សណ្ដែកបាយ ជាដំណាំដែលផ្ដល់អត្ថប្រយោជន៍ច្រើនក្នុងជីវភាពប្រចាំថ្ងៃ ព្រោះវាអាចកែច្នៃបានជាប្រយោជន៍ច្រើនមុខ មិនថាចំពោះប្រភេទបង្អែម ក៏ដូចជាឱសថ ហើយថែមទាំងអាចជួយកែប្រែគុណភាពដីឱ្យមានជីជាតិដី តាមរយៈការបន្សាយសារធាតុអាសូតចូលទៅក្នុងដី ខណៈដែលប្រជាកសិករមួយចំនួនមានចំណូលចិត្តក្នុងការដាំដុះដោយសារតែវាមានតម្រូវការទីផ្សារ និងទទួលបានតម្លៃថ្លៃគួរសម ហើយដំណាំដែលមានប្រយោជន៍មួយនេះ ជាទូទៅគេអាចប្រមូលផលបាន ៧០០-១៣០០គីឡូក្រាមក្នុងមួយហិកតា ប្រសិនការដាំដុះស្របតាមបច្ចេកទេស។
សម្រាប់គ្រាប់សណ្ដែកបាយ គេអាចប្រើប្រាស់ និងកែច្នៃបានទាំងក្នុងវិស័យកសិកម្ម និងឧស្សាហកម្ម ដែលអាចផលិតចេញជាសណ្ដែកបណ្ដុះស្រស់ ម្សៅសណ្ដែក ធ្វើជាបង្អែម និងម្ហូបអាហារច្រើនបែប ហើយសូម្បីតែកាកសំណល់សណ្ដែកបាយក៏គេអាចកែច្នៃបានជាប្រយោជន៍ផងដែរ។
ដោយឡែកនៅប្រទេសកម្ពុជា ដំណាំសណ្ដែកបាយ ជាប្រភេទដំណាំដែលមានវដ្ដជីវិតខ្លី ពុំសូវត្រូវការទឹកច្រើនពេកនោះទេ ទើបប្រជាកសិករនិយមចូលចិត្តដាំដុះច្រើន ជាពិសេសដាំនៅតំបន់មានដីល្បាប់មាត់ទន្លេ ដីក្រហម និងដីខ្មៅ តួយ៉ាងដូចជានៅតាមកំពង់ឆ្នាំង កំពង់ចាម កណ្ដាល ព្រៃវែង បាត់ដំបង កំពត និងខេត្តព្រះវិហារជាដើម។
ពាក់ព័ន្ធនឹងបច្ចេកទេសដាំដុះវិញ ជាធម្មតាសណ្ដែកបាយជាដំណាំមិនប្រកាន់រដូវទេ តែក៏មិនធន់នឹងជំងឺ ឬសត្វល្អិតនោះដែរ ហេតុនេះកសិករត្រូវជ្រើសរើសពូជឱ្យសមស្របតាមលក្ខខណ្ឌដីរបស់ខ្លួន ដូចជា ពូជលូតលាស់មិនកំណត់ដែលជាពូជក្នុងស្រុក មានដើមខ្ពស់មែកច្រើន ថ្នាំងរង្វើល ស្លឹកធំ ដើមទន់ និងមានអាយុកាលវែង ហើយមួយប្រភេទទៀតគឺពូជលូតលាស់កំណត់ ដែលមានដើមទាប បែកមែកតិច ថ្នាំងញឹក ស្លឹកល្អិត អាយុកាលលូតលាស់ខ្លី តែធន់នឹងជំងឺ មានដូចជាពូជសណ្ដែកប្រផេះ និងពូជសណ្ដែកប្រេង។
ចំពោះការរៀបចំដី កសិករត្រូវជ្រើសរើសដីណាដែលជាប្រភេទដីល្បាប់ល្បាយខ្សាច់ ឬដីកំអែលភ្នំភ្លើងនៅតំបន់ខ្ពង់រាប ដែលមានសភាពធូរ ជ្រាបទឹករហ័ស និងសម្បូរសារធាតុចិញ្ចឹម ទើបសណ្ដែកបាយអាចលូតលាស់បានល្អ។ បន្ទាប់មក គេត្រូវសម្អាតដី ប្រមូលយកាកសំណល់ផ្សេងៗ យកមកដុតចោល ហើយភ្ជួររាស់ដីឱ្យបានជ្រៅ និងច្រើនលើក។
នៅតំបន់វាលទំនាប អ្នកដាំគួរលើករងឱ្យបានខ្ពស់ ចន្លោះជួរ ៤៥-៦០សង់ទីម៉ែត្រ ចន្លោះគុម្ព ២៥-៣០សង់ទីម៉ែត្រ កម្ពស់ ២៥-៣០សង់ទីម៉ែត្រ ក្នុងករណីដាំដោយប្រើប្រព័ន្ធស្រោចស្រព ឬបញ្ចូលទឹក។
ការដាំសណ្ដែកបាយ គេត្រូវយកគ្រាប់ពូជដាក់ហាលថ្ងៃក្ដៅ ១-២ម៉ោង បន្ទាប់មកយកទៅលាយជាមួយថ្នាំការពារផ្សិតប្រមាណ ២០០ក្រាម។ ចំពោះការដាំដោយមិនលើករង គេត្រូវបុករណ្ដៅដាំរតាមខ្សែបន្ទាត់ចន្លោះជួរ ៥០សង់ទីម៉ែត្រ ចន្លោះគុម្ព ៣០សង់ទីម៉ែត្រ ជម្រៅពី ៣-៤សង់ទីម៉ែត្រ ដាក់គ្រាប់ ៣-៤គ្រាប់ក្នុងមួយគុម្ព ឬដាំតាមចង្អូរនង្គ័ល ដោយរោយក្នុងជម្រៅ ៤-៥សង់ទីម៉ែត្រ និងត្រូវរោយគ្រាប់ពី ១៥-១៨គ្រាប់ក្នុងប្រវែង ១ម៉ែត្រ។
ក្រៅពីនេះ ការដាំសណ្ដែកប្រភេទនេះក៏ត្រូវការថែទាំផងដែរ ដូចជាការស្រោចទឹក និងជ្រោយដីឱ្យធូរដើម្បីឱ្យមានខ្យល់ចេញចូលបានល្អ រក្សាសំណើម ជ្រាបទឹករហ័ស កាត់បន្ថយការដុះស្មៅ ធ្វើឱ្យសណ្ដែកចាក់ឫសបានវែង បង្កើតកំពកឫសបានច្រើន ជួយឱ្យទិន្នផលសណ្ដែកកើនឡើង។
ចុងក្រោយ គឺការប្រមូលផល សណ្ដែកបាយអាចប្រមូលផលបាននៅអាយុខុសៗគ្នាអាស្រ័យតាមពូជ ក្នុងនោះពូជស្រាលចាប់ពី ៦០-៦៥ថ្ងៃ ពូជកណ្ដាលពី ៦៥-៧០ថ្ងៃ និងពូជធ្ងន់ពី ៧០-៧៥ថ្ងៃក្រោយពេលដាំ ហើយការប្រមូលអាចធ្វើឡើង ២-៣លើកទៅតាមប្រភេទពូជ និងការដាំដុះ៕