ព្រះសីហនុ ៖ក្នុងរយៈពេល១៦ឆ្នាំកន្លងមកនេះ តំបន់សេដ្ឋកិច្ចពិសេសក្រុងព្រះសីហនុ បានទាក់ទាញក្រុមហ៊ុនចំនួន ២០២ មកពីជាង១០ ប្រទេស និងបានបង្កើតឱកាសការងារជាង ៣០ ០០០នាក់សម្រាប់ប្រទេសកម្ពុជា ហើយបរិមាណនាំចូល និងនាំចេញប្រចាំឆ្នាំរបស់ខ្លួនមានចំនួន ៧% នៃចំនួនសរុបរបស់កម្ពុជា។

នេះជាការលើកឡើងរបស់ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា តាមរយៈទំព័រហ្វេសប៊ុកផ្លូវការរបស់ឯកឧត្តមនាថ្ងៃទី៣០ ខែធ្នូ ឆ្នាំ២០២៤​ក្នុងដំណើរទស្សនកិច្ចតំបន់សេដ្ឋកិច្ចពិសេសក្រុងព្រះសីហនុ។

ឯកឧត្តមឯកអគ្គរដ្ឋទូតបានមានប្រសាសន៍ថា៖ លោករីករាយណាស់ដែលបានមកទស្សនាតំបន់សេដ្ឋកិច្ចពិសេសក្រុងព្រះសីហនុ ដែលវិនិយោគ និងសាងសង់ដោយក្រុមហ៊ុនចិន។

ឯកឧត្តម វ៉ាង វិនពីន បានឱ្យដឹងថា៖

«ឯកឧត្តម Xi Jinping ប្រធានាធិបតីចិន បានកោតសរសើរតំបន់សេដ្ឋកិច្ចពិសេសក្រុងព្រះសីហនុជាគំរូនៃកិច្ចសហប្រតិបត្តិការជាក់ស្តែងរវាងចិន និងកម្ពុជា។ សម្ដេចអគ្គមហាសេនាបតីតេជោ ហ៊ុន សែន ធ្លាប់មានប្រសាសន៍ចាត់ទុកតំបន់សេដ្ឋកិច្ចពិសេសក្រុងព្រះសីហនុដូចជាកូនបង្កើតរបស់សម្ដេចដែលសម្ដេចបង្កើតមកដោយផ្ទាល់ដៃ។ ខ្ញុំសូមជូនពរឱ្យតំបន់សេដ្ឋកិច្ចពិសេសក្រុងព្រះសីហនុកាន់តែប្រសើរឡើង និងក្លាយជាគំរូនៃការអភិវឌ្ឍន៍ប្រកបដោយគុណភាពខ្ពស់នៃកិច្ចសហប្រតិបត្តិការចិន-កម្ពុជា»។

ដោយឡែកទាក់ទងនឹងខេត្តតំបន់ឆ្នេរនេះ រាជរដ្ឋាភិបាលកម្ពុជាបានកំណត់យកខេត្តព្រះសីហនុជាគោលដៅ និងជំរុញការវិនិយោគ ដើម្បីកែប្រែខេត្តមួយនេះឱ្យក្លាយជាមជ្ឈមណ្ឌលពាណិជ្ជកម្មឡូជីស្ទីក និងទេសចរ​ណ៍​ ដោយបានរៀបចំនូវគម្រោងប្លង់មេរួចរាល់ និងត្រៀមប្រកាសនៅឆ្នាំ២០២៥ខាងមុខនេះ។ នៅក្នុងផែនការមេអភិវឌ្ឍន៍ខេត្តព្រះសីហនុរយៈពេល១៥ឆ្នាំរាជរដ្ឋាភិបាលរំពឹងថានឹងទទួលបានទុនវិនិយោគប្រមាណ​២០​ពាន់​លានដុល្លារអាមេរិក ។

