សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅគេសង្កេតឃើញថា អ្នកវិនិយោគមួយចំនួន ទោះបីជាកំពុងដាក់ទុនវិនិយោគអចលនទ្រព្យនៅក្នុងប្រទេសខ្លួនហើយក្តី ក៏បានស្វែងរកការវិនិយោគនៅក្រៅប្រទេសបន្ថែមទៀត ជាក់ស្ដែងវិនិយោគិនបរទេសជាច្រើនកំពុងវិនិយោគនៅកម្ពុជា សុទ្ធតែមានអចលនទ្រព្យក្នុងប្រទេសរបស់ខ្លួន ។ អ្នកជំនាញនៃវិស័យអចលនទ្រព្យអន្តរជាតិ បានបង្ហាញពីអត្ថប្រយោជន៍មួយចំនួនដែលអ្នកវិនិយោគគួរតែទិញអចលនទ្រព្យនៅក្រៅប្រទេស ហើយពលរដ្ឋកម្ពុជាក៏អាចពិចារណាក្នុងការទិញអចលនទ្រព្យបានដែរ ។
លោក វ៉ា វីរៈ អ្នកជំនាញអចលនទ្រព្យអន្តរជាតិមួយរូបបានបង្ហាញពីគន្លឹះសំខាន់ៗដែលគួរវិនិយោគអចលនទ្រព្យនៅក្រៅ ។ លោកបានបង្ហាញមូលហេតុចម្បងធំៗមួយចំនួនដោយក្នុងនោះរួមមានដូចជា Diversification Of Assets ដែលសំដៅលើការធ្វើពិពិធកម្មទ្រព្យសម្បត្តិ ។ ចំណុចនេះគឺសំដៅទៅលើការយកទ្រព្យសម្បត្តិដែលខ្លួនមានទៅដាក់នៅប្រទេសដែលអាចរកប្រាក់ចំណេញបានខ្ពស់ជាង ។ ឧទារហ៍ថា ទឹកប្រាក់១លានដុល្លារវិនិយោគនៅកម្ពុជាទទួលបានប្រាក់ចំណូល១០០០ដុល្លារក្នុងមួយខែ តែបើយកទៅដាក់នៅប្រទេសអាមេរិក ឬប្រទេសផ្សេងទៀតដែលអាចរកប្រាក់ចំណេញបាន ៤ ឬ ៥ពាន់ដុល្លារ គឺអ្នកវិនិយោគគួរទៅវិនិយោគលើប្រទេសណាដែលអាចរកប្រាក់ចំណេញបានខ្ពស់ ។
លោកបន្តថា ចំណុចមួយទៀត ដែលគួរគិតគូរក្នុងវិនិយោគលើអចលនទ្រព្យនៅក្រៅប្រទេស គឺការកើនឡើងថ្លៃនៃដើមទុន ដែលសំដៅទៅលើការទិញអចលនទ្រព្យនៅប្រទេសណាដែលមានសក្ដានុពល និងអាចធ្វើឱ្យអចលនទ្រព្យនោះបន្តឡើងថ្លៃទៀតដើម្បីអាចរកប្រាក់ចំណេញបន្ថែម ។ នៅប្រទេសខ្លះ អចលនទ្រព្យមានការកើនឡើងតិចតួច តែប្រទេសខ្លះទៀតនៅមានសក្ដានុពលកើនឡើងខ្ពស់ ដូច្នេះគេអាចរកអចលនទ្រព្យនៅប្រទេសណាដែលអាចមានឱកាសក្នុងការឡើងថ្លៃខ្ពស់ និងទទួលបានប្រាក់ចំណេញខ្ពស់ដែរ ។ ចំណុចទី៣ ដែលត្រូវគិតគូរដែរនោះគឺការទទួលបានចំណូលពីការជួលខ្ពស់ ។ អ្នកវិនិយោគដែលទិញអចលនទ្រព្យនៅក្រៅប្រទេស