សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមអនុក្រឹត្យរបស់រដ្ឋាភិបាលនៅថ្ងៃទី២៨ ខែសីហា ឆ្នាំ២០២៤ បានសម្រេចបង្កើតក្រុងថ្មីមួយនៅខេត្តព្រះសីហនុ គឺក្រុងកំពង់សោម ដោយកាត់យកឃុំចំនួន៥ពីស្រុកព្រៃនប់មកស្ថិតនៅក្រោមការគ្រប់គ្រងរបស់រដ្ឋក្រុងកំពង់សោម ។
យោងតាមអនុក្រឹត្យបានបង្ហាញផងដែរ ចំពោះឃុំទាំង៥ កាត់ពីស្រុកព្រៃនប់ រួមមានឃុំរាម ឃុំបិតត្រាំង ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ ដូច្នេះឃុំទាំងនេះ នឹងក្លាយទៅជាសង្កាត់ ក្នុងក្រុងកំពង់សោម ហើយទីតាំងរដ្ឋបាលក្រុងកំពង់សោមនឹងស្ថិតនៅក្នុងសង្កាត់រាម ក្រុងកំពង់សោម ។
យោងតាមមាត្រា៤ នៃអនុក្រឹត្យ បានបញ្ជាក់ថា ក្រុមប្រឹក្សាស្រុកព្រៃនប់ និងគណៈអភិបាលស្រុកព្រៃនប់ ត្រូវបន្តគ្រប់គ្រងឃុំចំនួន៥ ឃុំរាម ឃុំបិតត្រាំង ឃុំអូរឧកញ៉ាហេង ឃុំបឹងតាព្រហ្ម និងឃុំអរជ្រៅ រហូតដល់មានក្រុមប្រឹក្សាក្រុងកំពង់សោម និងគណៈអភិបាលក្រុងកំពង់សោមមកជំនួស ។
ការបង្កើតក្រុងថ្មីៗ នៅតាមបណ្ដាខេត្តគឺជាការទាក់ទាញដល់ការវិនិយោគមួយនៅក្នុងតំបន់នោះ ពីព្រោះថានៅពេលរដ្ឋាភិបាលបង្កើតក្រុងថ្មី រដ្ឋាភិបាលត្រូវចំណាយថវិកាលើការអភិវឌ្ឍហេដ្ឋារចនាសម្ព័ន្ធក្នុងតំបន់នោះឱ្យស័ក្តិសមនឹងឈ្មោះជាក្រុង ហេដ្ឋារចនាសម្ព័ន្ធនៅក្នុងក្រុងត្រូវតែទំនើបជាងកាលនៅជារដ្ឋបាលស្រុក ។
គួររម្លឹកថា ខេត្តព្រះសីហនុ ជាតំបន់មួយដែលរដ្ឋាភិបាលបានយកចិត្តទុកដាក់ក្នុងការជំរុញការអភិវឌ្ឍដោយរដ្ឋាភិបាលបានកំណត់យកខេត្តព្រះសីហនុធ្វើជាគោលដៅអភិវឌ្ឍន៍ឱ្យដូចក្រុងមួយរបស់ប្រទេសចិនគឺក្រុងស៊ិនជិនដែលជាតំបន់បណ្ដុំដោយឧស្សាហកម្ម បច្ចេកវិទ្យា ។ ដោយឡែកក្រុងកំពង់សោម ដែលទើបប្រកាសបង្កើតថ្មីៗ នេះក៏ឃើញថាមានការរីកលូតលាស់គួរឱ្យកត់សម្គាល់ គ្រាន់តែគម្រោងមួយនៅក្នុងក្រុងថ្មីនេះមានទឹកប្រាក់វិនិយោគប្រមាណ១៦ពាន់លានដុល្លារអាមេរិកទៅហើយ នោះគឺគម្រោង Bay Of Light ឬគម្រោងរាមស៊ីធី ។
នៅក្នុងប្រទេសកម្ពុជា រហូតមកដល់ពេលនេះមានខេត្តចំនួនពីរហើយដែលមានក្រុងរហូតដល់បី ក្នុងនោះរួមមានខេត្តកណ្ដាល មានក្រុងតាខ្មៅ ក្រុងសំពៅពូន និងក្រុងអរិយក្សត្រ ចំណែកខេត្តព្រះសីហនុ មានក្រុងព្រះសីហនុ ក្រុងកោះរ៉ុង និងក្រុងកំពង់សោម ។ ក្រៅពីនោះ ខេត្តផ្សេងទៀតមានក្រុងភាគច្រើនចំនួន១ និងខេត្តមួយចំនួនទៀតមានក្រុងចំនួន២ក្នុងរដ្ឋបាលខេត្ត ដូចជាខេត្តកំពត ខេត្តស្វាយរៀង ខេត្តបន្ទាយមានជ័យ ខេត្តកំពង់ស្ពឺជាដើម ៕
Account
Security
Favourite Content