សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្របី ជាសត្វមួយប្រភេទដែលកសិករនិយមចិញ្ចឹម ជាពិសេសបងប្អូននៅតំបន់ស្រុកស្រែចំការដែលពីមុនគេយកក្របីប្រើជាកម្លាំងក្នុងការធ្វើភ្ជួររាស់ ប៉ុន្តែបច្ចុប្បន្ននេះ ទីផ្សារសត្វក្របីមានប្រជាប្រិយភាពកាន់តែខ្លាំងទាក់ទងនឹងការចិញ្ចឹមយកសាច់ និងលក់ពូជ។ ក្នុងនោះ ម្ចាស់កសិដ្ឋានចិញ្ចឹមក្របីម្នាក់ក៏បានអះអាងថាការចិញ្ចឹមក្របីគឺពិតជាមានភាពងាយស្រួល ព្រោះប្រើកម្លាំងតិច និងអាចទទួលបានផលច្រើន។
លោក ហុក ហាង ម្ចាស់កសិដ្ឋានចិញ្ចឹមក្របីធម្មជាតិមួយកន្លែងនៅខេត្តកំពង់ចាមបានមានប្រសាសន៍ថា ៖
“ការចិញ្ចឹមក្របីយកកូនគឺងាយស្រួលដោយសារសត្វក្របីងាយស្រួលចិញ្ចឹមជាងគោទៅទៀត ហើយមេក្របីអាចផ្ដល់កូនមួយឆ្នាំមួយរៀងរាល់ឆ្នាំ ហើយអត្រាមេក្របីដែលអាចផលិតកូនបានគឺខ្ពស់ មានន័យថាបើយើងចិញ្ចឹមក្របី ១០ក្បាល ក្នុងមួយឆ្នាំយ៉ាងហោចណាស់ក៏បានកូន ៨-៩ក្បាលដែរ។”
លោកបន្តថា ៖
“ការចិញ្ចឹមក្របី និងគោគឺខុសគ្នា ដោយសារតែក្របីយើងអាចប្រលែងវាទៅរកស៊ីស្មៅជាហ្វូងៗ មិនចាំបាច់មានខ្សែដូចគោទេ ហើយយើងចិញ្ចឹមតាមបែបធម្មជាតិគឺរឹតតែងាយស្រួល ហើយត្រូវការអ្នកមើលថែតិច។ តួយ៉ាង បច្ចុប្បន្នកសិដ្ឋានរបស់ខ្ញុំមានមេក្របីជាង ៧០ក្បាល ហើយទាំងមេទាំងបា ទាំងកូនសរុបមានប្រមាណជាង ១៨០ក្បាល ត្រូវការអ្នកមើលថែតែ ២នាក់ប៉ុណ្ណោះ។”
ពាក់ព័ន្ធនឹងការចិញ្ចឹមវិញ គឺគេលែងក្របីឱ្យស៊ីស្មៅនៅវាលស្រែ ហើយពេលក្របីផើមក៏មិនចាំបាច់មើលថែច្រើននោះដែរ។ ក្រៅពីនេះ អ្វីដែលគេត្រូវយកចិត្តទុកដាក់គឺកត្តាជំងឺដែលអាចកើតឡើងចំពោះក្របីរួមមានជំងឺសារទឹក ដែលជាជំងឺឆ្លង ពុំអាចព្យាបាលបាន និងជំងឺអុតក្ដាម ដែលតម្រូវឱ្យចាក់វ៉ាក់សាំងការពារជំងឺទាំងនេះពីរដងក្នុងមួយឆ្នាំ ដោយចាក់ក្នុងរយៈពេលឆ្លាស់គ្នាប្រមាណ ៣ខែម្ដង។
លោកបន្ថែមទៀតថា ដើម្បីទទួលបានកូនក្របីល្អៗ គេត្រូវរើសយកមេក្របីណាដែលនៅក្មេង និងមានមាឌធំ ហើយចៀសវាងមេចាស់ដែលគេអាចសម្គាល់បានដោយពុំមានរោមនៅស្លឹកត្រចៀក ហើយស្នែងមានគ្រលាក់។ ក្នុងនោះ សម្រាប់តម្លៃមេពូជប្រមាណ ១០លានរៀលក្នុងមួយក្បាល ជាប្រភេទមេធំ ពូជល្អ និងអាចផលិតកូនបានដល់ទៅជា ១០ដង។
ដោយឡែក បាក្របីក៏ត្រូវជ្រើសរើសយកបាណាដែរធំ ហើយសម្រាប់សកិដ្ឋាននេះមានមេ៧០ក្បាល តែគេប្រើបាតែមួយប៉ុណ្ណោះ ព្រោះក្នុងហ្វូងតែមួយអាចដាក់បានតែបាមួយ ចៀសវាងក្របីបាមានជម្លោះ។ សម្រាប់បាក្របីក្នុងក្រោល គេអាចប្រើបានប្រមាណ ៣ឆ្នាំ ព្រោះបន្ទាប់ពីបីឆ្នាំហើយកូនរបស់វាធំល្មមឡើងបាបាន ពោលគឺត្រូវការបាថ្មី។
គួរបញ្ចាក់ដែរថា លោក ហុក ហាង ចាប់ផ្ដើមចិញចញ្ចឹមមេក្របីនៅឆ្នាំ២០១៩ ដោយការចាប់ផ្ដើមដំបូងមានមេប្រមាណ ២០ក្បាលប៉ុណ្ណោះ តែសម្រាប់រយៈពេល៤ឆ្នាំនេះចំនួនក្របីក្នុងកសិដ្ឋានរបស់លោកឡើងដល់ជិត ២០០ក្បាលផងដែរ។ ក្រៅពីកូនក្របី ពីមុនលោកក៏មានលក់ជាក្របីសាច់ ដែលភាគច្រើនគេរើសលក់តែក្របីស្ទាវ អាយុត្រឹម ២ខួប ដែលអាចលក់បានក្នុងតម្លៃ ៣.៥ – ៤លានរៀល។
ចុងក្រោយ ម្ចាស់កសិដ្ឋានរូបនេះក៏បានចែករំលែកដែរថា ដើម្បីឱ្យសត្វក្របីអាចធំធាត់ល្អអាស្រ័យលើការជ្រើសរើសពូជផង និងស្មៅដែលផ្ដល់ឱ្យសត្វផងដែរ។ ក្រៅពីនេះអ្នកចិញ្ចឹមក៏ត្រូវប្រើថ្នាំទម្លាក់សត្វល្អិតដើម្បីការពារចៃ និងវ៉ាក់សាំង ឱ្យបានត្រឹមត្រូវផងដែរ៕
Account
Security
Favourite Content