ភ្នំពេញ៖ ពិព័រណ៍ឧស្សាហកម្ម សំណង់កម្ពុជា-អន្ដរជាតិ ឆ្នាំ២០២៣ នៅមជ្ឈមណ្ឌលពិព័រណ៍កោះពេជ្រ រយៈពេល ០៣ថ្ងៃត្រូវបានរៀបចំឡើង ដោយមានក្រុមហ៊ុនជាតិ និងអន្ដរជាតិចំនួន ១៣៣ក្រុមហ៊ុនចូលរួមដោយមានដាក់តាំងផលិតផល និងសម្ភារបរិក្ខារ ឧបករណ៍ និងគ្រឿងចក្រសំណង់គ្រប់ប្រភេទ រួមទាំងអចលនទ្រព្យ និងបច្ចេកវិទ្យាទំនើបៗជាង ១០០០ ប្រភេទ ជាមួយនឹងគម្រោងអភិវឌ្ឍអចលនវត្ថុជាច្រើនទៀត ដែលជាការបង្ហាញពីភាពរីកចម្រើនក្នុងវិស័យឧស្សាហកម្ម​សំណង់ និងអចលន ទ្រព្យនៅកម្ពុជា។

ការរៀបចំពិព័រណ៍ឧស្សាហកម្មសំណង់អន្តរជាតិនេះឡើង ដោយមានសន្និបាតបូកសរុបការងារប្រចាំឆ្នាំលើកទី១៣ នៃសមាគមអ្នកសាងសង់កម្ពុជា និងការសម្ពោធបើកពិធីតាំង ពិព័រណ៍ឧស្សាហកម្ម សំណង់កម្ពុជាអន្ដរជាតិឆ្នាំ២០២៣ គឺធ្វើឡើងក្នុងគោលបំណងជួយដល់ការផ្សព្វផ្សាយពីការអភិវឌ្ឍវិស័យសំណង់ និងអចលនទ្រព្យនៅកម្ពុជា នៅអាណត្តិទី៧ នៃរដ្ឋសភា ដែលមាន សម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា។

ឯកឧត្តម ផារ៉ា មង្គល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងរយៈពេល១០ ខែ ឆ្នាំ២០២៣នេះ ក្រសួងបានផ្តល់លិខិតអនុញ្ញាតសាងសង់ទូទាំងប្រទេសមានជិត ៣ពាន់គម្រោង ដែលមានផ្ទៃក្រឡាកម្រាលសំណង់សរុបចំនួន ១២,៣៣លានម៉ែត្រការ៉ែ និងមានទុនវិនិយោគប្រមាណ ៥,១០ពាន់លានដុល្លារអាមេរិក ក្នុងនោះ មានគម្រោងអគារខ្ពស់ៗ ចាប់ពី ៥ជាន់ឡើងមានចំនួន ១៤៦គម្រោង ស្មើនឹង ១៥៤អគារ ប្រើលំនៅឋាន និងបណ្តុំលំនៅឋានមានលក្ខណៈជាប្រើមានចំនួន ៧៩គម្រោង សំណង់អគារពហុមុខងារមានចំនួន ១៨គម្រោង។

ឯកឧត្ដម ផារ៉ា មង្គល មានប្រសាសន៍ថា តាមរយៈពិធីនេះ និងបានឆ្លុះបញ្ចាំងនូវភាពជោគជ័យទាំងការងារសហប្រតិបត្តិការជាមួយស្ថាប័នជាតិ និងអន្តរជាតិ ការងាររួមចំណែកអភិវឌ្ឍន៍សង្គមជាតិ លើវិស័យសំណង់តាមរយៈការចូលរួមសហការគោរព និងអនុវត្តន៍តាមគោលនយោបាយរបស់រាជរដ្ឋាភិបាល ច្បាប់ បទប្បញ្ញត្តិបច្ចេកទេស និងការជួយផ្សព្វផ្សាយអំពីការរីកចម្រើន ការអភិវឌ្ឍសក្តានុពល និងកាលានុវត្តភាពនៃការវិនិយោគលើវិស័យសំណង់នៅកម្ពុជា។

ឯកឧត្តម រដ្ឋលេខាធិការ បានបញ្ជាក់ថា ជាមួយនឹងការអភិវឌ្ឍយ៉ាងសម្បូរបែបលើវិស័យសំណង់នេះ ដើម្បីធានាដល់ការគ្រប់គ្រងសណ្តាប់ធ្នាប់ សុវត្ថិភាព និងគុណភាពសំណង់ ច្បាប់ស្តីពីសំណង់នៃព្រះរាជាណាចក្រកម្ពុជា ត្រូវបានប្រកាសដែលជាមូលដ្ឋានដ៏រឹងមាំក្នុងការគ្រប់គ្រងវិស័យសំណង់ និងអ្នកវិជ្ជាជីវៈសំណង់ បន្ថែមលើនេះក៏មានអនុក្រឹត្យ និងប្រកាសថ្មីៗមួយចំនួនត្រូវបាននិងបន្តដាក់ចេញជាបន្តបន្ទាប់ ដើម្បីជំនួស ឬបំពេញបន្ថែមទៅលើវិធានគ្រប់គ្រងវិស័យសំណង់ឲ្យបានល្អ។

អ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានបញ្ជាក់ផងដែរថា នេះជាឆ្នាំទី១៣ហើយ ដែលសមាគមបានរៀបចំមហាសន្និបាតបូកសរុបការងារប្រចាំឆ្នាំ របស់ សមាគម ហើយក៏ជាលើកទី១០ នៃការរៀបចំកម្មវិធីតាំងពិព័រណ៍ឧស្សាហកម្ម សំណង់កម្ពុជា អន្តរជាតិ រយៈពេល០៣ថ្ងៃ ពីថ្ងៃទី០៦ ដល់ថ្ងៃទី០៨ ខែធ្នូ ឆ្នាំ២០២៣ ដែលមានលក្ខណៈ លំដាប់អន្តរជាតិ និងធំជាងគេនៅប្រទេសកម្ពុជា។

អ្នកឧកញ៉ា ពុង ឃាវសែ បានគូសបញ្ជាក់ថា សមាគមបាន សង្កេតឃើញថាវិស័យសំណង់ និងអលនទ្រព្យ ដែលជាវិស័យមួយ បានជួយគាំទ្រ ដល់ការរីកចម្រើនសេដ្ឋកិច្ចជាតិនោះ បានងើបឡើងវិញជាបណ្តើរៗហើយ  ដែរ។ អ្នកឧកញ៉ា ពុង ឃាវសែ បានថ្លែងថា កម្មវិធីជួបជុំនេះ នឹងផ្តល់ឱកាសដល់អ្នកវិនិយោគក្នុងស្រុក និងក្រៅប្រទេស ដើម្បីបង្កើត និងបង្កើនភាពជាដៃគូជាមួយគ្នាក្នុងការបណ្តាក់ទុនវិនិយោគ ឬធ្វើជាដៃគូអភិវឌ្ឍន៍នៅកម្ពុជា៕