សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាពេលកន្លងមកនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យមានការវិនិយោគតំបន់សេដ្ឋកិច្ចពិសេសនៅក្បែរអាកាសយានដ្ឋានអន្តរជាតិសៀមរាបអង្គរក្នុងគោលបំណងគាំទ្រដល់អាជីវកម្មអាកាសយានដ្ឋានផង និងផ្ដល់ឱកាសការងារដល់ប្រជាពលរដ្ឋក្នុងតំបន់ថ្មី ក្រុងរុនតាឯកផង ។ ជាការកត់សម្គាល់ នៅពេលនេះ មានក្រុមហ៊ុនមួយមកពីប្រទេសចិនបានបង្ហាញបំណងវិនិយោគលើការបង្កើតតំបន់សេដ្ឋកិច្ចពិសេសនៅក្បែរអាកាសយានដ្ឋានអន្តរជាតិសៀមរាបអង្គរ។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជានៅថ្ងៃទី៤ ខែកញ្ញា ឆ្នាំ២០២៤ បានបង្ហាញពីលទ្ធផលនៃកិច្ចជំនួបរវាង ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ជាមួយនឹងតំណាងក្រុមហ៊ុន Angkor International Airport Investment (Cambodia ) Co.,Ltd និងតំណាងក្រុមហ៊ុន China Energy Engineering Group Yunnan Electric Power Institute ពាក់ព័ន្ធទៅលើកិច្ចពិភាក្សាគ្នាទៅលើការវិនិយោគ។
បើតាមសេចក្ដីប្រកាសព័ត៌មានដដែលឱ្យដឹងថា ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិសៀមរាបអង្គរ បានជួបពិភាក្សាម្ដងហើយជាមួយក្រុមប្រឹក្សាអភិវឌ្ឍន៍កម្ពុជា ពីគម្រោងវិនិយោគតំបន់សេដ្ឋកិច្ចពិសេសនៅជិតអាកាសយានដ្ឋាន ហើយការដែលវិនិយោគនោះ គ្រោងនឹងផ្ដោតលើសកម្មភាពបឋមចំនួន៣ គឺ ទី១. ការវិនិយោគថាមពលកកើតឡើងវិញដើរដោយពន្លឺព្រះអាទិត្យ ទី២ ការវិនិយោគក្នុងវិស័យទេសចរណ៍ និងទី៣ ការវិនិយោគក្នុងវិស័យកសិកម្ម ។
ឯកឧត្តម ជា វុទ្ធី បានមានប្រសាសន៍ឱ្យដឹងថា រហូតមកដល់ពេលេះ អាកាសយានដ្ឋានអន្តរជាតិសៀមរាបអង្គរ បានដំណើរការរយៈពេលជិត១ឆ្នាំហើយ ហើយតាមរយៈការដាក់ដំណើរការអាកាសយានដ្ឋានអន្តរជាតិសៀមរាបអង្គរនេះ បានចូលរួមជំរុញកំណើនសេដ្ឋកិច្ចជាតិ និងបានជំរុញទាក់ទាញទេសចរបរទេសមកទស្សនាកម្ពុជា ជាពិសេសនៅខេត្តសៀមរាប ។
លោក Lu Wei ប្រធានគណៈប្រតិភូ ក្រុមហ៊ុនទាំងពីរដែលបានមកជួបជាមួយឯកឧត្តម ជា វុទ្ធី បានមានប្រសាសន៍ថា ចាប់តាំងពីការបើកដំណើរការ រហូតមកទល់ពេលនេះ អាកាសយានដ្ឋានសៀមរាបអង្គរ បានទទួលអ្នកដំណើរការប្រមាណ៩០ម៉ឺននាក់ហើយ និងរំពឹងថារហូតដល់ខែតុលារនឹងមានអ្នកដំណើរប្រមាណ ១លាន ៣០ម៉ឺននាក់ ហើយអាចកើនដល់ ១លាន ៥០ម៉ឺននាក់នៅដំណាច់ឆ្នាំ២០២៤នេះ ។
ជាមួយគ្នានេះ លោកក៏បានបង្ហាញពីគម្រោងសិក្សាក្នុងការអភិវឌ្ឍតំបន់សេដ្ឋកិច្ចពិសេស និងតំបន់ថាមពលពិសេស ដោយបានសហការជាមួយក្រុមហ៊ុន Energy China YNPD ដែលជាក្រុមហ៊ុនចិនបង្កើតឡើងតាំងពីឆ្នាំ១៩៥៨ និងមានជំនាញផ្នែកថាមពលអគ្គិសនី ។ គម្រោងតំបន់ថាមពលពិសេសនេះ នឹងមានរៀបចំផលិតថាមពលអគ្គិសនីដើរដោយពន្លឺព្រះអាទិត្យ បាយអូម៉ាស ថាមពលដើរដោយខ្យល់ និងប្រព័ន្ធផ្ទុកថាមបលផងដែរ ។
គួរបញ្ជាក់ថា រហូតមកដល់ពេលនេះ កម្ពុជាមានតំបន់សេដ្ឋកិច្ចពិសេសកំពុងដំណើរការចំនួន២៦តំបន់ និងបានទាក់ទាញគម្រោងវិនិយោគចំនួន៧០០គម្រោង បណ្ដាក់ទុនគិតជាទឹកប្រាក់មានប្រមាណ ២៨ពាន់លានដុល្លារអាមេរិក និងបង្កើតបានការងារជូនប្រជាពលរដ្ឋសរុបជាង១៨ម៉ឺននាក់ ។
ក្នុងឆ្នាំ ២០២៤នេះ មានរោងចក្រ សហគា្រសតូចធំជាច្រើនបានបោះទុនវិនិយោគនៅក្នុងតំបន់សេដ្ឋកិច្ចពិសេសនានាក្នុងប្រទេសកម្ពុជា ជាពិសេសក្នុងខេត្តកំពង់ស្ពឺ ខេត្តស្វាយរៀង ខេត្តព្រះសីហនុ ខេត្តកោះកុង និងរាជធានីភ្នំពេញផងដែរ ៕
Account
Security
Favourite Content