ភ្នំពេញ ៖ ផ្សារមូលបត្រកម្ពុជា (ផមក) បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅទីផ្សារគោលរបស់ក្រុមហ៊ុន ម៉េងលី ជេ. គួច អេឌ្យួខេសិន ម.ក និងពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុល (សញ្ញាបណ្ណបៃតង) របស់ក្រុមហ៊ុន ហ្គ្រីន សីស្តែនណេប៊ល វេនឈ័រ (ខេមបូឌា) ឯ.ក កាលពីថ្ងៃទី០៧ ខែមីនា ឆ្នាំ២០២៣។  នេះបើយោងតាមសេចក្តីជូនដំណឹងរបស់ក្រុមហ៊ុនផ្សារមូលបត្រកម្ពុជា នៅថ្ងៃទី៩ ខែមីនា ឆ្នាំ២០២៣។

ជាមួយគ្នានេះ ដើម្បីអាចចុះបញ្ជី និងជួញដូរជាផ្លូវការនៅ ផ.ម.ក ក្រុមហ៊ុនទាំងពីរត្រូវតែទទួលបានការអនុញ្ញាតឱ្យបោះផ្សាយលក់ មូលបត្រជាសាធារណៈពីនិយ័តករមូលបត្រកម្ពុជា (ន. ម. ក) និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធ នឹងការចុះបញ្ជីនៅ ផមក។

សូមបញ្ជាក់ថា ក្រុមហ៊ុន ម៉េងលី ជេ. គួច អេឌ្យួខេសិន ម.ក ជាក្រុមហ៊ុនទីដប់ដែលទទួលបានការឯកភាព ជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅ ផមក ។ ក្រុមហ៊ុនត្រូវបាន បង្កើតឡើងនៅក្នុងឆ្នាំ ២០១២ ដែលមានអាជីវកម្មចម្បងក្នុងវិស័យអប់រំ។

បច្ចុប្បន្នក្រុមហ៊ុនបានបើកដំណើរការ សាលារៀនចំនួន ១៥ សាខា រួមទាំងសាខានៅខេត្តចំនួន ២ គឺខេត្តសៀមរាប និងខេត្តតាកែវ និងមានចំនួនសិស្ស សរុបប្រមាណ ២ ម៉ឺននាក់។ ក្រុមហ៊ុនបានផ្តល់នូវសេវាអប់រំតាមលក្ខណស្ដង់ដារ និងមានគុណភាព រួមមានការសិក្សា ចំណេះដឹងទូទៅ (AIS) សាលាភាសាបរទេស (Aii) កម្មវិធីផ្ដល់ការប្រឹក្សា និងសេវាកម្មក្នុងការនាំសិស្សទៅសិក្សានៅ ក្រៅប្រទេស (SOGO) និងកម្មវិធីសិក្សាតាមរយៈអនឡាញ (i-Learn)។

ដោយឡែក ក្រុមហ៊ុន ហ្គ្រីន សីស្តែនណេបិល វេនឈ័រ (ខេមបូឌា) ឯ.ក ជាក្រុមហ៊ុនទីដប់ដែលទទួលបានការឯកភាពជាគោលការណ៍លើពាក្យស្នើសុំពិនិត្យលទ្ធភាព អាចចុះបញ្ជីលក់មូលបត្របំណុល និងជាក្រុមហ៊ុនទីពីរដែលគ្រោងធ្វើការបោះផ្សាយលក់សញ្ញាបណ្ណបៃតង។ ក្រុមហ៊ុនត្រូវបានបង្កើតឡើងតាំងពីឆ្នាំ ២០១៩ ជាមួយនឹងអាជីវកម្មចម្បងក្នុងការផលិតអគ្គិសនីដើរដោយថាមពលព្រះអាទិត្យ កម្លាំង ២០មេហ្គាវ៉ាត់ និងមានទីតាំងនៅខេត្តស្វាយរៀង៕