ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ការធ្វើពិពិធកម្មសេដ្ឋកិច្ចគឺជាស្នូលនៃយុទ្ធសាស្ត្រកំណើនរបស់​កម្ពុជា ហើយមន្ទីរដែលស្ថិតនៅតាមបណ្តាខេត្ត ក្រុង គឺជាតួអង្គដ៏សំខាន់ក្នុងការជំរុញដំណើរការនេះទៅមុខ។ កាលលើកឡើងបែបននេះ កាលពីថ្ងៃទី១២ ខែសីហា ឆ្នាំ២០២៤ ក្នុងកិច្ចពិភាក្សាការងារជាមួយ មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តព្រៃវែង និងរាជធានីភ្នំពេញ ដោយផ្តោតលើតួនាទីសំខាន់របស់មន្ទីរក្នុងការអភិវឌ្ឍឧស្សាហកម្ម និងធុរកិច្ចក្នុងមូលដ្ឋាន។

ក្នុងន័យនេះ ឯកឧត្តម ហែម វណ្ណឌី បានលើកទឹកចិត្តថ្នាក់ដឹកនាំ និងមន្ត្រីទាំងអស់ឱ្យស្វែងយល់ស៊ីជម្រៅពីយុទ្ធសាស្ត្របញ្ចកោណដំណាក់កាលទី១ ជាពិសេសទាក់ទងនឹងអាណត្តិកិច្ចរបស់ក្រសួង ព្រមទាំងសេវាសាធារណៈសម្រាប់គាំទ្រវិស័យឯកជន។

ឯកឧត្តមរដ្ឋមន្ត្រីបានគូសបញ្ជាក់ថា៖

«ការធ្វើពិពិធកម្មសេដ្ឋកិច្ចគឺជាស្នូលនៃយុទ្ធសាស្ត្រកំណើនរបស់​កម្ពុជា ហើយមន្ទីរជាតួអង្គដ៏សំខាន់ក្នុងការជំរុញដំណើរការនេះទៅមុខ។ ការធ្វើ​ពិពិធកម្ម​ ពាក់ព័ន្ធនឹងក្រសួង-ស្ថាប័នជាច្រើន ប៉ុន្តែក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវា​នុវត្តន៍ មានតួនាទីស្នូលក្នុងការសម្របសម្រួលគ្រប់គ្រងការអភិវឌ្ឍវិស័យកម្មន្តសាល និងឧស្សាហកម្ម»។

ឯកឧត្តមក៏បានលើកឡើងពីសារៈសំខាន់នៃការពង្រឹងសមត្ថភាពរបស់មន្ទីរឧស្សាហកម្ម ក្នុងការផ្តល់ប្រឹក្សា​ដល់​​វិស័យ​ឯកជន ជាពិសេសទាក់ទងនឹងបច្ចេកវិទ្យា និងគ្រឿងម៉ាស៊ីនដែលលើកកម្ពស់គុណភាព និង​ផលិត​ភាព។ ជាមួយគ្នានេះ ក៏ត្រូវមានបង្កើតយន្តការចែករំលែកទិន្នន័យក្នុងចំណោមមន្ទីរក្រោមរដ្ឋបាលរាជធានី-ខេត្ត ក៏ដូចជាការចែករំលែកទិន្នន័យជាមួយក្រសួង ដោយធ្វើយ៉ាងណាឱ្យមានលំហូរទិន្នន័យ​កាន់​តែប្រសើរ ដើម្បីលើកកម្ពស់ការធ្វើសេចក្តីសម្រេច​ចិត្ត និងគោលនយោបាយដែលមានព័ត៌មានច្បាស់លាស់។

ឯកឧត្តមបាន​ប្រៀប​ធៀបការបណ្តុះធុរកិច្ចទៅនឹងការលូតលាស់របស់ដើមឈើថា៖

«យើងមិនត្រូវទៅអង្រួនដើមឈើពេលដែលវាទើបចាប់ផ្តើមលូតលាស់នោះទេ។ អ្វីដែលយើងត្រូវធ្វើគឺពូនជ្រុំ ស្រោចទឹក ដាក់ជី និងថែទាំវាឱ្យបានទៀងទាត់។ ក្រសួងកំពុងជំរុញអភិក្រមគាំទ្រធុរកិច្ច មិនមែនរំខានទេ នៅពេលដែលមន្ត្រីចុះជួបវិស័យឯកជនក្នុងមូលដ្ឋាន។ អភិក្រមនេះ ឆ្លុះបញ្ចាំងកំណែទម្រង់របស់រាជរដ្ឋាភិបាល ដែលបានលុបបំបាត់ការចុះអធិការកិច្ច​ច្រើន​លើក ដោយបង្កើតយន្តការអធិការកិច្ចអន្តរក្រសួងរួម ដែលមានការសម្របសម្រួល និងធ្វើ​ឡើង​តែ​មួយ​ដង​ក្នុង​មួយ​ឆ្នាំ»។

ទន្ទឹមនឹងនោះ ឯកឧត្តមរដ្ឋមន្ត្រី បានលើកទឹកចិត្តឱ្យមន្ទីរទាំងពីរ ស្វែងរកឱកាស និងកំណត់សក្តានុ​ពល​បង្កើតតម្លៃ​បន្ថែមនៅក្នុងភូមិសាស្ត្ររបស់ខ្លួន ដោយលើឧទាហរណ៍នៃតម្រូវការវត្ថុធាតុដើមក្នុងវិស័យកាត់ដេរ ដូចជា ក្រណាត់ អំបោះ ឡេវ និងធាតុចូលផលិតកម្មផ្សេងទៀត ព្រមទាំងលើកទឹកចិត្តឱ្យមន្ទីរប្រមូល និងចែក​រំលែក​ទិន្នន័យនេះឱ្យបានទូលំទូលាយ។

ចំពោះការដឹកនាំស្ថាប័ន ឯកឧត្តមបានលើកឡើងពីការគ្រប់គ្រងខ្លួនឯង ដូចជាការមានវិន័យផ្ទាល់ខ្លួន ការអភិវឌ្ឍសមត្ថភាពជាបន្តបន្ទាប់ និងការថែរក្សាសុខភាព។ ឯកឧត្តមក៏បានសង្កត់ធ្ងន់លើសារៈសំខាន់នៃការផ្តល់ភាពយុត្តិធម៌ និងឱកាសស្មើគ្នា ដោយកំណត់តួនាទី និងទំនួលខុសត្រូវច្បាស់លាស់ ព្រមទាំងភាពចាំបាច់នៃការរៀបចំផែនការបន្តវេន្តឱ្យបានត្រឹមត្រូវ ដើម្បីធានាបាននូវនិរន្តរភាព និង​ប្រសិទ្ធភាពយូរ​អង្វែង​របស់ស្ថាប័ន៕