បរទេស ៖ យោងតាមប្រភពព័ត៌មានពី CNBC បានរាយការណ៍ថា ចិនកំពុងប្រឈមនឹងបញ្ហាធំមួយនៅក្នុងវិស័យអចលនទ្រព្យដែលនឹងចំណាយពេលច្រើនឆ្នាំដើម្បីដោះស្រាយ ខណៈដែលវិស័យអចលនទ្រព្យ និងវិស័យពាក់ព័ន្ធមានចំណែកប្រហែលមួយភាគបួននៃសេដ្ឋកិច្ចរបស់ចិន។

អ្នកសេដ្ឋកិច្ច លោកស្រី Louise Loo មកពីក្រុមហ៊ុន Oxford Economics វិភាគថា តាមរយៈការមើលលើទិន្នន័យទូទាំងប្រទេសដើម្បីប៉ាន់ប្រមាណលើអចលទ្រព្យដែលមិនទាន់បានលក់ ឬសំណង់សម្រាប់លក់បានរកឃើញថា វានឹងចំណាយពេលយ៉ាងហោចណាស់ ៤ ទៅ ៦ ឆ្នាំសម្រាប់អ្នកអភិវឌ្ឍន៍អចលនទ្រព្យនៅចិនចៀសពីវិបត្តិអចលនទ្រព្យ។ វាមានន័យថា កិច្ចខិតខំប្រឹងប្រែងក្នុងការជំរុញការផ្តល់មូលនិធិដល់អ្នកអភិវឌ្ឍន៍ និងការខិតខំប្រឹងប្រែងផ្សេងទៀតនឹងប្រើរយៈពេលយូរ ដើម្បីដោះស្រាយបញ្ហាទីផ្សារអចលនទ្រព្យរបស់ចិន។

លោកស្រី Loo និយាយថា មួយចំណែកតូចនៃទិន្នន័យ​បង្ហាញថា ការផ្គត់ផ្គង់លើសដែលមានស្រាប់នៅក្នុងទីផ្សារទំនងជាត្រូវចំណាយពេលយ៉ាងហោចណាស់ ៤ ឆ្នាំទៀតដើម្បីដោះស្រាយ ដែលបានរារាំងតម្រូវការកើនឡើង។ លើសពីនេះ កំណើនការផ្គត់ផ្គង់កើនឡើងមកពីប្រតិបត្តិការទីផ្សារបន្ទាប់បន្សំដោយសារប្រជាពលរដ្ឋមានការព្រួយបារម្ភអំពីការបាត់បង់ប្រាក់ចំណេញពីការធ្លាក់ចុះតម្លៃ ការលក់ផ្ទះទីពីរ ឬទីបីរបស់ពួកគេ គឺជាការអូសទាញបន្ថែមចំពោះដំណើរការនេះ ដែលធ្វើឲ្យអ្នកអភិវឌ្ឍន៍នៅសល់អចលនទ្រព្យច្រើន។

ជាធម្មតានៅប្រទេសចិន ផ្ទះប្រភេទអាផាតមិនត្រូវបានលក់មុនពេលបញ្ចប់ការសាងសង់ ដែលធ្វើឱ្យអ្នកអភិវឌ្ឍន៍ចង់ពន្លឿនការសាងសង់ផ្ទះអោយឆាប់រួចរាល់ ប្រសិនបើពួកគេចង់លក់បន្ថែមទៀត។ យ៉ាងណាមិញ ភាពលំបាកផ្នែកហិរញ្ញប្បទាន និងបញ្ហាផ្សេងទៀតបានធ្វើឲ្យអ្នកអភិវឌ្ឍន៍ត្រូវពន្យារពេលវេលាសាងសង់ផ្ទះ ដែលប៉ះពាល់ដល់ការលក់ផ្ទះនាពេលអនាគត។ ការសាងសង់លំនៅឋាននៅតំបន់ក្រីក្រ ដូចជា ខេត្ត Guizhou អាចចំណាយពេលលើសពី ២០ ឆ្នាំដើម្បីបញ្ចប់ ខណៈដែលខេត្តផ្សេងទៀតដូចជា Jiangxi និង Hebei អាចចំណាយពេលយ៉ាងហោចណាស់ ១០ ឆ្នាំ។

