សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រចេះ ៖ តំបន់សេដ្ឋកិច្ចពិសេសមួយបានបង្កើតឡើងនៅក្នុងស្រុកស្នួលខេត្តក្រចេះ បាន និងកំពុងទាក់ទាញក្រុមហ៊ុនវិនិយោគជាច្រើនមកបណ្ដាក់ទុន ជាពិសេសក្រុមហ៊ុនមកពីប្រទេសចិន ជាក់ស្ដែងមានក្រុមហ៊ុន២ ដែលកំពុងធ្វើសកម្មភាព វិនិយោគនៅក្នុងតំបន់សេដ្ឋកិច្ចពិសេសមួយនេះ គឺរោងចក្រផលិតសំបកកង់ឡាន និងរោងចក្រផលិតបន្ទះសូឡា ។
លោក Zhang Lu Ze នាយកគ្រប់គ្រងនៃតំបន់សេដ្ឋកិច្ចពិសេសយូប៊ីអ៊ីស្នួល ក្នុងស្រុកស្នួល ខេត្តក្រចេះ បានមានប្រសាសន៍ថា ការវិនិយោគលើតំបន់សេដ្ឋកិច្ចពិសេសនៅក្នុងស្នួល ខេត្តក្រចេះ នេះ គឺទទួលបានការគាំទ្រយ៉ាងខ្លាំងពីរាជរដ្ឋាភិបាល ដូច្នេះយើងមិនមានអ្វីជាបញ្ហាក្នុងការដំណើរការនោះទេ ដោយរហូតមកដល់ពេលនេះ ដំណើរការវិនិយោគលើតំបន់សេដ្ឋកិច្ចបានរួចរាល់ និងកំពុងទាក់ទាញការវិនិយោគពីខាងក្រៅប្រទេសជាបន្តបន្ទាប់ ។
លោកបន្តថា ក្រុមហ៊ុនវិនិយោគលើតំបន់សេដ្ឋកិច្ចពិសេសនេះ បានសាងសង់ហេដ្ឋារចនាសម្ព័ន្ធរួចរាល់ នូវផ្លូវ ទឹក ភ្លើងអគ្គិសនី ដោយបានចំណាយថវិកាប្រមាណ១៥០លានដុល្លារអាមេរិក ដូច្នេះហើយនៅពេលក្រុមហ៊ុនវិនិយោគចូលមកដល់តំបន់សេដ្ឋកិច្ចពិសេសនេះ មិនពិបាកក្នុងការរៀបចំស្មុគស្មាញនោះទេ ព្រោះខាងតំបន់បានរៀបចំរួចរាល់ជូនទៅហើយ ។
លោកបានបន្តទៀតថា បច្ចុប្បន្ននេះ មានក្រុមហ៊ុនជាច្រើនបាននិងកំពុងវិនិយោគនៅក្នុងតំបន់សេដ្ឋកិច្ចពិសេសយូប៊ីអ៊ី ប៉ុន្តែមានក្រុមហ៊ុនធំៗគួរឱ្យកត់សម្គាល់ចំនួន៣ រួមមានក្រុមហ៊ុនផលិតសំបកកង់ឡាន ចំនួន២ និងក្រុមហ៊ុនផលិតបន្ទះសូឡា ដោយបាននិងកំពុងផ្ដល់ឱកាសការងារជាច្រើនដល់ពលរដ្ឋកម្ពុជា និងបានរួមចំណែកខ្ពស់ដល់ការនាំចេញរបស់កម្ពុជាទៅកាន់ទីផ្សារអន្តរជាតិ ។
បើតាមលោក Zhang Lu Ze បញ្ជាក់ថា សម្រាប់ទំនិញនាំចេញនាំចូលក្នុងតំបន់សេដ្ឋកិច្ចពិសេសគឺធ្វើឡើងតាមច្រកព្រំដែនកម្ពុជាវៀតណាម ដោយទំនិញនាំចូលពីប្រទេសចិន ដើម្បីកែច្នៃ និងផលិតហើយនាំចេញទៅកាន់បណ្ដាប្រទេសនានាលើទីផ្សារវិញតាមច្រកព្រំដែនកម្ពុជា វៀតណាម ព្រោះតែច្រកនេះនៅជិតនិងងាយស្រួលដឹកចេញចូល បើប្រៀបធៀបនឹងកំពង់ផែស្វយ័តក្រុងព្រះសីហនុ ។
បច្ចុប្បន្ន តំបន់សេដ្ឋកិច្ចពិសេសយូប៊ីអ៊ីស្នួល មានក្រុមហ៊ុនចំនួន ១៤ហើយ ដែលកំពុងវិនិយោគផ្នែកកែច្នៃ និងផលិតឧស្សាហកម្ម កែច្នៃផលិតផលកសិកម្ម ថាមពលពន្លឺព្រះអាទិត្យថ្មី ផលិតផលកៅស៊ូ និងសំបកកង់ ការបោះពុម្ពសម្លៀកបំពាក់ និងការជ្រលក់ពណ៌ ពាណិជ្ជកម្ម និងដឹកជញ្ជូនជាមួយនឹងទុនវិនិយោគសរុបប្រមាណ១,១ពាន់លានដុល្លារ។
តាមគោលការណ៍និងផែនការរបស់រាជរដ្ឋាភិបាលតាំងពីអាណត្តិទី៦កន្លង បានជំរុញឱ្យមានការសាងសង់តំបន់សេដ្ឋកិច្ចពិសេសនៅតាមព្រំដែនកម្ពុជានិងប្រទេសជិតខាង ដោយជំរុញឱ្យកសាងផ្លូវទៅកាន់ព្រំដែនឱ្យបានល្អដើម្បីសម្រួលដល់ការនាំចូលវត្ថុធាតុដើមដើម្បីផលិតនិងនាំចេញត្រលប់ទៅកាន់ទីផ្សារអន្តរជាតិ ។
បើតាមការកត់សម្គាល់បានបង្ហាញឱ្យឃើញពីកំណើននៃការបង្កើតតំបន់សេដ្ឋកិច្ចពិសេសថ្មីៗនៅក្នុងប្រទេសកម្ពុជា ដើម្បីទាក់ទាញក្រុមហ៊ុនវិនិយោគថ្មីៗមកពីបរទេសជាពិសេសនៅបណ្ដាខេត្តមួយចំនួន ដូចជាស្វាយរៀង ព្រះសីហនុ កោះកុង បន្ទាយមានជ័យ ក្រចេះ និងកំពង់ស្ពឺជាដើម ៕
Account
Security
Favourite Content