សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឥណទាន សិស្ស-និស្សិត គឺជាគម្រោងឥណទានមួយរបស់គ្រឹះស្ថានហិរញ្ញវត្ថុ អេហ្វ អេច អេហ្វ ឃែភីថល ដែលបង្កើតឡើងក្នុងគោលបំណងជួយជំរុញការអប់រំដល់យុវជនកម្ពុជា ជាពិសេសគឺយុវជនដែលមកពីគ្រួសារដែលក្រីក្រ និងខ្វះខាតលទ្ធភាព។
ផ្ដើមចេញពីគំនិតបង្កើតក្រុមសន្សំដែលមានលក្ខណៈតូចតាច លោក កុក ថា អគ្គនាយកនៃគ្រឹះស្ថាន អេហ្វអេចអេហ្វ បានប្រែក្លាយខ្លួនទៅជាគ្រឹះស្ថានឥណទានជនបទមួយ នៅឆ្នាំ២០២៤នេះ។
បើតាមលោក កុក ថា គឺលោកបានមើលឃើញពីបញ្ហាប្រឈមចំពោះសិស្ស-និស្សិត ជាពិសេស យុវជនដែលបានបញ្ចប់ការសិក្សានៅកម្រិតវិទ្យាល័យ ហើយត្រូវបន្តទៅសកលវិទ្យាល័យ។
«ពេលប្រឡងបាក់ឌុបចប់ ខ្ញុំចេះតែឃើញយុវជនប្រឈមនឹងបញ្ហាមិនមានលទ្ធភាពរៀននៅសកលវិទ្យាល័យដែលខ្លួនចង់រៀន ខ្លះត្រូវបង្ខំចិត្តរៀនជំនាញណាដែលមានតម្លៃសមល្មម ទាំងដែលខ្លួនគាត់មិនបានស្រឡាញ់ ហើយបើករណីខ្លះទៀត ឪពុកម្ដាយសុខចិត្តលក់ទ្រព្យដើម្បីបង់ថ្លៃសាលារបស់កូនជាដើម»។ នេះបើតាមការលើកឡើងរបស់លោក កុក ថា។
លោកបានបន្តរៀបរាប់ឱ្យដឹងទៀតថា កញ្ចប់ឥណទានសម្រាប់សិស្ស-និស្សិតនាពេលនេះគឺនឹងទៅសម្រួលបន្ទុកគ្រួសាររបស់យុវជនបានច្រើន ដែលវាជាការចំណេញសេដ្ឋកិច្ចគ្រួសារបានមួយផ្នែក។ ក្រៅពីគម្រោងឥណទានសម្រាប់សិស្ស-និស្សិតនេះទៅ គ្រឹះស្ថានរបស់លោកបច្ចុប្បន្ននេះក៏មានផ្ដល់សេវាកម្មឥណទានផ្សេងៗទៀតដែរ គ្រាន់តែផ្ដោតសំខាន់ខ្លាំងទៅលើកម្ចីសម្រាប់សិស្ស-និស្សិត។ ផ្ដោតសំខាន់លើកម្ចីប្រភេទនេះ ក៏ព្រោះតែលោកឱ្យតម្លៃទៅលើការអប់រំ ជាពិសេសគឺសិស្សដែលមកពីគ្រួសារខ្វះខាតលទ្ធភាពតែម្ដង។
ឆ្លងកាត់បទពិសោធន៍តស៊ូរៀនសូត្រ ដោយមិនមានការផ្គត់ផ្គង់គ្រប់គ្រាន់ពីគ្រួសារ លោក កុក ថា ចង់ឃើញសិស្ស-និស្សិតជំនាន់ក្រោយៗនៅតែអាចបន្តការសិក្សារបស់ខ្លួនដោយខ្លួនឯងបាន បើទោះជាគ្រួសារមិនមានលទ្ធភាពក៏ដោយ។
ផ្ដល់កម្ចីទៅដល់សិស្ស-និស្សិតក៏ពិតមែន ប៉ុន្តែលោក កុក ថា មិនលើកទឹកចិត្តឱ្យយុវជនយកប្រាក់នោះទៅប្រើខុសពីគោលដៅអប់រំនោះទេ៖
«តាមរយៈឥណទាននេះ សិស្ស និងអាណាព្យាបាលអាចរួមគ្នាក្នុងការស្នើសុំកម្ចីសម្រាប់ទិញសម្ភារៈសិក្សា និងបង់ថ្លៃសាលាបាន តែយើងមិនលើកទឹកចិត្តឱ្យសិស្សប្រើប្រាស់កម្ចីដើម្បីសម្ភារៈនិយមនោះទេ។ សម្ភារៈសិក្សាទៀតសោត ក៏យើងមិនលើកទឹកចិត្តឱ្យគាត់ហ៉ឺហាពេកដែរ និយាយរួមគឺទិញតម្លៃល្មមៗអាចប្រើប្រាស់បាន»។
ចំពោះទំហំកម្ចីវិញ លោក កុក ថា បានបញ្ជាក់ឱ្យដឹងដែរថា កម្ចីស្ថិតក្នុងចន្លោះពី ២៥០ដុល្លារ ទៅដល់ ១ពាន់ដុល្លារ ហើយតម្រូវឱ្យសិស្ស-និស្សិតបង់ចន្លោះពី ២០ដុល្លារ ទៅ ៥០ដុល្លារប៉ុណ្ណោះក្នុងមួយខែ។
យ៉ាងណាមិញ បើទោះបីជាឥណទានសម្រាប់សិស្ស-និស្សិតនេះ ទទួលបានការសាទរច្រើនពីអ្នកនៅក្នុងវិស័យ ប៉ុន្តែសម្រាប់ស្ថាប័នរបស់លោកក៏ជួបបញ្ហាប្រឈមច្រើនដែរ។ ក្នុងនោះ លោក កុក ថា ផ្ទាល់ក៏បានចំណាយពេលវេលាជាច្រើនឆ្នាំនៅក្នុងការសិក្សារស្រាវជ្រាវ ដោយរាប់បញ្ចូលទាំងការចេញទៅសិក្សានៅក្រៅប្រទេស ការប្រឹក្សាជាមួយអ្នកជំនាញដែលធ្វើការនៅក្នុងវិស័យហិរញ្ញវត្ថុជាច្រើនឆ្នាំ ព្រមទាំងបទពិសោធន៍ដែលលោកធ្វើការជាមួយយុវជនច្រើនឆ្នាំផង។ ម្យ៉ាងទៀត កម្ចីប្រភេទនេះជាកម្ចីដែលមានទំហំតូច ហើយមានលក្ខខណ្ឌស្មុគស្មាញច្រើន ដូច្នេះទាមទារឱ្យលោកធ្វើការងារជាច្រើនដើម្បីជួយសម្រួលដំណើរការស្នើសុំឥណទាន និងសំខាន់បំផុតគឺធានាថាសិស្ស-និស្សិតដែលបានប្រើប្រាស់កម្ចី មានលទ្ធភាពក្នុងការសងត្រឡប់វិញ៕
Account
Security
Favourite Content