បើតាមឯកឧត្តម ជា កុកហុង  ប្រធានលេខាធិការដ្ឋានផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង និងអភិវឌ្ឍបណ្តាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និងប្រទាក់ក្រឡា បានមានប្រសាសន៍ឱ្យដឹងថា ផែនការមេអភិវឌ្ឍន៍ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណងនេះ ជាគម្រោងវិនិយោគដ៏ធំរបស់រាជរដ្ឋាភិបាល ដែលបានគិតគូរគ្រប់ជ្រុងជ្រោយក្នុងការអភិវឌ្ឍខេត្តព្រះសីហនុទៅជាមជ្ឈមណ្ឌលពាណិជ្ជកម្មឡូជីស្ទីក និងជាតំបន់ទេសចរណ៍ដ៏ល្បីល្បាញនៅក្នុងតំបន់អាស៊ានក្នុងរយៈពេល១៥ ។ គម្រោងនេះ នឹងអាចទាក់ទាញវិនិយោគិនពីវិស័យឯកជន និងដៃគូអភិវឌ្ឍន៍បានជាង​២០ពាន់លានដុល្លារអាមេរិក ហើយនឹងធ្វើឱ្យចំណូលផលិតផលក្នុងស្រុកសរុបក្នុងខេត្តព្រះសីហនុ ដែលសំដៅលើចំណូលជាមធ្យមរបស់ពលរដ្ឋក្នុងខេត្តនេះកើនឡើងបន្ថែមទៀត តាមរយៈការទទួលបានឱកាសការងារធ្វើ ជាមួយនឹងប្រាក់កម្រៃខ្ពស់ជាងមុន និងទទួលបានជំនាញបន្ថែមពីការវិនិយោគទាំងនោះ ។

ឯកឧត្តមបន្តថា នៅក្នុងផែនការមេអភិវឌ្ឍន៍ខេត្តព្រះសីហនុនេះ នឹងរៀបចំបែងចែកតំបន់ទៅតាមសក្ដានុពលភាពសេដ្ឋកិច្ចដែលមាននៅក្នុងខេត្ត ដូចជាតំបន់ឡូជីស្ទីក ឧស្សាហកម្ម ពាណិជ្ជកម្ម តំបន់ទេសចរណ៍ពិសិដ្ឋ និងតំបន់ហិរញ្ញវត្ថុជាដើម ។ ការបែងចែកតំបន់នេះ មានសារសំខាន់ណាស់ ដើម្បីទាក់ទាញនិងសម្រួលដល់ការវិនិយោគ ជាក់ស្ដែងតាមបទពិសោធន៍នៅទីក្រុងធំៗលើពិភពលោកនេះ ក៏មានការបែងចែកតំបន់ដូចគ្នានេះដែរ ។ នៅក្នុងការបែងចែកតំបន់ក្នុងខេត្តព្រះសីហនុ នឹងរៀបចំហេដ្ឋារចនាសម្ព័ន្ធឆ្អឹងខ្នង បន្ទាប់មកនឹងរៀបចំឱ្យមានគោលនយោបាយពិសេសទៅតាមតំបន់នីមួយៗ ដូចជាការលើកទឹកចិត្តពន្ធ ការលើកទឹកចិត្តជាការសម្របសម្រួលអនុលោមភាព ការផ្ដល់សេវាច្រកចេញចូលតែមួយរហ័សទាន់ចិត្ត និងការសម្រួលពាណិជ្ជកម្មជាដើម ។

ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក៏បានថ្លែងនៅក្នុងវេទិកាវិនិយោគក្នុងខេត្តព្រះសីហនុកាលពីពេលថ្មីៗនេះឱ្យដឹងផងដែរថា ខេត្តព្រះសីហនុ ជាខេត្តមានសក្ដានុពលធំធេង ហើយពេលនេះ គឺជាឱកាសដ៏មានតម្លៃសម្រាប់ស្វែងយល់ពីសក្ដានុពលវិនិយោគ និងចក្ខុវិស័យរបស់រាជរដ្ឋាភិបាលក្នុងការប្រែក្លាយខេត្តព្រះសីហនុ ទៅជាមជ្ឈមណ្ឌលវិនិយោគ និងការអភិវឌ្ឍដ៏រស់រវើកមួយក្នុងក្របខ័ណ្ឌអាស៊ាន ៕