សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខណ្ឌច្បារអំពៅ ត្រូវបានអ្នកជំនាញ និងអ្នកវិនិយោគនៅក្នុងវិស័យអចលនទ្រព្យចាត់ទុកថាជាតំបន់អភិវឌ្ឍន៍លំនៅឋានដ៏មានសក្ដានុពលនៅរាជធានីភ្នំពេញ ហើយតម្លៃដីធ្លីនៅតាមបណ្ដាសង្កាត់នីមួយៗក្នុងខណ្ឌមួយនេះបានកើនឡើងជាបន្តបន្ទាប់ក្រោយពីមានក្រុមហ៊ុនអភិវឌ្ឍន៍លំនៅឋានជាច្រើនចូលទៅអភិវឌ្ឍន៍ និងផ្គត់ផ្គង់ជូនអតិថិជនដែលមានតម្រូវការ ជាពិសេសតំបន់ជាប់បណ្ដោយផ្លូវជាតិលេខ១ ។
ថ្ងៃនេះ AMS នឹងបង្ហាញជូនពីតម្លៃធ្លីនៅតាមសង្កាត់នានាក្នុងខណ្ឌច្បារអំពៅ ដើម្បីជាទុននៃចំណេះដឹងគោលសម្រាប់អ្នកវិនិយោគក៏ដូចជាម្ចាស់ដីធ្លីក្នុងការពិចារណាលើការដាក់តម្លៃលក់។
១- សង្កាត់ច្បារអំពៅទី១ ៖ តំបន់នេះមានទីតាំងនៅជិតរាជធានីភ្នំពេញជាងគេ ហើយក៏ចាត់ទុកជាតំបន់ដែលមានតម្លៃដីធ្លីខ្ពស់ជាងគេដែរ ក្នុងនោះតំបន់នៅជាប់ផ្លូវសំខាន់ ឬផ្លូវធំមានតម្លៃចន្លោះពី ១ ៥០០ដុល្លារអាមេរិក ទៅ ៣ ៧០០ដុល្លារអាមេរិកក្នុងមួយម៉ែត្រការ៉េ ហើយដីនៅជាប់ផ្លូវតូចមានតម្លៃចន្លោះពី ៥០០ដុល្លារអាមេរិក ទៅ ១ ៦០០ដុល្លារអាមេរិកក្នុងមួយម៉ែត្រការ៉េ ។
២- សង្កាត់ច្បារអំពៅទី២ ៖ តម្លៃដីធ្លីនៅក្នុងសង្កាត់មួយនេះគឺមិនខុសពីតម្លៃដីធ្លីនៅសង្កាត់ច្បារអំពៅទី១នោះទេ សម្រាប់ដីនៅជាប់ផ្លូវធំ ប៉ុន្តែសម្រាប់ដីនៅជាប់ផ្លូវតូចមានតម្លៃចន្លោះពី ៥០០ដុល្លារ ទៅ ១ ១០០ដុល្លារអាមេរិកក្នុងមួយម៉ែត្រការ៉េ ។
៣- សង្កាត់និរោធ ៖ សង្កាត់និរោធជាតំបន់ដែលចាត់ទុកថាមានតម្លៃខ្ពស់បន្ទាប់ពីសង្កាត់ច្បារអំពៅទី១ និងទី២ ដោយក្នុងមួយម៉ែត្រវាមានតម្លៃចន្លោះពី១ ៣០០ដុល្លារអាមេរិក ទៅ ២ ៩០០ដុល្លារអាមេរិក សម្រាប់ដីនៅជាប់ផ្លូវធំ និង ៥០០ដុល្លារអាមេរិក ទៅ ១ ៣០០ដុល្លារអាមេរិកសម្រាប់ដីនៅជាប់ផ្លូវតូច ។
