សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជាជាប្រទេសដែលមានធនធានធម្មជាតិយ៉ាងសំបូរបែប ទាំងនៅក្នុងដី ក្នុងទឹក និងក្នុងបាតសមុទ្រ ដោយក្នុងនោះដែរធនធានរ៉ែ ក៏មានសក្ដានុពលខ្ពស់ក្នុងការទាក់ទាញក្រុមហ៊ុនដើម្បីរុករក និងស្វែងរកផងដែរនៅក្នុងប្រទេសនេះផងដែរ។ ជាក់ស្ដែងគ្រាន់តែក្នុងខេត្តក្រចេះមានក្រុមហ៊ុនរុករករ៉ែជាង៦០ក្រុមហ៊ុនទៅហើយដែលបាន និងកំពុងស្វែងរកនៅក្នុងខេត្តមួយនេះ ។
ឯកឧត្តម វ៉ា ថន អភិបាលខេត្តក្រចេះ បានមានប្រសាសន៍នៅក្នុងសន្និសីទសារព័ត៌មានមួយកាលពីព្រឹកថ្ងៃទី៣១ ខែមករា ឆ្នាំ២០២៣ នាទីស្ដីការគណរដ្ឋមន្ត្រីឱ្យដឹងថា បច្ចុប្បន្ននេះខេត្តក្រចេះ មានក្រុមហ៊ុនធ្វើអាជីវកម្មស្វែងរក និងរុករករ៉ែចំនួន៦៤ក្រុមហ៊ុនស្មើនឹង៦៥អាជ្ញាបណ្ណ។ ក្រៅពីក្រុមហ៊ុនរុករករ៉ែ ក្រុមហ៊ុនស្វែងរករ៉ែ នៅខេត្តក្រចេះ ក៏មានក្រុមហ៊ុនស្រាវជ្រាវរ៉ែលោហមានចំនួន៥ក្រុមហ៊ុន ស្មើនឹង៦អាជ្ញាបណ្ណ ក្រុមហ៊ុនធ្វើអាជីវកម្មរ៉ែមាសមានចំនួន១ក្រុមហ៊ុន ស្មើនឹង១អាជ្ញាបណ្ណ ក្រុមហ៊ុនអាជីវកម្មថ្មក្រានីត អណ្ដូងរ៉ែបើក ការដ្ឋានវាយថ្មចំនួន២៥ក្រុមហ៊ុនស្មើនឹង២៨អាជ្ញាបណ្ណ ក្រុមហ៊ុនធ្វើអាជីវកម្មគ្រួសខ្សាច់មាន៨ក្រុមហ៊ុនស្មើនឹង៨អាជ្ញាបណ្ណ។
ឯកឧត្តមបានបន្តថា ៖
“ជាការកត់សម្គាល់នៅក្នុងខេត្តក្រចេះមានក្រុមហ៊ុនធ្វើអាជីវកម្មរ៉ែមាសមួយក្រុមហ៊ុនកំពុងធ្វើអាជីវកម្ម ដែលបានចម្រាញ់មាសសុទ្ធចាប់តាំងពីខែតុលា២០២២មកដល់ពេលនេះបានចំនួន ៦៧,៥៣គីឡូក្រាមហើយ។ តាមរយៈក្រុមហ៊ុនធ្វើអាជីវកម្មរ៉ែទាំងនេះក៏បានផ្ដល់ចំណូលជាថវិកាដល់រាជរដ្ឋាភិបាលមួយចំនួនផងដែរ ហើយក្រសួងរ៉ែនិងថាមពលក៏បានយកចិត្តទុកដាក់លើការធ្វើអាជីវកម្មរ៉ែទាំងនេះពីសំណាក់ក្រុមហ៊ុនទទួលបានអាជ្ញាបណ្ណធ្វើអាជីវកម្ម”
បើតាមមន្ត្រីជាន់ខ្ពស់នៃក្រសួងរ៉ែ និងថាមពល បានថ្លែងនៅក្នុងវេទិកាសាធារណមួយកាលពីពេលថ្មីៗនេះឱ្យដឹងថា ចំណូលថវិកាដែលបានមកពីអាជីវកម្មរ៉ែមាសក្នុងឆ្នាំ២០២២កន្លងទៅមានចំនួនជាង១៥លានដុល្លារអាមេរិកទាំងចំណូលសួយសា និងពន្ធអាករ ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក៏បានលើកឡើងផងដែរថា កម្ពុជាជាប្រទេសដែលសំបូរទៅដោយធនធានធម្មជាតិសំបូរបែបប៉ុន្តែកម្ពុជានៅមិនទាន់បានទាញយករ៉ែទាំងនោះមកប្រើប្រាស់ជាប្រយោជន៍បានទូលំទូលាយនៅឡើយទេ ។ កត្តាដែលសំខាន់ដែលកម្ពុជាយើងមិនទាន់មានធនធានមនុស្សគ្រប់គ្រាន់ក្នុងការទាញយកធនធានរ៉ែមកអភិវឌ្ឍន៍ប្រទេស ។
សម្ដេចតេជោ បានមានប្រសាសន៍បន្តថា ប្រទេសមួយចំនួនដូចជាសិង្ហបុរី មិនមានធនធានធម្មជាតិរ៉ែអ្វីនោះទេ តែដោយសារសិង្ហបុរីបានផ្ដោតលើការអប់រំធនធានមនុស្សរបស់គេកាន់តែខ្លាំង និងមានគុណភាពនោះ ទើបសិង្ហបុរីមានការអភិវឌ្ឍ និងក្លាយជាប្រទេសអ្នកមានក្នុងតំបន់អាស៊ាន និងពិភពលោក ៕
Account
Security
Favourite Content