ថ្វីត្បិតតែរដ្ឋាភិបាលប៉េកាំងមិនអាចធ្វើការងារដោយបើកជំហក្នុងការគាំទ្រដល់រុស្ស៊ីចំពោះការសម្រេចចិត្តធ្វើប្រតិបត្តិការពិសេសដោយយោធាទៅលើប្រទេសអ៊ុយក្រែនពិតមែន ប៉ុន្តែ ចិនក៏មិនបានបង្ហាញថាខ្លួនមានសម្ពាធចំពោះជំហរបស់អាមេរិកមកលើរុស្ស៊ីនោះដែរ។
គិតចាប់តាំងតែពីពេលដែលជម្លោះបានផ្ទុះឡើងនៅក្នុងប្រទេសអ៊ុយក្រែនមក ចិន និងរុស្ស៊ី នៅតែបន្ត និងពង្រឹងកិច្ចសហប្រតិបត្តិការផ្នែកយោធាកាន់តែជិតស្និទ្ធឡើងដោយសមយុទ្ធយោធារួមគ្នាសរុបចំនួន៧ដងមកហើយដែលបានរៀបចំឡើង ហើយចុងក្រោយទើបតែបានបញ្ចប់កាលពីថ្ងៃទី២០ ខែកក្កដាកន្លងទៅនេះប៉ុណ្ណោះ។ ចំនួននៃការធ្វើសមយុទ្ធរួមគ្នាដើម្បីបង្ហាញសាច់ដុំទាំងនេះមានការកើនឡើងខ្ពស់ធៀបទៅនឹងពេលវេលាកាលពីអតីតកាលអស់រយៈពេលជាង២ទសវត្សរ៍មកហើយ។ នេះបើយោងតាមអត្ថបទដែលធ្លាប់បានចេញផ្សាយដោយ the Japan Times ។
គិតត្រឹមឆ្នាំ២០២២ប៉ុណ្ណោះ ចំនួនសមយុទ្ធយោធារវាងចិន និងរុស្ស៊ី មានចំណែកដល់ទៅ ២ ភាគ ៣ នៃចំនួនសមយុទ្ធយោធាសរុបដែលចិនបានសហការជាមួយនឹងកងកម្លាំងយោធាបរទេស ហើយក្រៅតែពីរុស្ស៊ីដែលជាគូប្រឆាំងរបស់អាមេរិកនោះរដ្ឋាភិបាលក្រុងប៉េកាំងក៏បានធ្វើសមយុទ្ធរួមជាមួយនឹងសត្រូវអាមេរិកផ្សេងទៀតដូចជាអ៊ីរ៉ង់ និងស៊ីរីផងដែរ។
លោក Alexander Korolev សាស្ត្រាចារ្យដ៏ល្បីល្បាញផ្នែកកិច្ចការងារនយោបាយ និងទំនាក់ទំនងអន្តរជាតិនៅសាកលវិទ្យាល័យ New South Wales ក្នុងប្រទេសអូស្ត្រាលីបានលើកឡើងថា ៖ លោកប្រធានាធិបតីចិន Xi Jinping មានហេតុផលគ្រប់គ្រាន់របស់លោកដើម្បីរក្សា និងបង្កើនយុទ្ធសាស្ត្ររបស់ចិនជាមួយរុស្ស៊ី ហើយនេះជាមធ្យោបាយដ៏មានប្រសិទ្ធភាពបំផុតក្នុងការទប់ទល់នឹងអំណាចរបស់សហរដ្ឋអាមេរិក។
គួរឲ្យដឹងដែរថា អស់រយៈពេលជាយូរមកហើយប្រទេសចិននៅតែបន្តដាក់សម្ពាធលើកោះតៃវ៉ាន់ ហើយលោក Xi បានប្តេជ្ញាទាមទារឲ្យបានទឹកដីនេះមកក្រោមការគ្រប់គ្រងរបស់រដ្ឋាភិបាលក្រុងប៉េកាំងវិញ ខណៈដែលរដ្ឋាភិបាលក្រុងវ៉ាស៊ិនតោននៅតែបង្ហាញជំហដូចគ្នាក្នុងការរក្សាការពារផែនការមួយនេះមិនឲ្យជោគជ័យឡើយ។ ទោះបីជាយ៉ាងណាក៏ដោយ ក្តីបារម្ភរបស់ចិនចុងក្រោយនេះគឺជាការបង្កើនវត្តមានយោធារបស់អាមេរិកនៅក្នុងតំបន់អាស៊ី ជាក់ស្តែងអាមេរិកទើបតែបានចុះហត្ថលេខាលើកិច្ចព្រមព្រៀងការពារជាតិជាមួយហ្វីលីពីន និងទើបតែបានបើកប្រតិបត្តិការមូលដ្ឋានមួយទៀតនៅលើកោះ Guam ជាដើម៕