដ្ឋមន្ត្រីផងដែរ។ ជាក់ស្តែង ក្នុងអំឡុងរយៈពេលបីឆ្នាំចុងក្រោយនេះ ប្រមាណ៦០ភាគរយនៃគម្រោងវិនិយោគ ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា មានទីតាំងនៅតាមបណ្តាខេត្តនានា ក្រៅពីខេត្តកណ្តាល និងរាជធានីភ្នំពេញ”
ឯកឧត្តមបញ្ជាក់ថា ៖
“បច្ចុប្បន្នកម្ពុជាមានរោងចក្រដំឡើងរថយន្តដែលជាម៉ាកល្បីៗជាច្រើន ដូចជា Hyundai, Kia, Ssangyong, Soueast, Dongfeng, Ford, និង Toyota ហើយថ្ងៃនេះម៉ាកយីហោដ៏ល្បីមួយទៀត គឺ ISUZU បានបោះទុនបង្កើតរោងចក្រដំឡើងនៅកម្ពុជា ដែលសបញ្ជាក់ពីជំនឿយ៉ាងមុតមាំពីសក្តានុពលនៃទីផ្សាររថយន្តកម្ពុជា ដែលមានការកើនឡើងជាលំដាប់ ស្របនឹងកំណើនសេដ្ឋកិច្ច និងកម្រិតជីវភាពរបស់ប្រជាពលរដ្ឋ”
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ៖
“តំបន់នៅតាមបណ្ដោយផ្លូវជាតិលេខ៤ គឺជាតំបន់ដែលមានភាពទាក់ទាញទៅលើការវិនិយោគជា រោងចក្រ ឧស្សាហកម្ម និងសហគ្រាស ពិសេសនៅក្នុងទឹកដីនៃខេត្តកណ្ដាលនិងកំពង់ស្ពឺ ហើយផ្លូវជាតិមួយនេះ នៅតែមានសារសំខាន់សម្រាប់ការដឹកជញ្ជូនទំនិញក្នុងតំបន់ ទោះបីជាផ្លូវល្បឿនលឿនបានសាងសង់និងដាក់ឱ្យប្រើប្រាស់ក្ដី”
គួររំលឹកដែរថា កាលពីពេលថ្មីៗកន្លងទៅនេះ ឯកឧត្តម វ៉ី សំណាង អភិបាលខេត្តកំពង់ស្ពឺ បានថ្លែងដោយមោទនភាពថា ខេត្តកំពង់ស្ពឺកំពុងមានវិនិយោគិនបរទេសជាច្រើនបានចាប់អារម្មណ៍ និងបណ្ដាក់ទុនវិនិយោគនៅក្នុងខេត្តមួយនេះ ជាពិសេសក្រុមហ៊ុនពីហុងកុងប្រមាណជាង១០០ក្រុមហ៊ុនបានស្នើសុំជួប និងចង់មកបណ្ដាក់ទុនវិនិយោគនៅក្នុងខេត្តកំពង់ស្ពឺ ដែលធ្វើឱ្យខេត្តមួយនេះក្លាយជាខេត្តឧស្សាហកម្មដ៏មានសក្ដានុពលក្នុងប្រទេសកម្ពុជា ៕
Account
Security
Favourite Content