ភ្នំពេញ ៖ ធ្វើការភ្លេចៗខ្លួន ឥឡូវជិតដល់ថ្ងៃបុណ្យចូលឆ្នាំថ្មីប្រពៃណីជនជាតិចិនទៀតហើយ ដូច្នេះ សម្រាប់បងប្អូនដែលជាអ្នករស់នៅរាជធានីភ្នំពេញ ដែលចង់ចេញទៅកម្សាន្តនៅតំបន់ជាយក្រុង ឬតំបន់ដែលជិតរាជធានីភ្នំពេញ ដើម្បីទទួលទានអាហារជុំគ្នាជាមួយបងប្អូន មិត្តភក្រ្ត ឬសមាជិកក្រុមគ្រួសារ អាចពិចារណាជាមួយទីកន្លែងសម្រាកកម្សាន្តចំនួន ៥កន្លែង ដែល AMS Economy លើកយកមកបង្ហាញជូននៅខាងក្រោមនេះ។

១.រមណីយដ្ឋានកៀនស្វាយក្រៅ ៖ មានទីតាំងនៅជាយក្រុងភាគខាងកើតរាជធានីភ្នំពេញ​ ហើយបើគេធ្វើដំណើរចេញពីភ្នំពេញកាត់តាមស្ពានកោះពេជ្រ ឆ្ពោះទៅកោះនរា មានចម្ងាយត្រឹមជាង២០គីឡូម៉ែត្រប៉ុណ្ណោះនឹងបានទៅដល់ហើយ។ ប៉ុន្តែបើគេធ្វើដំណើរតាមស្ពានព្រះមុន្នីវង្ស កាត់តាមតាមផ្លូវជាតិលេខ១ ចម្ងាយជាង៣០គីឡូម៉ែត្រឯណោះ។ ពេលទៅដល់ទីនោះ លោកអ្នកនឹងបានឃើញភ្ញៀវជាតិ ភ្ញៀវអន្តរជាតិ ជាច្រើនមកជួបជុំគ្នាលេងកម្សាន្តយ៉ាងកុះករ។ មូលហេតុដែលអ្នកទេសចរចង់ទៅលេងតំបន់នោះ គឺដោយសារនៅជិតក្រុងភ្នំពេញ ងាយស្រួលធ្វើដំណើរ និងមានអាហារឆ្ងាញ់ៗរបស់អ្នកភូមិដាក់លក់ច្រើនមុខ តម្លៃសមរម្យ ជាពិសេសមានខ្យុសសម្រាប់អង្គុយនៅលើដី ខ្យុសបណ្តែតទឹកស្រូបខ្យល់ជំនោរទន្លេត្រជាក់ៗទៀតផង។ ដោយឡែក សម្រាប់អ្នកដែលបានទៅដល់ទៅនោះតែងមិនភ្លេចមាន់ស្រែអាំង ឬត្រីអាំងជាមួយអម្ពិលខ្ចីបុកនោះទេ។

២.រមណីយដ្ឋានស្អាងភ្នំ៖ នៅភាគខាងត្បូងរាជធានីភ្នំពេញ បើគេធ្វើដំណើរតាមផ្លូវជាតិលេខ២១A មានចំងាយប្រមាណជាង៣០គីឡូម៉ែត្រប៉ុណ្ណោះ នឹងបានទៅដល់ទីនោះហើយ។ បច្ចុប្បន្នរមណីយដ្ឋានស្អាងបានកែប្រែមុខមាត់គួរជាទីទាក់ទាញ ដោយសារតែអាជ្ញាធរបានសាងសង់ជណ្តើរយន្តឡើងភ្នំ ជាជណ្តើរយន្តឡើង​ភ្នំដំបូងគេនៅកម្ពុជាតែម្តង ក្រៅពីនោះក៏មានស្រះទឹកដ៏ធំអាចជិះទាទឹកលេងកម្សាន្តផងដែរ។ នៅពេលដើរលេងហត់ លោកអាចអង្គុយក្នុងខ្យុស ឬ សម្រាកលេងលើអង្រឹង ហើយអាចកម្ម៉ង់អាហារមានតាមចំណង់ចំណូលចិត្ត ជាពិសេសមាន់ស្រែដុត ឆ្ងាញ់ស្រក់ទឹកមាត់តែម្តង។

