សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ធំ៖ វេទិកាផ្គូរផ្គងរវាងអ្នកផលិត អ្នកទិញ និងការតាំងបង្ហាញផលិតផលក្នុងស្រុកក្រោមគម្រោងការទទួលបានទីផ្សារសម្រាប់អ្នកផលិតក្នុងស្រុក ក៏ដូចជាសហគ្រាសធុនមីក្រូតូច និងមធ្យម (ភូមិ១ផលិតផល១) បានធ្វើដំណើរដល់ខេត្តកំពង់ធំ និងមានការចូលរួមយ៉ាងច្រើនកុះករពីសំណាក់អ្នកពាក់ព័ន្ធ។
ក្នុងពិធីបើកវេទិកាផ្គូរផ្គងរវាងអ្នកផលិត និងអ្នកទិញ ព្រមទាំងមានការតាំងបង្ហាញផលិតផលក្នុងស្រុក កាលពីព្រឹកថ្ងៃទី១៥ ខែឧសភា ឆ្នាំ២០២៤ នេះ ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយ នៃទីស្ដីការគណៈរដ្ឋមន្ដ្រី ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណៈកម្មការភូមិ១ផលិតផល១ខេត្តកំពង់ធំផ្ទាល់ និងម្ចាស់អាជីវកម្មជាច្រើននាក់ បានអញ្ជើញជាអធិបតីភាពនៅសាលប្រជុំខេត្តកំពង់ធំ។
ក្នុងឱកាសនេះដែរ ឯកឧត្តមបណ្ឌិត សួង ណយ បានមានប្រសាសន៍ឱ្យដឹងថា៖
«កំពង់ធំក៏មិនខុសពីខេត្តដទៃទៀតដែលយើងបានរៀបចំកម្មវិធីផ្គូរផ្គងរវាងអ្នកផលិត និងអ្នកទិញ ធ្វើយ៉ាងណាកសាងទំនុកចិត្តអ្នកទិញ តាមរយៈការដាក់តាំងផលិតផលឱ្យពួកគាត់បានឃើញ បានឮ បានហិត បានប៉ះ និងបានភ្លក្ស ឱ្យដឹងពីគុណភាពសិនទើបគាំទ្រ និងបន្តការគាំទ្របន្ថែមទៀត»។
ឯកឧត្តមបណ្ឌិតក៏បានបង្ហាញពីគោលបំណងនៃវេទិកាផ្គូផ្គងនេះថា វាមិនត្រឹមតែជាកម្លាំងគាំទ្រក្នុងស្រុកប៉ុណ្ណោះទេ តែវាក៏ជាការរួមសាមគ្គីគ្នា ដូចដែលពាក្យថា ចង្កឹះមួយបាច់ ដើម្បីឈានទៅការនាំផលិតផលខ្មែរចេញទៅក្រៅប្រទេស ផ្សារភ្ជាប់ទំនាក់ទំនងរវាងអ្នកផលិត និងអ្នកទិញទៅជាបណ្តាញប្រទាក់ក្រឡាគ្នា យល់ដឹងអំពីតម្រូវការទីផ្សារ ដោយផ្ដោតលើចំណុចសំខាន់ៗទាំងការវេចខ្ចប់ សោភ័ណភាព គុណភាព បរិមាណ ស្តង់ដា អនាម័យ និងតម្លៃ ឱ្យត្រូវតាមតម្រូវការរបស់អ្នកទិញ។
ក្នុងការដាក់តាំងបង្ហាញនេះ មានការចូលរួមពីសំណាក់ម្ចាស់អាជីវកម្ម សហគ្រាសមកពីតាមបណ្ដាខេត្តនានា រួមមានគ្រឿងឧបភោគបរិភោគ បន្លែ ត្រី សាច់ ក៏ដូចជាគ្រឿងកែច្នៃពីកសិផលក្នុងស្រុកជាច្រើនមុខផ្សេងទៀតដែលមានរសជាតិ គុណភាព និងសុវត្ថិភាពដល់អ្នកប្រើប្រាស់។
ជាចុងក្រោយ ឯកឧត្តមបណ្ឌិត សួង ណយ បានស្នើឱ្យមានការគាំទ្រផលិតក្នុងស្រុកបន្ថែមទៀត ជាពិសេសនៅតាមភោជនីយដ្ឋាន រមណីយដ្ឋាន អាហារដ្ឋាន ផ្ទះសំណាក់ជាដើម ដែលអាចចូលរួមគាំទ្រតាមរយៈការទិញផលិតផលខ្មែរទៅធ្វើម្ហូប ដាក់តាំងលើតុ ក្នុងបន្ទប់ លក់ជូនភ្ញៀវទេសចរ ឬធ្វើជាអំណោយជូនបងប្អូន ឬមនុស្សជាទីស្រឡាញ់ក្នុងឱកាសពិសេសក៏រឹតតែប្រសើរ៕
Account
Security
Favourite Content