ភ្នំពេញ ៖ នៅដើមឆ្នាំ២០២៦នេះ ខេត្ត​កំពត​ ទទួលបាន​គម្រោង​វិនិយោគ​លើតំបន់​សេដ្ឋកិច្ច​ចំនួន​២​បន្ថែមទៀត ដែល​គម្រោងទាំង​២ នេះមានទុន​វិនិយោគសរុប​ចំនួន​ ១៨៥​លានដុល្លារអាម៉េរិក​ និងអាច​បង្កើត​ការងារ​ជា​បឋមជូន​ពលរដ្ឋជាង៥០០កន្លែង ។ នេះបើតាម​សេចក្ដីប្រកាសព័ត៌មាន​របស់គណៈកម្មាធិការ​វិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា។ ។

បើតាម​គណៈកម្មាធិការ​វិនិយោគកម្ពុជា​បាន​បង្ហាញទីតាំង​នៃគម្រោង​វិនិយោគលើ​តំបន់​សេដ្ឋកិច្ចពិសេសទាំង២ ដោយតំបន់សេដ្ឋកិច្ចកំពតហ៊្វូជាន​ ស្ថិតនៅក្នុងស្រុកជុំគិរី តាមបណ្ដោយផ្លូវជាតិលេខ​៤១ ក្នុងទំហំទុនវិនិយោគ​ ១២០លានដុល្លារអាម៉េរិក និងមួយទៀត គឺតំបន់​សេដ្ឋកិច្ចពិសេស​ ខេភី យ៉ញ ​ស្ថិតនៅ​ក្នុងក្រុងបូក​គោខេត្តកំពត តាមបណ្ដោយផ្លូវជាតិលេខ​៣​ ក្នុងទំហំទុន​វិនិយោគ ៦៥លានដុល្លារអាម៉េរិក ។

តាមរយៈការវិនិយោគតំបន់​សេដ្ឋកិច្ចពិសេស​ទាំង២​នេះ នឹង​អាចទាក់ទាញគម្រោងវិនិយោគថ្មីបន្ថែម​ ជាពិសេស ​គម្រោង​វិនិយោគ​លើឧស្សាហកម្ម​ចូលទៅក្នុង​ខេត្តកំពត ស្របពេលសក្ដានុពលរបស់​ខេត្តជាប់មាត់សមុទ្រ​មួយ​នេះមានភាពទាក់ទាញ​ស្រាប់ ដោយរាជរដ្ឋាភិបាល​បាន​ចំណាយថវិកា​រាប់​រយ​លានដុល្លារអាម៉េរិក​ អភិវឌ្ឍន៍​ហេដ្ឋារចនាសម្ព័ន្ធ​មានផ្លូវជាច្រើន​ខ្សែ​តភ្ជាប់ពីភ្នំពេញ និងពីបណ្តាខេត្តមួយចំនួនមួយ ដើម្បីងាយស្រួលឆ្ពោះទៅខេត្តកំពត ដូចជា ផ្លូវជាតិលេខ​២ លេខ​៣​ លេខ​៣១ ផ្លូវជាតិលេខ​៣៣ និងផ្លូវជាតិ​លេខ​៤១​ជាដើម​ ។​

គួរបញ្ជាក់ថា ចាប់តាំងពី​រាជរដ្ឋាភិបាលបានបើក​សម្ពោធឱ្យប្រើប្រាស់​កំពង់ផែទឹកជ្រៅដំណាក់​កាលទី ១​ក្នុង​ខេត្តកំពត បានជំរុញឱ្យសក្ដានុពលខេត្តកំពត ជាពិសេស​តំបន់តាមបណ្ដោយផ្លូវជាតិ​សំខាន់ៗ​ទៅកាន់​ខេត្តកំពតកាន់តែមានភាពទាក់ទាញ និងការ​វិនិយោគ ។ ជាក់ស្ដែង​តាមបណ្ដោយផ្លូវជាតិលេខ​៣ និងផ្លូវជាតិលេខ​៤១ មានការទាក់ទាញការ​វិនិយោគ​កាន់តែខ្លាំង​ឡើង ដោយវិនិយោគ​បានសំឡឹង​មើលពី​ឱកាស​វិនិយោគសាងសង់​រោងចក្រ ឃ្លាំង និងតំបន់​សេដ្ឋកិច្ចពិសេស​ជាដើម ។​