៤- សង្កាត់វាលស្បូវ ៖ សង្កាត់នេះក៏មានការអភិវឌ្ឍលំនៅឋានគួរឱ្យកត់សម្គាល់ដែរ ហើយតម្លៃដីធ្លីនៅតំបន់នេះឃើញថាហក់ឡើងគួរសមដែរ ។ ក្នុងមួយម៉ែត្រការ៉េដីនៅតាមបណ្ដោយផ្លូវធំៗ មានតម្លៃចន្លោះពី ៧០០ដុល្លារអាមេរិក ទៅ ១ ៨០០ដុល្លារអាមេរិក និងដីនៅតាមបណ្ដោយផ្លូវតូចៗមានតម្លៃ ២០០ដុល្លារ ទៅ ៥០០ដុល្លារអាមេរិកក្នុងមួយម៉ែត្រការ៉េ ។
៥- សង្កាត់ព្រែកប្រា ៖ តម្លៃដីធ្លីនៅក្នុងសង្កាត់មួយនេះនៅតាមបណ្ដោយផ្លូវធំមានតម្លៃចន្លោះ ៦០០ដុល្លារអាមេរិក ទៅ ១ ៣០០ដុល្លារអាមេរិក និងតម្លៃចន្លោះពី២០០ដុល្លារអាមេរិក ទៅ ៦០០ដុល្លារអាមេរិកក្នុងមួយម៉ែត្រការ៉េសម្រាប់ដីនៅតាមបណ្ដោយផ្លូវតូចៗ ។
៦- សង្កាត់ព្រែកឯង ៖ សង្កាត់ព្រែកឯងតម្លៃដីធ្លីប្រហាក់ប្រហែលនឹងសង្កាត់ព្រែកប្រាដែរ ក្នុងនោះដីនៅតាមផ្លូវធំមានតម្លៃចន្លោះពី ៤០០ដុល្លារអាមេរិក ទៅ ១ ៣០០ដុល្លារអាមេរិក និងនៅតាមផ្លូវតូចៗមានតម្លៃចន្លោះពី ២០០ដុល្លារ ទៅ ៤០០ដុល្លារអាមេរិកក្នុងមួយម៉ែត្រការ៉េ។
៧- សង្កាត់ក្បាលកោះ ៖ សង្កាត់ក្បាលកោះតម្លៃដីធ្លីឃើញថាមានចន្លោះពី ៣០០ដុល្លារអាមេរិក ទៅ ៩០០ដុល្លារអាមេរិកសម្រាប់ដីនៅជាប់ផ្លូវធំ និង១០០ដុល្លារ ទៅ ៤០០ដុល្លារអាមេរិកក្នុងមួយម៉ែត្រការ៉េសម្រាប់ដីជាប់ផ្លូវតូច ។
៨- សង្កាត់ព្រែកថ្មី ៖ ព្រែកថ្មីចាត់ទុកជាសង្កាត់ដែលមានតម្លៃដីធ្លីទាបជាងគេក្នុងចំណោមបណ្ដាសង្កាត់នានាក្នុងខណ្ឌច្បារអំពៅ ក្នុងនោះនៅតាមបណ្ដោយផ្លូវធំដីអាចមានតម្លៃចន្លោះពី ២០០ដុល្លារ ទៅ ៧០០ដុល្លារអាមេរិកក្នុងមួយម៉ែត្រការ៉េ និងតម្លៃពី ៤០ដុល្លារ ទៅ ២៣០ដុល្លារអាមេរិកក្នុងមួយម៉ែត្រការ៉េសម្រាប់ដីនៅតាមបណ្ដោយផ្លូវតូចៗ ។
គួរកត់សម្គាល់ថា តំបន់ច្បារអំពៅ ត្រូវបានគេរំពឹងថានឹងមានការទាក់ទាញការអភិវឌ្ឍកាន់តែខ្លាំងបន្ថែមទៀត ជាពិសេសទៅលើការអភិវឌ្ឍលំនៅឋាន ស្របនឹងរាជរដ្ឋាភិបាលកំពុងសាងសង់ហេដ្ឋារចនាសម្ព័ន្ធថ្មីដើម្បីសម្រួលការធ្វើចរាចរណ៍ពីច្បារអំពៅចូលភ្នំពេញ និងពីភ្នំពេញទៅកាន់ច្បារអំពៅ ៕
Account
Security
Favourite Content