គ្រប់ការដាំដុះដំណាំទាំងអស់ ការជ្រើសរើសគ្រាប់ពូជល្អជាជំហានដំបូងដែលត្រូវយកចិត្តទុកដាក់ និងមានសារសំខាន់ខ្លាំង​ដែលអាចជះឥទ្ធិពលដល់ផលិតកម្មដាំដុះទាំងមូល។ ដោយឡែក សម្រាប់តែការដាំដុះប្រភេទឪឡឹកតាមបែបទំនើបកម្ម អ្នកជំនាញបានណែនាំកសិករឱ្យជ្រើសរើសយកេពូជ ឪឡឹក ច័ន្ទអម្រឹត ដែលងាយស្រួលដាំដុះ និងអាចផ្ដល់ទិន្នផលខ្ពស់ដល់ទៅ ៤៧-៥០តោនក្នុងទំហំដីមួយហិកតា។  

ច័ន្ទអម្រឹត ជាពូជឪឡឹកដែលត្រូវបានបញ្ចេញដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នៃក្រសួងកសិកម្ម រុក្ខាប្រមាញ់ និងនេសាទ តាំងពីឆ្នាំ២០០៦ ហើយឪឡឹកពូជនេះ ផ្លែមានរាងមូល ឆ្នូតពណ៌បៃតងចាស់ មានទម្ងន់ពី ៣-៤.៥គីឡូក្រាម ហើយអាចផ្ដល់ទិន្នផលខ្ពស់ ថែមទាំងមានរសជាតិផ្អែម សាច់ក្រហមមធ្យម កម្រាស់សំបកមធ្យម និងមានកម្រិតជាតិស្ករទាប។

ពាក់ព័ន្ធនឹងរយៈពេលដាំដុះ ឪឡឹក ច័ន្ទអម្រឹត មានអាយុកាលជាមធ្យមពី ៦០-៦៥ថ្ងៃ ដោយវាចាប់ផ្ដើមចេញផ្កាឈ្មោលនៅអាយុ ២៥-៣០ថ្ងៃ និងចេញផ្កាញីនៅរយៈពេល ៣០-៣៥ថ្ងៃក្រោយពេលបណ្ដុះគ្រាប់ ដោយដើមមានប្រវែងចាប់ពី ៣-៥ម៉ែត្រ និងបែកខ្នែង ៨-១០ខ្នែង។ ក្នុងទំហំដីមួយហិកតា គេត្រូវការគ្រាប់ពូជប្រមាណ ៤៤៥ក្រាមសម្រាប់ដាំក្នុងចន្លោះគុម្ព ១.៥x0.៦ ម៉ែត្រ។

ចំពោះការដាំ ឪឡឹកប្រភេទនេះអាចដាំបានពីររបៀបគឺ ដាំដោយគ្រាប់ផ្ទាល់ និងដាំដោយបណ្ដុះកូនក្នុងកន្ទោង​ ហើយការដាំដោយបណ្ដុះគ្រាប់ក្នុងកន្ទោង គឺមានភាពងាយស្រួលក្នុងការគ្រប់គ្រង និងដុះលូតលាស់បានល្អជាង។ សម្រាប់ការបណ្ដុះគ្រាប់ គេត្រូវដាក់ហាលគ្រាប់ពូជក្រោមពន្លឺថ្ងៃពេលព្រឹកចន្លោះម៉ោង ៨-១០ រយៈពេល ២ម៉ោង បន្ទាប់មកយកដាក់ក្នុងម្លប់រយៈពេល ២ម៉ោង ដោយខ្ចប់ស្បៃ ឬកំណាត់ស្ដើង ដាក់ត្រាំទឹករយៈពេល ៣ម៉ោង(ក្នុងទឹកធម្មតា) ឬ១៥នាទីក្នុងទឹកក្ដៅអ៊ុនៗ ប្រមាណ ៤៧អង្សាសេ។

ក្នុងការផ្អាប់គ្រាប់នេះផងដែរ គ្រាប់ដែលត្រាំរួចត្រូវយកទៅផ្អាប់កប់ក្នុងដីខ្សាច់ ឬលាមកគោសើមរយៈពេលមួយយប់ និងត្រូវពិនិត្យមើល បើឃើញសំបកគ្រាប់ប្រេះគឺអាចយកទៅបណ្ដុះក្នុងកន្ទោងបាន តែបើមិនទាន់ប្រេះត្រូវផ្អាប់ថែមមួយយប់ទៀត។ ដោយឡែក កូនឪឡឹកដែលបានបណ្ដុះក្នុងកន្ទោង ត្រូវទុកឱ្យមានអាយុពី ៧-១០ថ្ងៃ ទើបអាចយកទៅដាំបាន។