៣.រមណីយដ្ឋានភ្នំតាម៉ៅ៖ នៅភាគខាងត្បូងរាជធានីភ្នំពេញ មានចម្ងាយប្រមាណជា៤០គីឡូម៉ែត្រដោយធ្វើដំណើរតាមផ្លូវជាតិលេខ២។ ពេលទៅដល់រមណីយដ្ឋាននេះ លោកអ្នកនឹងប្លែកភ្នែកពេលឃើញសួនសត្វដ៏ធំមានចិញ្ចឹមសត្វជាច្រើនប្រភេទរាប់មិនអស់ ទាំងសត្វស្លាប សត្វបក្សី សត្វព្រៃ ស្វា ដំរី ខ្លាឃ្មុំ ខ្លាធំជាដើម….។ល។ ក្រៅតែពីដើរមើលកម្សាន្តតាមព្រៃព្រឹក្សា បងប្អូនក៏អាចរកទិញអាហារទទួលទានឆ្ងាញ់ៗបានផងដែរ ពិសេសគឺកង្កែបបោប ដែលជាអាហារប្រចាំតំបន់។

៤.រមណីយដ្ឋានអំពែភ្នំ៖ ស្ថិតនៅភាគខាងលិច មានចម្ងាយជាង៣០គីឡូម៉ែត្រពីរាជធានីភ្នំពេញ ឬអាចធ្វើដំណើរតាមផ្លូវល្បឿនលឿនក៏បាន។ នៅពេលទៅជិតដល់ក្រុងច្បារមនទីរួមខេត្តកំពង់ស្ពឺ រួចបត់ឆ្វេងប្រមាណជា០២គីឡូម៉ែត្រ លោកអ្នកនឹងទៅដល់រមណីយដ្ឋានអំពែភ្នំ ដើរលេងមើលហ្វូងសត្វស្វា និងដើរឆ្លងស្ពានខ្សែរកាបឆ្ពោះទៅត្រើយម្ខាងយ៉ាងសប្បាយរីករាយក្រៃលែង រួចទស្សនាសត្វស្រុក សត្វព្រៃ និងអង្គុយក្រោមដើរឈើរត្រជាក់ៗ ទទួលអាហារឆ្ងាញ់ អង្គុយកម្សាន្តជុំបងប្អូនគួរជាទីរីករាយ។​ នៅទីនោះ លោកអ្នកអាចស្វែងរកកូនឃ្មុំអាំងអំបិលម្ទេស ដែលជាអាហារប្រចាំតំបន់ប្លែកមាត់តែម្តង។

៥.រមណីយដ្ឋានភ្នំឧដុង្គ៖ ស្ថិតនៅភាគខាងជើងភាខាងលិចរាជធានីភ្នំពេញ ជារមណីយដ្ឋានប្រវត្តិសាស្រ្ត កសាងឡើងក្នុងសតវត្សរ៍ទី១៧ នៃគ្រឹះសករាជ ក្នុងរជ្ជកាល​ព្រះបាទ សមេ្តចព្រះ ជ័យជេដ្ឋាទី២។ គេធ្វើដំណើរចេញពីភ្នំពេញតាមផ្លូវជាតិលេខ០៥ មានចម្ងាយប្រមាណជា៤០គីឡូម៉ែត្រ រួចបត់ឆ្វេងចូលតាមក្លោងទ្វារធំចម្ងាយប្រមាណ ២គីឡូម៉ែត្រ នឹងបានទៅដល់ទីនោះមិនខាន។ ពេលទៅដល់ លោកអ្នកនឹងឃើញមនុស្សម្នាអង្គុយជុំគ្នា ជាលក្ខណៈគ្រួសារ មិត្តភក្រ្ត ជាដើម ដោយខ្លះអង្គុយក្នុងខ្យុសដោយក្រាលកន្ទេល ខ្លះអង្គុយលើអង្រឹង និងហូបអាហារជុំគ្នាផងដែរ។ នៅទីនោះគេអាចដើរទិញម្ហូបអាហារតាមចំណង់ចំណូលចិត្ត ជាពិសេសក្តាមស្ងោរ ខ្យងអាំងជ្រលក់អំបឹលម្រេច ដែលជាអាហារពេញនិយមប្រចាំតំបន់ផងដែរ៕ អត្ថបទ ៖ វិន ឈុនហ៊ាត