កាលពីចុង​ខែមករា​ កន្លងទៅនេះ ឯកឧត្តម​ សាយ សំអាល់ ឧបនាយករដ្ឋមន្ត្រី រដ្ឋមន្ត្រី​ក្រសួងរៀបចំដែនដី នគរូបនីយកម្ម​ និងសំណង់​ បានណែនាំឱ្យក្រុមការងារ​គ្រប់ជាន់ថ្នាក់​ និងអាជ្ញាធរ​ក្នុង​ខេត្តកំពត ត្រូវ​យក​ចិត្តទុកដាក់អនុវត្ត​ការងារ ដើម្បីបង្កើន​សមិទ្ធផល​ថ្មី ក៏ដូចជាដើម្បីប្រែក្លាយខេត្តកំពត​ទៅជា​របៀងសេដ្ឋកិច្ច​ដ៏រឹង​មាំរបស់ជាតិ ដោយក្នុងនោះ ត្រូវ​យកចិត្តទុកដាក់លើការអនុវត្តផែនការអភិវឌ្ឍន៍ប្រចាំឆ្នាំ កម្មវិធីវិនិយោគ៣ឆ្នាំរំកិល គម្រោងវិនិយោគរបស់រដ្ឋ និងវិស័យឯកជននានា ជាពិសេសពន្លឿនការរៀបចំហេដ្ឋារចនាសម្ព័ន្ធ និងតភ្ជាប់បណ្តាញអគ្គិសនី និងទឹកស្អាតជូនប្រជាពលរដ្ឋឱ្យបានគ្រប់ខ្នងផ្ទះ។ ក្រៅពីនេះ ត្រូវកសាងខឿនទេសចរណ៍ខេត្តកំពត​ ដោយចាប់ផ្តើមពីការអភិវឌ្ឍតាមសហគមន៍ ដូចជាផ្លូវចូល ចំណតរថយន្ត បន្ទប់ទឹកសាធារណៈ ជាដើម ដើម្បីទាក់ទាញភ្ញៀវទេសចរ បង្កើនចំណូល និងកាត់បន្ថយបំណុលគ្រួសារ ព្រមទាំងបង្កើនផ្នត់គំនិតជាសហគ្រិនមូលដ្ឋាន ព្រមទាំងគំនិតច្នៃប្រឌិតក្នុងការបង្កើតមុខរបរឱ្យប្រជាពលរដ្ឋ ។

ភ្នាក់ងារអចលនវត្ថុវ​ប្រចាំខេត្ត​កំពត​ និង​កែប លោក លឹម រដ្ឋា បាន​និយាយថា តាមរយៈគម្រោង​វិនិយោគធំៗនៅក្នុង​ខេត្តកំពត​ និងកែប ដូចជា​គម្រោង​ព្រែកជីក​ហ្វូណ​នតេជោ គម្រោងកំពង់ផែ​ទឹកជ្រៅ ​នឹង​ធ្វើឱ្យ​ខេត្តទាំងពីរនេះ ក្លាយជា​គោល​នៃការ​វិនិយោគរបស់វិនិយោគិនទាំងក្នុង និងក្រៅប្រទេស​ ។ ប៉ុន្តែដោយសារ​ស្ថានភាពសេដ្ឋកិច្ច​សកល ​និង​សេដ្ឋកិច្ចកម្ពុជា នៅមិនទាន់ប្រសើរ​ ការទាក់ទាញ​នូវ​វិនិយោគិន​ថ្មីៗ ក៏មិន​ទាន់​ខ្លាំងប៉ុន្មានដែរ ដោយរំពឹងថា​ រយៈពេល​ ៣ ទៅ ៥ឆ្នាំខាងមុខ​ទៀត អាច​នឹងមានការ​វិនិយោគច្រើន ហើយនឹងធ្វើឱ្យតម្រូវការ​នៃការ​ប្រើប្រាស់ដីធ្លី​ក្នុង​ខេត្ត​ជាប់សមុទ្រ​ទាំងនេះ​មានកំណើន​ខ្ពស់ ៕