ចំពោះការដាំដុះ ឪឡឹកត្រូវការរងដែលមានសភាពទូលាយ ដោយកសិករត្រូវធ្វើរងដាំឪឡឹកដោយមានទទឹង ៣-៣.៥ម៉ែត្រដែលងាយស្រួលឱ្យឪឡឹកវារ ឯបណ្ដោយអាចធ្វើទៅបានអាស្រ័យលើស្ថានភាពដី និងកម្ពស់រងគឺ ១០សង់ទីម៉ែត្រនៅរដូវប្រាំង ឬ ២០-៣០សង់ទីម៉ែត្រនៅរដូវវស្សា ឬគេអាចគ្រប់រងដោយចំបើង ឬប្លាស្ទិកក៏កាន់តែប្រសើរ។

ចំណែកការថែទាំ ដំណាំឪឡឹកត្រូវការកាត់រំលោះខ្នែងពី ៣-៤ខ្នែងក្នុងមួយដើម ជាពិសេសខ្នែងដែលដុះចេញពីគល់ដោយទុកតែដើមមេ ១ និងខ្នែងតែ១បានហើយ ចៀសវាងមានខ្នែងផ្សេងៗដែលស្រូបយកសារធាតុចិញ្ចឹមច្រើន។ ជាទូទៅ ក្នុងការកាត់រំលោះនេះ គេអាចកាត់បាននៅពេលដំណាំមានអាយពី ២៥-៣០ថ្ងៃ ក្រោយពេលបណ្ដុះកូន ឬដាំដោយគ្រាប់ ឯផ្លែវិញ គួរទុកតែ ២ប៉ុណ្ណោះក្នុងមួយដើមទើបវាមានទំហំធំៗល្អ។ ដើម្បីឱ្យកាន់តែទទួលបានផលល្អ កសិករអាចបន្ថែមជីលាមកគោ ឬជីសរីរាង្គ ដើម្បីទ្រាប់បាតមុនពេលដាំក្នុងបរិមាណ ៥តោនក្នុងមួយហិកតា​ រួចបំប៉នជីគីមីប្រើប្រាស់តាមការកំណត់ត្រឹមត្រូវ។

គួរកត់សម្គាល់ថា ពូជឪឡឹក ច័ន្ទអម្រឹត អាចប្រមូលផលក្រោយរយៈពេល ២ខែពីពេលបណ្ដុះគ្រាប់ ដែលគេអាចសម្គាល់ផ្លែឪឡឹកទុំដោយមើលដៃឪឡឹកដែលនៅឈមនឹងផ្លែមានសភាពស្វិត។ ក្នុងការប្រមូលផលនេះផងដែរ ដើម្បីចៀសវាងបញ្ហាផ្សិត និងបាក់តេរី កសិករគួរទុកទងប្រវែង ២០សង់ទីម៉ែត្រពីផ្លែ ចៀសវាងលាងទឹក ប្រើចំបើង ឬវត្ថុទន់សម្រាប់ទ្រាប់ កុំឱ្យប៉ះទង្គិចពេលដឹកជញ្ជូន និងរក្សាទុកនៅកន្លែងម្លប់ដែលមានលំហូរខ្យល់ចេញចូលល្អ។

សូមជម្រាបដែរថា ការទទួលទានផ្លែឪឡឹក ក្រៅពីអាចជួយបំបាត់អាការស្រេកទឹក ថែមទាំងទទួលបាននូវផលប្រយោជន៍សំខាន់ៗមួយចំនួនទៀតចំពោះសុខភាពរាងកាយ និងសម្រស់ ដោយក្នុងនោះរួមមាន ៖

១. ឪឡឹកជាផ្លែឈើមានជាតិស្ក និងកាឡូរីទាប ដែលស័ក្ដិសមបំផុតសម្រាប់អ្នកសម្រក ឬគ្រប់គ្រងទម្ងន់។

២. ជួយទប់ស្កាត់ការប្រមូលជាតិខ្លាញ់ក្នុងសរសៃឈាម និងគ្រប់គ្រងសម្ពាធឈាម។

៣. វីតាមីន A ដែលនៅក្នុងផ្លែឪឡឹកអាចជួយថែរក្សាសុខភាពភ្នែក។

៤. វាអាចជួយកាត់បន្ថយជាតិខ្លាញ់លើផ្ទៃមុខ និងបន្ថែមសំណើមដល់ស្បែក។

៥. ជួយកាត់បន្ថយការរលាក ហើម និងក្រហម។

៦. អាស៊ីតអាមីណូដែលមាននៅក្នុងផ្លែឪឡឹកអាចជួយកាត់បន្ថយហានិភ័យនៃជំងឺបេះដូង។

៧. សារធាតុលីកូពីនដែលមាននៅក្នុងផ្លែឪឡឹក គឺមានគុណសម្បត្តិក្នុងការកាត់បន្ថយហានិភ័យនៃជំងឺមហារីកផងដែរ។