សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យអលចនទ្រព្យកម្ពុជាបានចាប់ផ្ដើមជួបប្រទះនឹងបញ្ហាចាប់តាំងពីអំឡុងវិបត្តិកូវីដ១៩ ក្នុងឆ្នាំ២០២០ ហើយរហូតមកដល់ពេលបច្ចុប្បន្ន វិស័យនេះ នៅតែបន្តជួបបញ្ហា និងមិនទាន់បានវិលត្រលប់ទៅរកស្ថានភាពដូចកាលមុនវិបត្តិកូវីដ១៩វិញនៅឡើយទេ ។ អ្នកជំនាញនៃវិស័យអចលនទ្រព្យបានព្យាករថា វិស័យនេះអាចត្រូវការពេលវេលា២ឆ្នាំបន្ថែមទៀត ដើម្បីស្ដារឱ្យបានដូច ឬប្រហាក់ប្រហែលនឹងស្ថានភាពមុនវិបត្តិកូវីដ១៩ ។
អ្នកស្រី អាន សុធីតា នាយិកាប្រតិបត្តិ ក្រុមហ៊ុនអចលនទ្រព្យ PropNex Cambodia បានមានប្រសាសន៍ប្រាប់សារព័ត៌មាន AMS Economy ឱ្យដឹងថា បើតាមទស្សនរបស់អ្នកស្រី វិស័យអចលនទ្រព្យកម្ពុជាទំនងជាអាចត្រូវការពេលវេលាប្រមាណ២ឆ្នាំបន្ថែមទៀត ដើម្បីស្ដារ និងជំរុញឱ្យដូច ឬប្រហាក់ប្រហែលនឹងស្ថានភាពមុនវិបត្តិកូវីដ១៩ ។
អ្នកស្រីបន្តថា ៖
«បើទោះបីជាបច្ចុប្បន្ននេះ សេដ្ឋកិច្ចកម្ពុជាត្រូវបានព្យាករថាកើនឡើងវិញហើយក្ដី ប៉ុន្តែវិស័យអចលនទ្រព្យកម្ពុជា នៅតែពឹងលើកត្តាខាងក្រៅ ដូច្នេះហើយ បើសិនជាកត្តាខាងក្រៅនៅតែមានបញ្ហា វានៅតែជះឥទ្ធិពលដល់វិស័យអចលនទ្រព្យកម្ពុជាដដែល ។ យ៉ាងណាក្ដី ដោយសារតែវិស័យអចនទ្រព្យកម្ពុជានាពេលបច្ចុប្បន្ននេះកាន់តែមានភាពចាស់ទុំ នៅពេលអនាគត វិស័យនេះនឹងអាចពង្រឹងខ្លួនបានកាន់តែមាំ និងអាចទប់មិនឱ្យមានវិបត្តិ ឬបញ្ហាប្រឈមធ្ងន់ធ្ងរនោះឡើយ»។
លោក គាម សៀកឡុង អគ្គនាយកក្រុមហ៊ុនអចលនទ្រព្យ Century 21 Dream Property ធ្លាប់បានលើកឡើងផងដែរថា វិស័យអចលនទ្រព្យទំនងជាមិនអាចដូចនឹងស្ថានភាពមុនវិបត្តិកូវីដ១៩ទេ ប៉ុន្តែវាមានការអភិវឌ្ឍក្នុងរបត់ថ្មី ដូច្នេះហើយគ្រប់អ្នកអភិវឌ្ឍន៍សូមកុំរំពឹងថាដូចមុនវិញ តែត្រូវធ្វើយ៉ាងណាឱ្យវិស័យនេះមានការរីកចម្រើនអភិវឌ្ឍន៍តាមរបៀបថ្មី ។
លោកបន្តថា ការអភិវឌ្ឍ ត្រូវគិតគូរច្បាស់លាស់ និងសិក្សាទីផ្សារឱ្យបានច្បាស់ជាមុនសិន ដើម្បីជៀសវាងជួបប្រទះនឹងបញ្ហាដូចក្នុងអំឡុងវិបត្តិកូវីដ១៩ដែលនាំឱ្យគម្រោងជាច្រើនត្រូវជួបបញ្ហា ។
សូមដែរថា សម្រាប់ឆ្នាំ២០២៤កន្លងទៅថ្មីនេះ រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់ បានដោះស្រាយនូវបញ្ហាគម្រោងអភិវឌ្ឍអចលនទ្រព្យនានាជាច្រើនដែលបានដាក់ពាក្យស្នើសុំចំនួន១០៦គម្រោងដោយក្នុងនោះបានដោះស្រាយរួចចំនួន ៥៣គម្រោង រួមមាន បុរីចំនួន១៧ ស្មើនឹង ៣៧គម្រោង ដីឡូត៍ចំនួន ១៤គម្រោង និងខុនដូ ៣គម្រោង ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្លាប់បានណែនាំឱ្យអ្នកអភិវឌ្ឍន៍អចលនវត្ថុ គួរសិក្សា និងតាមដានព័ត៌មានលើពិភពលោក ដើម្បីស្វែងយល់ពីបញ្ហាសេដ្ឋកិច្ចលើពិភពលោក ជៀសវាងពេលអភិវឌ្ឍន៍ធ្វើឱ្យលើសតម្រូវការ ព្រោះសេដ្ឋកិច្ចកម្ពុជា បានចូលសមាហរណកម្មជាមួយនឹងសេដ្ឋកិច្ចពិភពលោកហើយ ដូច្នេះ បើសិនជាពិភពលោកមានបញ្ហាវាក៏នឹងធ្វើឱ្យកម្ពុជាត្រូវមានបញ្ហាដូចគ្នាដែរ ៕
Account
Security
Favourite Content