សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅប្រភពព័ត៌មានពី CNBC បានរាយការណ៍ថា កំណើនសេដ្ឋកិច្ចរបស់អារ៉ាប៊ីសាអូឌីតកើនឡើងយឺតនៅក្នុងត្រីមាសទី២ ដោយសារការកាត់បន្ថយទិន្នផលប្រេងឆៅ និងការធ្លាក់ចុះនៃតម្លៃប្រេង។
កាលពីសប្តាហ៍មុនកន្លងទៅនេះ អាជ្ញាធរទូទៅសម្រាប់ស្ថិតិរបស់អារ៉ាប៊ីសាអូឌីតបានបង្ហាញថា ផលិតផលក្នុងស្រុកសរុប (GDP) របស់អារ៉ាប៊ីសាអូឌីតនៅត្រីមាសទី២ កើនឡើងយឺតត្រឹម ៨,៧ ភាគរយប៉ុណ្ណោះ បើធៀបទៅនឹងរយៈពេលដូចគ្នាកាលពីឆ្នាំ២០២២ ដែលកើនឡើងដល់ ១១,២ ភាគរយ។ នៅឆ្នាំ២០២៣ នេះ តម្លៃទំនិញមានឥទ្ធិពលតិចជាងមុនដល់សេដ្ឋកិច្ចអារ៉ាប៊ីសាអូឌីត ដោយសារតម្លៃប្រេងបន្តធ្លាក់ចុះក្រោម ៨០ ដុល្លារក្នុងមួយបារ៉ែល ចំពេលមានការព្រួយបារម្ភអំពីម៉ាក្រូសេដ្ឋកិច្ច ការធ្លាក់ចុះនៃតម្រូវការ និងការងើបឡើងវិញនៃសេដ្ឋកិច្ចក្រោយកូវីដ-១៩។
ទន្ទឹមនឹងនេះ អារ៉ាប៊ីសាអូឌីតកំពុងកាត់បន្ថយផលិតកម្មប្រេងឆៅដោយស្ម័គ្រចិត្តបន្ថែមទៀត ដែលត្រូវបានយល់ព្រមដោយសមាជិកមួយចំនួននៃអង្គការនៃប្រទេសនាំចេញប្រេង (OPEC) និងសម្ព័ន្ធមិត្ត (OPEC+) ផងដែរ។ សមាជិកនៃ OPEC + មួយចំនួនកំពុងអនុវត្តការកាត់បន្ថយផលិតកម្មសរុប ១,៦៦ លានបារ៉ែលក្នុងមួយថ្ងៃរហូតដល់ចុងឆ្នាំ២០២៤ ដោយអារ៉ាប៊ីសាអូឌីតនឹងកាត់បន្ថយទិន្នផលដោយស្ម័គ្រចិត្ត ១ លានបារ៉ែលក្នុងមួយថ្ងៃក្នុងខែកក្កដា និងសីហានេះ។ រុស្សីក៏កំពុងកាត់បន្ថយការនាំចេញប្រេងឆៅរបស់ខ្លួនចំនួន ៥ សែនបារ៉ែលក្នុងមួយថ្ងៃនៅខែសីហានេះផងដែរ។
លើសពីនេះផងដែរ អារ៉ាប៊ីសាអូឌីតមានបំណងចង់ឲ្យតម្លៃប្រេងឡើងថ្លៃដល់ ៩០ ដុល្លារក្នុងមួយបារ៉ែល ដើម្បីបន្តផែនការចំណាយលើវិស័យសាធារណៈរបស់ខ្លួនសម្រាប់បង្កើតកម្មវិធី Vision 2030 ។ វាក៏អាស្រ័យលើរយៈពេលដែលអារ៉ាប៊ីសាអូឌីតប្រកាន់ខ្ជាប់នូវការកាត់បន្ថយដោយស្ម័គ្រចិត្តផងដែរ ដោយសារការធ្លាក់ចុះនៃតម្លៃប្រេងបានធ្វើឲ្យផលិតផលក្នុងស្រុកសរុប (GDP) របស់ខ្លួនក្នុងត្រីមាសទី២នេះធ្លាក់ចុះ។ ដូច្នោះហើយការឡើងថ្លៃតម្លៃប្រេងប្រហែលអាចជំរុញឲ្យសេដ្ឋកិច្ចអារ៉ាប៊ីសាអូឌីតងើបឡើងវិញ។ មិនត្រឹមតែប៉ុណ្ណោះ វិស័យមិនមែនប្រេងរបស់អារ៉ាប៊ីសាអូឌីតក៏បានធ្លាក់ចុះផងដែរ ដោយអ៊ីដ្រូកាបូនបានធ្លាក់ចុះ ៤,២ ភាគរយនៃផលិតផលក្នុងស្រុកសរុបមិនមែនប្រេងនៅក្នុងត្រីមាសទី២នេះ ដោយសារវាទទួលរងនូវផលប៉ះពាល់ពីតម្លៃទាបនៃប្រេងឆៅពិភពលោក និងការកាត់បន្ថយផលិតកម្មប្រេងដោយស្ម័គ្រចិត្ត។ កាលពីឆ្នាំមុនកន្លងទៅនេះ តម្លៃប្រេងបានឡើងថ្លៃ ដោយសារសង្គ្រាមរវាងរុស្ស៊ី-អ៊ុយក្រែន និងការដាក់ទណ្ឌកម្មមកលើរុស្ស៊ីបានប៉ះពាល់ដល់អ្នកប្រើប្រាស់នៅលោកខាងលិចជាច្រើន។ ក្នុងកំឡុងពេលនោះ អារ៉ាប៊ីសាអូឌីត ដែលជាប្រទេសនាំចេញប្រេងធំមួយបំផុតរបស់ពិភពលោកទទួលបានអត្ថប្រយោជន៍ជាច្រើនដូចជា ការឡើងថ្លៃតម្លៃប្រេង និង ការកើនឡើងនៃតម្រូវការសម្រាប់ប្រេងឆៅផ្ទាល់របស់ខ្លួន។
កាលពីឆ្នាំមុនដដែលនោះ មូលនិធិរូបិយវត្ថុអន្តរជាតិ IMF បានហៅទីក្រុងរីយ៉ាដថាជាសេដ្ឋកិច្ច G20 ដែលរីកលូតលាស់លឿនបំផុតនៅឆ្នាំ ២០២២ ជាមួយនឹងកំណើនសេដ្ឋកិច្ចសរុបចំនួន ៨,៧ ភាគរយ។ យ៉ាងណាមិញ កាលពីសប្តាហ៍មុនកន្លងទៅនេះ IMF បានបង្ហាញពីការធ្លាក់ចុះរបស់អារ៉ាប៊ីសាអូឌីត និង បានកាត់បន្ថយការព្យាករណ៍កំណើន GDP របស់ទីក្រុងរីយ៉ាដពី ៨,៧ ភាគរយក្នុងឆ្នាំ ២០២២ មកនៅត្រឹម ១,៩ ភាគរយប៉ុណ្ណោះសម្រាប់ឆ្នាំ ២០២៣។ IMF បាននិយាយថា កាត់បន្ថយការព្យាករណ៍លើអារ៉ាប៊ីសាអូឌីតសម្រាប់ ២០២៣ ឆ្លុះបញ្ចាំងពីការកាត់បន្ថយផលិតកម្មរបស់ប្រទេសនេះ។ ទោះបីជាកំពុងប្រឈមនឹងបញ្ហានាពេលបច្ចុប្បន្នក៏ដោយ អារ៉ាប៊ីសាអូឌីតនៅតែមានឥទ្ធិពលសំខាន់នៅក្នុងទីផ្សារប្រេងពិភពលោក ខណៈដែលខ្លួននៅតែបន្តយកចិត្តទុកដាក់់លើដំណើរការសេដ្ឋកិច្ចយ៉ាងដិតដល់ទាំងក្នុងស្រុក និងក្រៅស្រុក៕
Account
Security
Favourite Content