សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាព្រឹកថ្ងៃទី០៩ ខែធ្នូ ឆ្នាំ២០២៤នេះ ក្រសួងរៀបចំដែនដី នគរូបនីយកម្ម និងសំណង់ បានរៀបចំនូវវគ្គបណ្ដុះបណ្ដាលមួយស្ដីអំពីការដាក់ឱ្យប្រើប្រាស់សេវាសាធារណៈចំនួន៤ គឺសេវាលក់ផ្ដាច់ អំណោយផ្ដាច់ ហ៊ីប៉ូតែក និងបញ្ចាំ តាមប្រព័ន្ធអនឡាញ ជូនដល់មន្ទីររៀបចំដែនដី នគរូបនីយកម្ម សំណង់ និងសុរិយោដី អង្គភាពច្រកចេញចូលតែមួយ និងមន្ត្រីភូមិបាលក្រុង ស្រុក ខណ្ឌ ក្នុងភូមិសាស្រ្តរាជធានី-ខេត្តទាំង២៥ ក្រោមអធិបតី លោកជំទាវ សេង សុមេត្តា រដ្ឋលេខាធិការ, ឯកឧត្តម គិត ច័ន្ទគ្រឹស្នា ប្រធានក្រុមការងារបរិវត្តឌីជីថល ក្រសួងរៀបចំដែនដី នគរូបនីយកម្ម និងសំណង នៅទីស្ដីការក្រសួង។
ការធ្វើទំនើបកម្មប្រព័ន្ធបច្ចេកវិទ្យាព័ត៌មាន និងការធ្វើឌីជីថលភាវូបនីយកម្មកិច្ចការសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ នាពេលនេះ គឺដើម្បីពង្រឹងប្រសិទ្ធភាពការងារ និងការផ្តល់សេវាសាធារណៈ ក្នុងគោលដៅឆ្ពោះទៅសម្រេចបាននូវគោលនយោបាយគន្លឹះ ក្នុងការចុះបញ្ជីដីបង្ហើយ សេវាគាប់ចិត្ត និងបរិយាកាសគ្មានវិវាទ ហើយក៏ដើម្បីឆ្លើយតបនឹងការងារអាទិភាព ក្នុងយុទ្ធសាស្រ្តបញ្ចកោណ ដំណាក់កាលទី១ និងស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥។
យ៉ាងណាមិញ ក្នុងការអនុវត្តនូវគោលនយោបាយសេវាគាប់ចិត្ត ក្រសួងបាន និងកំពុងប្រែក្លាយការផ្ដល់សេវាសាធារណៈទៅជាប្រព័ន្ធឌីជីថល ដើម្បីធានាបាននូវប្រសិទ្ធភាពនៃការផ្ដល់សេវាលឿនរហ័ស តម្លាភាព ប្រសិទ្ធភាព ភាពងាយស្រួល និងជឿទុកចិត្ត តួយ៉ាងដូចជាសេវាលក់ផ្ដាច់ អំណោយផ្ដាច់ ហ៊ីប៉ូតែក និងបញ្ចាំ ដែលបានប្រតិភូកម្មឱ្យមន្ទីររៀបចំដែន នគរូបនីយកម្ម សំណង់ និងសុរិយោដី រាជធានី-ខេត្ត។
ទន្ទឹមនោះ រាជធានីភ្នំពេញ គឺជាទីតាំងដំបូងគេបង្អស់ ដែលសេវាសាធារណៈទាំង៤ខាងលើនេះត្រូវបានដាក់ឱ្យប្រើប្រាស់សាកល្បងតាមប្រព័ន្ធអនឡាញដោយជោគជ័យ កាលពីថ្ងៃទី៥ ខែសីហា ឆ្នាំ២០២៤ ហើយក៏បានបន្តដាក់ឱ្យប្រើប្រាស់ក្នុងភូមិសាស្រ្តខេត្តសៀមរាប កាលពីថ្ងៃទី១ ខែវិច្ឆិកា ឆ្នាំ២០២៤ កន្លងទៅ។
គួរបញ្ជាក់ថា គិតត្រឹមខែធ្នូនេះ ប្រព័ន្ធលក់ផ្ដាច់ អំណោយផ្ដាច់ ហ៊ីប៉ូតែក និងបញ្ចាំ ដែលបានដាក់ឱ្យអនុវត្តជាផ្លូវការនៅរាជធានីភ្នំពេញ និងខេត្តសៀមរាប មានអ្នកចុះឈ្មោះប្រើសេវាសរុបចំនួន ១៨៦០គណនី ហើយមានការប្រើប្រាស់សេវាសាធារណៈអនឡាញនេះ សរុបចំនួន ១៣ ៧៥៧លើក។
ក្នុងនោះ ចាប់ពីខែសីហា ដល់ខែធ្នូនេះ ក្នុងភូមិសាស្រ្តរាជធានីភ្នំពេញ មានការប្រើប្រាស់ចំនួន ១៣ ៥៤៩លើក ដោយសេវាលក់/អំណោយផ្ដាច់មានចំនួន ៧៦០៤លើក ហ៊ីប៉ូតែកចំនួន ៤២៦៩លើក និងលុបបន្ទុកចំនួន ១៦៧៦លើក។ ចំណែកនៅខេត្តសៀមរាប ចាប់ពីដើមខែវិច្ឆិកាមក មានការប្រើប្រាស់សរុបចំនួន ២០៨លើក ដោយសេវាលក់/អំណោយផ្ដាច់មានចំនួន ១០៩លើកហ៊ីប៉ូតែកចំនួន ៧១លើក និងលុបបន្ទុកចំនួន ២៨លើក៕
Account
Security
Favourite Content