សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៥នេះ តម្លៃដីនៅតាមបណ្ដាខណ្ឌនានាក្នុងរាជធានីភ្នំពេញ មានការធ្លាក់ចុះគួរឱ្យកត់សម្គាល់បើធៀបនឹងឆ្នាំ២០២៣ និងឆ្នាំ២០២៤ កន្លងទៅ ខណៈការទិញលក់ក៏នៅមានសកម្មភាពហូរហែ ប៉ុន្តែមិនមមាញឹកពេកនោះទេ។
យោងតាមរបាយការណ៍របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញថា នៅក្នុងឆមាសទី១ ឆ្នាំ២០២៥កន្លងទៅនេះ តម្លៃដីធ្លីតាមបណ្ដាខណ្ឌនានាក្នុងរាជធានីភ្នំពេញ មានការធ្លាក់ចុះបន្តិចបើធៀបនឹងឆ្នាំ២០២៣ និងឆ្នាំ២០២៤ដែលមានសភាពទ្រឹង(មិនឡើង មិនចុអថ្លៃ) ជាក់ស្ដែងដីនៅតំបន់មួយចំនួនក្នុងខណ្ឌដូនពេញ ជាពិសេស សង្កាត់ផ្សារថ្មី១ និងសង្កាត់ផ្សារថ្មី២ ដែលធ្លាប់តែមានតម្លៃខ្ពស់ដល់ទៅ ១៣ ០០០ដុល្លារអាម៉េរិកក្នុងមួយម៉ែត្រការ៉េ បានធ្លាក់មកនៅត្រឹមតែ ១១ ០០០ដុល្លារអាម៉េរិកក្នុងមួយម៉ែត្រការ៉េតែប៉ុណ្ណោះនៅឆ្នាំ២០២៥នេះ ។
បើតាមលោក ឌិត ចណ្ណា អគ្គនាយកក្រុមហ៊ុន Lucky Realty បានមានប្រសាសន៍ឱ្យដឹងថា ការធ្លាក់ចុះតម្លៃដីធ្លីក្នុងឆ្នាំ២០២៥នេះ បើធៀបនឹងឆ្នាំមុនៗ គឺដោយសារតែតម្រូវការមិនទាន់មានកំណើនដូចមុនពេលសម័យកូនវីដ១៩ ។ ម្យ៉ាងទៀត សកម្មភាពអភិវឌ្ឍន៍គម្រោងថ្មីៗ ក្នុងរយៈពេលចុងក្រោយនេះក៏មិនទាន់មាននោះដែរ ។
លោកបន្តថា ស្របពេលដែលតម្លៃដីមានការថមថយមួយកម្រិតបែបនេះ ការទិញលក់នៅតែមានជាហូរហែ ហើយដីធ្លីដែលអាចមានការទិញ-លក់ គឺជាដីដែលម្ចាស់ដាក់លក់បន្ទាន់ក្រោមតម្លៃទីផ្សារ ហើយអ្នកដែលធនធានគ្រប់គ្រាន់ក៏ទិញទុកសម្រាប់ត្រៀមផ្ដល់ជូនអ្នកអភិវឌ្ឍន៍បន្តយកចំណេញនៅពេលអនាគត ប៉ុន្តែប្រសិនបើជាដីដែលប្រកាសដាក់លក់ក្នុងតម្លៃទីផ្សារ គឺមិនមានអ្នកទិញនោះទេ ។
លោកបញ្ជាក់ថា តំបន់ដែលមានការទិញលក់ដីធ្លីច្រើនក្នុងឆ្នាំ២០២៥នេះ គឺតំបន់នៅជុំវិញអាកាសយានដ្ឋានអន្តរជាតិតេជោ ដែលទើបបើកដំណើរការថ្មីៗ ។ ជាក់ស្ដែង មួយរយៈនេះ អ្នកវិនិយោគបានសម្លឹងមើលទីតាំងនៅតំបន់ជុំវិញអាកាសយានដ្ឋានថ្មីនេះច្រើន ហើយស្វែងរកដីធ្លីដែលមានតម្លៃសមរម្យសម្រាប់ទុកអភិវឌ្ឍន៍ ឬទុកលក់បន្តនៅពេលអនាគត ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance ក៏បានប្រាប់ AMS Economy ឱ្យដឹងដែរថា ការទិញលក់ដីធ្លីនៅក្នុងឆ្នាំ២០២៥នេះឃើញថា នៅតំបន់ជាយក្រុងនៅតែមានសកម្មភាពខ្លាំងជាងនៅតំបន់កណ្ដាលក្រុង ដោយសារតែនិន្នាការ និងតម្រូវការដីធ្លីសម្រាប់អភិវឌ្ឍន៍នៅតំបន់ជាយក្រុងមានច្រើនជាងនៅកណ្ដាលក្រុង ។
លោកបន្តថា ក្នុងមួយរយៈចុងក្រោយនេះ ការវិនិយោគលើរោងចក្រ ឧស្សាហកម្មនៅតែមានដំណើរការ និងមានរោងចក្រថ្មីៗចូលមកកាន់កម្ពុជាជាបន្តបន្ទាប់ ដូច្នេះហើយតម្រូវការនៃការប្រើប្រាស់ដីធ្លីនៅជាយក្រុងសម្រាប់សង់រោងចក្រ ក៏ដូចជាឃ្លាំងស្តុកទំនិញ មានតម្រូវការខ្ពស់។ ម្យ៉ាងទៀត សម្រាប់ដីធ្លីដែលមានតម្លៃថ្លៃជាង១៥ដុល្លារអាម៉េរិក ក៏មិនមានតម្រូវការប្រើប្រាស់សម្រាប់សាងសង់រោងចក្រ សហគ្រាសនោះដែរ ។
សូមបញ្ជាក់ថា យោងតាមរបាយការណ៍វាយតម្លៃរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានឱ្យដឹងថា ខណ្ឌដូនពេញ នៅតែជាតំបន់ដែលដីធ្លីមានតម្លៃខ្ពស់ជាងគេក្នុងចំណោមបណ្ដាខណ្ឌទាំង១៤ទូទាំងរាជធានី ហើយតំបន់ដែលមានតម្លៃដីធ្លីទាបក្នុងរាជធានីភ្នំពេញ គឺខណ្ឌនៅតាមជាយក្រុង ដូចជា ខណ្ឌកំបូល ខណ្ឌព្រែកព្នៅ និងតំបន់មួយចំនួនទៀតនៅក្នុងខណ្ឌដង្កោ ៕
Account
Security
Favourite Content