ភ្នំពេញ ៖ គម្រោងសាងសង់ស្ថានីយច្រកទ្វារព្រំដែនស្ទឹងបត់ និងផ្លូវតភ្ជាប់ទៅផ្លូវជាតិលេខ៥ គិតរហូត​មកទ​ល់​ពេ​លនេះ​សម្រេចវឌ្ឍនភាពការងារបាន៨០ភាគរយ​ហើយ ដែលក្នុងនោះរួមមាន អគារច្រកទ្វារអន្តរ​ជាតិ និងផ្លូវតភ្ជាប់ទៅផ្លូវជាតិលេខ៥ អគារអន្តេវាសិកដ្ឋាន ចំណតផ្ទេរផ្ទុកទំនិញ ឃ្លាំង និងទី​លាន​កុ​ង​តឺ​ន័​រ​ផ​​ង​ដែ​រ​។ ​នេះបើតាមការបញ្ជាក់ឯកឧត្តម​បណ្ឌិត យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និង​ជានា​​​យ​កគ​ម្រោងស្ទឹងបត់ ។

ក្នុងប្រជុំពិភាក្សាជាមួយគណៈប្រតិភូអញ្ជើញមកពីធនាគារពិភពលោក (World Bank) ដោយមា​ន​ការ​ចូ​ល​រួ​មផ​​ងដែ​រពីសំណាក់ថ្នាក់ដឹកនាំ និងមន្ត្រីជំនាញពាក់ព័ន្ធលើប្រព័ន្ធ​លំ​ហូ​រ​ឆ្ល​ងកា​ត់​ច្រ​ក​ទ្វា​រ​ព្រំ​ដែ​ន​អន្តរ​ជា​តិ​​ស្ទឹងបត់ តាមរបត់ SSI កាលពីពេលថ្មីៗនេះ ឯកឧត្តម​​ បណ្ឌិត យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន និ​ងជា​នា​យ​កគ​ម្រោ​ង​ស្ទឹ​ង​បត់បានឱ្យដឹងថា បន្ទាប់ពីគម្រោងនេះដាក់ឱ្យដំណើរការ តំបន់ប៉ោយប៉ែតនឹងប្រែក្លាយជាតំបន់អភិវឌ្ឍន៍មួយយ៉ាងខ្លាំង ជាមជ្ឈមណ្ឌលស្តុក និងចែកចាយទំនិញ ជាតំ​ប​ន់សេ​ដ្ឋកិច្ចពិសេស ដែលបង្កើ​តជា​ស​ក្តានុ​ព​ល​រូប​​វ័ន្តដ៏រឹ​ង​មាំ​ស​ម្រា​ប់ទ្រទ្រង់ដល់​គម្រោ​ង​វិ​និ​យោ​គ​​នានា​​ក្នុ​ង​ស្រុក និងក្នុងប្រទេសនៃមហាអនុតំបន់ទន្លេមេគង្គ។

ជាមួយគ្នានេះ ធនាគារពិភពលោកបានលើកឡើងពីនីតិវិធី និង​ការ​សម្រប​ស​ម្រួ​លការដឹកជញ្ជូនទំនិញ ព្រមទាំងអ្នកដំណើរឆ្លងកាត់តាមព្រំដែនតាមរយៈការអនុវត្តអនុស្សរណៈ និង​កិច្ច​ព្រមព្រៀងផ្សេងៗ ដើម្បីជំរុញកំណើនសេដ្ឋកិច្ចតាមរយៈការដឹកជញ្ជូននៅក្នុងប្រទេស និងតំបន់។

នៅក្នុងឱកាសនោះផងដែរ ឯកឧត្តម​ក៏បានអនុញ្ញាតឱ្យតំណាងក្រុមហ៊ុនទីប្រឹក្សាគម្រោងធ្វើបទបង្ហាញជូនអង្គប្រជុំឱ្យបានជ្រាប​ពីព័​ត៌​មាន​សំខាន់​ៗ​ ​រួមមានដូចជា ៖ (១) ប្លង់ទិដ្ឋភាពរួមនៃគម្រោងទាំងមូល (២)​វិសាលភា​ព​នៃ​ផ្ទៃ​ដីទី​តាំ​ងគ​ម្រោ​ង (៣)ទំហំការងារ (៤)លំហូរនៃការពិនិត្យយានយន្តឆ្លងដែន (៥)បែបបទសម្រាប់យានយន្តចូល និង (៦) បែបប​ទសម្រាប់យានយន្តចេញ ។

សូមរំលឹកថា ​កម្ពុជា-ថៃ បានប្ដេជ្ញាក្នុងការ​ជំរុញ​ទំហំ​ពាណិជ្ជកម្ម​រវាង​គ្នា​ឱ្យ​បានដល់​១៥ពាន់​លានដុល្លារ​អាមេរិក​ក្នុង​ពេលឆាប់ៗនេះ ហើយភាគីទាំងពីរ​ក៏បានព្រមព្រៀង​ក្នុងការ​បើក​ច្រកព្រំដែន​ថ្មីៗជា​បន្តបន្ទាប់​ដើម្បី​សម្រួល​ដល់ការ​ដោះដូរទំនិញរវាងគ្នា​ទៅវិញទៅមក​ ហើយតាមរយៈច្រកព្រំដែន​ស្ទឹង​បត់​នេះដែរ ក៏រំពឹងថា​នឹងជួយ​បង្កើនទំហំពាណិជ្ជកម្មរវាង​ប្រទេស​ទាំងពីរ​បានមួយកម្រិតទៀត​ផងដែរ ៕