សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើមិនមានការប្រែប្រួលអ្វីនោះទេ គម្រោងព្រែកជីកហ្វូណនតេជោ នឹងចាប់ផ្ដើមជីក ឬសាងសង់ជាផ្លូវការនៅខែវិច្ឆិកា ឆ្នាំ២០២៥ខាងមុខនេះ។ នេះបើតាមការបញ្ជាក់ពីឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូននៅព្រឹកថ្ងៃទី១០ ខែមិថុនា ឆ្នាំ២០២៥ ខណៈគ្រឿងចក្រក៏បានត្រៀមរួចរាល់ ដោយដឹកយកទៅដាក់តាមគោលដៅនីមួយៗរួចរាល់ ហើយក្រុមការងារក៏កំពុងពន្លឿនក្នុងការកំណត់និយាមកា និងបោះបង្គោលព្រំដីតាមបណ្ដោយព្រែកជីក ។
ឯកឧត្តម ផន រឹម បានបញ្ជាក់ថា មកទល់ថ្ងៃទី១០ ខែមិថុនា ឆ្នាំ២០២៥នេះ ដំណើរការចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីព្រែកជីកហ្វូណនតេជោ បានដំណើរការដោយរលូនតាមការគ្រោងទុក។
ឯកឧត្តមក៏បានលើកឡើងពីបញ្ហាប្រឈមមួយចំនួន ក្នុងនោះរួមមាន ផ្លូវឆ្ងាយពិបាកធ្វើដំណើរចូល ដោយត្រូវឆ្លងកាត់វាលស្រែ ចុះបឹង កាត់ប្រឡាយ កាត់ព្រៃក្រាស់ កាត់បន្លារ ភ្លៀងផ្គរ និងស្ថានភាពរអិលខ្លាំងជាដើម។ បច្ចុប្បន្ននេះ បេសកកម្មចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តតាកែវនៅថ្ងៃទី០៩ ខែមិថុនា ឆ្នាំ២០២៥ ក្រុមការងារបច្ចេកទេសអន្តរក្រសួងសម្រេចបាន៤៧ចំណុច ក្នុងភូមិសាស្រ្តខេត្តតាកែវ។
ឯកឧត្តមបញ្ជាក់ថា គិតត្រឹមបំណាច់ខែឧសភា ឆ្នាំ២០២៥ ក្រុមការងារបច្ចេកទេសបានចុះពិនិត្យទីតាំងប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដី តាមបណ្តោយព្រែកជីកហ្វូណនតេជោបញ្ចប់ការងារសម្រាប់កំណាត់ទី២ ក្នុងភូមិសាស្ត្រខេត្តកណ្តាលទាំងស្រុងហើយ។
ឯកឧត្តមបានបញ្ជាក់បន្ថែមថា ៖
«បើគ្មានការប្រែប្រួលទេ គម្រោងព្រែកជីកហ្វូណនតេជោ គ្រោងចាប់ផ្ដើមសាងសង់ជាផ្លូវការនៅខែវិច្ឆិកា ឆ្នាំ២០២៥ខាងមុខ។ ដោយឡែក សម្រាប់ចំនួនគ្រឿងចក្រដែលត្រូវប្រើប្រាស់ក្នុងការសាងសង់ អាស្រ័យលើពេលវេលា ស្ថានភាព និងទីតាំងដែលជ្រើសរើសសម្រាប់បើកការសាងសង់ជាផ្លូវការ។ ជារួមក្រុមហ៊ុនសាងសង់បានត្រៀមគ្រឿងចក្ររួចរាល់ រង់ចាំតែការអនុវត្តនីតិវិធីចាំបាច់ (ការដោះស្រាយផលប៉ះពាល់ ការបោសសម្អាតយុទ្ធភណ្ឌមិនទាន់ផ្ទុះ -ល-)ទើបការសាងសង់ចាប់ផ្តើមបាន»។
តាមរយៈគម្រោងព្រែកជីកហ្វូណនតេជោ នឹងធ្វើឱ្យកម្ពុជាមានផ្លូវដឹកជញ្ជូនថ្មីមួយទៀតតាមផ្លូវទឹក ដែលអាចតភ្ជាប់ពីផ្លូវទឹកសាបទៅផ្លូវសមុទ្រ ហើយក៏អាចតភ្ជាប់ទៅកាន់កំពង់ផែទឹកជ្រៅរបស់កម្ពុជា និងបន្តទៅកាន់កំពង់ផែអន្តរជាតិជាច្រើនក្នុងតំបន់ និងនៅលើពិភពលោក ។ គម្រោងនេះដែរ ក៏នឹងជំរុញសក្ដានុពល ការវិនិយោគដល់ខេត្តកែប និងខេត្តកំពត បន្ថែមមួយកម្រិតទៀត ពីព្រោះថាក្រៅពីការសាងសង់ព្រែកជីកនេះហើយ ក៏មានការសាងសង់នូវមជ្ឈមណ្ឌលភស្តុភារ និងកំពង់ផែនៅក្នុងខេត្តកែប ។ ដូច្នេះវានឹងធ្វើឱ្យខេត្តកាន់តែមានសក្ដានុពល ទាក់ទាញការវិនិយោគជាតិ និងអន្តរជាតិ ជំរុញសក្ដាពលវិស័យទេសចរក្នុងខេត្តជាប់សមុទ្រទាំងនេះ បានមួយកម្រិតទៀតផងដែរ ។
គួរបញញជាក់ដែរថា ប្រមុខរាជរដ្ឋាភិបាលកម្ពុជា បានប្ដេជ្ញាថា គម្រោងនេះ ត្រូវតែសាងសង់ឱ្យបានចេញជាលទ្ធផល ព្រោះវាជាគម្រោងសម្រាប់ប្រវត្តិសាស្ត្រ និងជាគម្រោងមួយផ្ដល់អត្ថប្រយោជន៍ដ៏មហាសាលដល់សេដ្ឋកិច្ចកម្ពុជា និងអ្នកជំនាន់ក្រោយៗ ៕
Account
Security
Favourite Content