សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការវិនិយោគលើវិស័យអចលនទ្រព្យសំខាន់បំផុតគឺការជ្រើសរើសទីតាំង បើជ្រើសរើសទីតាំងត្រូវ គឺជាជោគជ័យមួយក្នុងជំនួញ និងការវិនិយោគ ប៉ុន្តែមានមនុស្សមិនតិចនាក់នោះទេ ដែលមិនដឹងថា តើត្រូវជ្រើសរើសទីតាំងយ៉ាងម៉េចឱ្យត្រូវនឹងការវិនិយោគរបស់ខ្លួន ។ ចម្ងល់នេះត្រូវបានលោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានបង្ហាញពីទីតាំងមួយចំនួនដែលល្អសម្រាប់ការវិនិយោគ។
លោក សន សៀប បានមានប្រសាសន៍ថា វិធីសាស្ត្រក្នុងការជ្រើសរើសទីតាំងសម្រាប់វិនិយោគអចលនទ្រព្យមាន ៤ យ៉ាងណា គឺទីតាំង ទីតាំង ទីតាំង និងទីតាំង ។ តើទីតាំងទាំង៤នេះ មានអ្វីខ្លះ ?
លោកបន្តថា ទីតាំងទាំង ៤ នោះរួមមាន ១.ទីតាំងដែលមានភ្ជាប់ជាមួយនឹងការដឹកជញ្ជូនសាធារណៈ ដូចជាទីតាំងនៅជិតរថភ្លើង ឬនៅផ្លូវល្បឿនលឿនជាដើម ។ អ្នកវិនិយោគត្រូវសម្លឹងមើលថា តើតំបន់ណាដែលមានការផ្សារភ្ជាប់ការដឹកជញ្ជូនច្រើនជាងគេ ដូចជាទីតាំងដែលមានមនុស្សត្រូវចុះឡើងយានយន្តជាដើម ។ ទី២. ទីតាំងមួយទៀតគឺសំដៅលើតំបន់ណាដែលកំពុងធ្វើហេដ្ឋារចនាសម្ព័ន្ធច្រើន ។
លោកបញ្ជាក់ថា ៖
« កាលពីអំឡុងកូវីដ១៩ រាជរដ្ឋាភិបាលកម្ពុជាបានចំណាយថវិកាច្រើនណាស់ក្នុងការអភិវឌ្ឍហេដ្ឋារចនាសម្ព័ន្ធ ដូចជាព្រលានយន្តហោះ ផ្លូវក្រវាត់ក្រុង និងកំពង់ផែជាដើម ។ ទីតាំងទាំងនេះហើយដែលធ្វើឱ្យតម្លៃអចលនទ្រព្យឡើងថ្លៃ ដូច្នេះការវិនិយោគលើអចលនទ្រព្យនៅទីតាំងទាំងនេះមិនខុសនោះឡើយ » ។
លោកបន្ថែមថា សម្រាប់ទីតាំងទី៣នោះគឺតំបន់ដែលមានសុវត្ថិភាព ។ អ្នកវិនិយោគត្រូវសិក្សាមើល ពីតំបន់ដែលមានសុវត្ថិភាព ដូចជាតំបន់ដែលមិនមានអំពើចោរកម្ម ឬមានសកម្មភាពរញ៉េរញ៉ៃណាមួយ ដោយគិតពីសុខសុវត្ថិភាពពេលធ្វើដំណើរទៅធ្វើការ និងពេលត្រលប់មកវិញទាំងពេលថ្ងៃ និងពេលយប់ ។ ដូច្នេះសម្រាប់អ្នកទិញអចលនទ្រព្យដូចជាការទិញផ្ទះជាដើមក៏គេសម្លឹងលើកត្តាទាំងនេះដែរ ។
លោកបានបញ្ជាក់ថាទីតាំងទី៤ ដែលគួរជ្រើសរើសសម្រាប់ការវិនិយោគលើអចលនទ្រព្យគឺភាពងាយស្រួល ។ ភាពងាយស្រួលនេះគេសំដៅលើងាយស្រួលក្នុងការរស់នៅ ដូចជាទីតាំងនៅជិតសាលារៀន ងាយស្រួលជូនកូនទៅរៀន នៅជិតមន្ទីរពេទ្យ ដែលអាចងាយស្រួលបញ្ជូនសាច់ញាតិទៅកាន់មន្ទីរពេទ្យបានទាន់ពេលវេលា ពេលមានជំងឺឈឺថ្កាត់ណាមួយ ទៅតាំងនៅជិតផ្សារ ងាយស្រួលក្នុងការទិញទំនិញប្រើប្រាស់ប្រចាំថ្ងៃ ។
ប្រធានសមាគមរូបនេះបានបញ្ជាក់បន្ថែមថា បើសិនជាអ្នកវិនិយោគបានដឹងពីទីតាំងដែលជាទិសដៅអភិវឌ្ឍន៍របស់រាជរដ្ឋាភិបាលមួយទៀតរឹតតែល្អ និងមានឱកាសខ្ពស់ក្នុងការទទួលបានប្រាក់ចំណេញពីគម្រោងវិនិយោគអចលនទ្រព្យរបស់ខ្លួន។ ដូច្នេះហើយទើបអ្នកវិនិយោគដែលដឹងពីគម្រោងអភិវឌ្ឍន៍ធំៗរបស់រាជរដ្ឋាភិបាលតែងតែទៅទិញអចលនទ្រព្យនៅជិតតំបន់នោះបានរួចរាល់ និងចាប់ផ្ដើមធ្វើការវិនិយោគនៅពេលគម្រោងរបស់រដ្ឋចាប់ផ្ដើមសកម្មភាពអភិវឌ្ឍន៍ ៕
Account
Security
Favourite Content