កាលពីខែមុន ធនាគារវិនិយោគជប៉ុន Nomura ប៉ាន់ប្រមាណថា ចំនួនផ្ទះដែលលក់មុនពេលបញ្ចប់ការសាងសង់នៅចិនគឺប្រហែល ២០ ដងនៃទំហំរបស់ក្រុមហ៊ុនអចលនទ្រព្យ Country Garden គិតត្រឹមចុងឆ្នាំ ២០២២​។ កាលពីថ្ងៃអង្គារ ទីភ្នាក់ងារវាយតម្លៃ Moody រំពឹងថា ភាគហ៊ុននឹងធ្លាក់ចុះស្របតាមគោលបំណងរបស់រដ្ឋាភិបាលចិន ប៉ុន្តែពួកគេបានចង្អុលបង្ហាញពីការធ្លាក់ចុះនៃការលក់ដីធ្លី។ វាមានន័យថា រដ្ឋាភិបាលក្នុងតំបន់អាចប្រឈមមុខនឹងបញ្ហាហិរញ្ញវត្ថុ ប្រសិនបើពួកគេមិនអាចគ្រប់គ្រងអ្វីដែលជាកត្តាជំរុញនៃប្រាក់ចំណូលលើសពីមួយភាគបី។

ស្របពេលដែលបញ្ហាទីផ្សារអចលនទ្រព្យមិនច្បាស់លាស់ លោកស្រី Loo មិនរំពឹងថានឹងមានការកើនឡើងគួរឱ្យកត់សម្គាល់ចំពោះសេដ្ឋកិច្ចដែលនៅសល់នោះទេ។ យ៉ាងណាមិញ ការធ្លាក់ចុះលំនៅដ្ឋានរបស់ចិនខុសពីសហរដ្ឋអាមេរិក អេស្បាញ ឬអៀរឡង់កាលពី ១០-១៥ ឆ្នាំមុន ហើយទំនងជាមិនបង្កឱ្យមានវិបត្តិហិរញ្ញវត្ថុធ្ងន់ធ្ងរទេ។ ក្នុងស្ថានភាពទាំងនោះ ការធ្លាក់ថ្លៃតម្លៃផ្ទះ ការបរាជ័យក្នុងការបញ្ចាំ និងការខ្ចីធនាគារត្រូវបានផ្សារភ្ជាប់គ្នា ប៉ុន្តែចិនមានភាពខុសពីគេដូចជា អំណាចនៃគោលនយោបាយ ធនាគារគ្រប់គ្រងដោយរដ្ឋ និងលក្ខខណ្ឌកម្ចីទិញផ្ទះកាន់តែតឹងរ៉ឹង។

អ្នកវិភាគផ្សេងទៀតក៏រំពឹងថា សេដ្ឋកិច្ចរបស់ចិននឹងដើរតាមផ្លូវរបស់ខ្លួន។ S&P Global Ratings បាននិយាយថា ពួកគេឃើញភាពស្រដៀងគ្នាមួយចំនួនរវាងស្ថានភាពរបស់ចិន និងការជាប់គាំងសេដ្ឋកិច្ចរបស់ជប៉ុន បន្ទាប់ពីវិបត្តិអចលនទ្រព្យចុងក្រោយនេះបានផ្ទុះឡើងក្នុងឆ្នាំ ១៩៩១។ យ៉ាងណាមិញ ចិនអាចបញ្ចៀសពីលទ្ធផលអវិជ្ជមានទាំងនេះបាន ដោយសារការអនុវត្តនូវបទប្បញ្ញត្តិ រួមជាមួយភាពរឹងមាំនៃវិស័យធនាគារ និងសាជីវកម្មរបស់ខ្លួន៕