ក៏គួរស្វែងរកប្រទេសណាដែលអាចទទួលបានចំណូលខ្ពស់ពីការជួលអចលនទ្រព្យរបស់យើង ។ ឧទាហរណ៍ថា ទិញអចលនទ្រព្យ ១លានដុល្លារនៅកម្ពុជា យើងមិនអាចទទួលចំណូលខ្ពស់ពីការជួលទេ ប៉ុន្តែបើទិញអចលនទ្រព្យ១លានដុល្លារនៅប្រទេសសិង្ហបុរី ឬអាមេរិកអាចទទួលបានចំណូលពីការជួលខ្ពស់ ។
លោក វ៉ា វីរៈ បានបង្ហាញបន្ថែមថា អត្ថប្រយោជន៍មួយទៀតដែលអ្នកវិនិយោគនឹងទទួលបានពីការវិនិយោគអចលនទ្រព្យនៅក្រៅប្រទេសនោះ ដូចជាការទទួលបានសញ្ជាតិ ឬបណ្ណស្នាក់នៅ ហើយនៅពេលពួកគាត់ទទួលបានលិខិតទាំងនេះ ពួកគាត់នឹងកាន់តែងាយស្រួលក្នុងការចេញចូលប្រទេសនោះ ។ ចំណុចមួយទៀតដែលអ្នកវិនិយោគទិញអចលនទ្រព្យនៅក្រៅប្រទេស គឺសម្រាប់ទុកពេលពួកគាត់ចូលនិវត្តន៍ និងធ្វើដំណើរកម្សាន្តទៅរស់នៅប្រទេសនោះ ។ មានជនបរទេសខ្លះបានទិញអលចនទ្រព្យនៅកម្ពុជា ព្រោះចង់រស់នៅក្នុងប្រទេសកម្ពុជាពេលចូលនិវត្តន៍ ចំណែកប្រជាជនកម្ពុជាខ្លះ អាចទិញអចលនទ្រព្យនៅក្រៅប្រទេស ព្រោះចង់ទៅរស់នៅប្រទេសនោះពេលដែលចាស់ទៅដូចគ្នា ។
លោក វ៉ា វីរៈ បានបន្ថែមទៀតថា អ្នកខ្លះទិញអចលនទ្រព្យនៅប្រទេសព្រោះតែចង់ឱ្យកូនចៅទទួលបានការអប់រំខ្ពស់ ។ ប្រទេសខ្លះ បើសិនជាពលរដ្ឋមិនមែនជាពលរដ្ឋក្នុងប្រទេសនោះ ឬមិនមែនជាអ្នកវិនិយោគក្នុងប្រទេសនោះ គឺមិនអាចរៀននៅក្នុងប្រទេសគេបានឬក៏តម្រូវឱ្យបង់ថ្លៃសិក្សាខ្ពស់ ប៉ុន្តែគេតម្រូវអ្នកដែលចង់ឱ្យកូនៗរៀងតនោះអាចទិញអចលនទ្រព្យក្នុងប្រទេសគេហើយមានសិទ្ធិរៀនសូត្រដូចពលរដ្ឋរបស់ប្រទេសនោះដែរ ។ក្រៅពីនោះអ្នកទិញអចលនទ្រព្យនៅក្នុងប្រទេសនោះ គឺមានសិទ្ធិដូចពលរដ្ឋគេដែរ ដូចជាសេវាថែទាំសុខភាព ។
វិនិយោគិនខ្លះទៀត គាត់ស្វែងរកទិញអចលនទ្រព្យនៅក្រៅប្រទេស ព្រោះតែមិនចង់ឱ្យទ្រព្យដែលខ្លួនមាននោះ ត្រូវបង់ពន្ធខ្ពស់ ។ ប្រទេសខ្លះគេតម្រូវឱ្យបង់ពន្ធអចលនទ្រព្យខ្ពស់ ដូចជាអាមេរិច និងបណ្ដាប្រទេសមួយចំនួន ប៉ុន្តែនៅកម្ពុជា ឬនៅថៃ ពន្ធអចលនទ្រព្យនៅមានកម្រិតទាបនៅឡើយ ៕
Account
Security
Favourite Content