សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ឆ្នាំង ៖ ក្រសួងរៀបចំដែនដី នគរូបនីយកម្ម និងសំណង់ បានសាកល្បងកំណត់នូវប្លង់គោលនៃការប្រើប្រាស់ដីជូនឃុំទាំង១៣០នៅជុំវិញបឹងទន្លេសាប ហើយកិច្ចការងារនេះចាប់ផ្ដើមចេញពីខេត្តកំពង់ឆ្នាំង ។ នេះបើតាមការបញ្ជាក់ពីឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងកិច្ចប្រជុំពិភាក្សា និងសកម្មភាពអញ្ជើញចុះត្រួតពិនិត្យបឹងធំ នៅក្នុងស្រុករលាប្អៀរ ស្រុកជលគិរី និងក្រុងកំពង់ឆ្នាំង ខេត្តកំពង់ឆ្នាំ កាលថ្ងៃទី៩ ខែកក្កដា ឆ្នាំ២០២៥ ។
ឯកឧត្តមឧបនាយករដ្ឋមន្ត្រី បានបញ្ជាក់ថា ៖
«ការដែលយើងជ្រើសរើសផ្ដើមចេញពីខេត្តកំពង់ឆ្នាំង ពីព្រោះខេត្តនេះបានបញ្ចប់ការវាស់វែងដីធ្លីរួចរាល់ ដូច្នេះ អ្វីដែលយើងទទួលបានក្នុងដៃ គឺផែនទីសុរិយោដី ងាយស្រួលក្នុងការកំណត់នូវប្លង់គោលនៃការប្រើប្រាស់ដីក្នុងកម្រិតឃុំ ។ ម្យ៉ាងទៀត ខេត្តកំពង់ឆ្នាំងជាទីកន្លែងយុទ្ធសាស្ត្រសម្រាប់ចិញ្ចឹមត្រី មានសក្តានុពលច្រើនសម្រាប់វិស័យកសិកម្ម និងសេដ្ឋកិច្ច»។
ជាមួយនេះដែរ ចំពោះបឹងធំក្នុងខេត្តកំពង់ឆ្នាំង ឯកឧត្តមឧបនាយករដ្ឋមន្រ្តី បានណែនាំឱ្យក្រុមការងារពិនិត្យមើលថា តើត្រូវចុះបញ្ជីបឹងនេះដោយរបៀបណា, ដោយត្រូវកំណត់ឱ្យបានច្បាស់លាស់ថា តើទីណាដែលត្រូវតែជាផ្ទៃទឹករបស់បឹង និងទីណាដែលអាចធ្វើជាតំបន់បម្រុងសម្រាប់ប្រើប្រាស់ជាឧត្តមប្រយោជន៍របស់អ្នកខេត្តកំពង់ឆ្នាំង ដូចជាការកសាងសួនសាធារណៈជាដើម។
ឯកឧត្តម សាយ សំអាល់ បានលើកឡើងថា កិច្ចការដែលក្រសួងត្រូវធ្វើបន្ទាប់ពីបញ្ចប់ការងារវាស់វែងដីធ្លីរួច គឺត្រូវបន្តការងារសិក្សា និងផ្ដល់យោបល់អំពីគុណតម្លៃនៃសេដ្ឋកិច្ចរបស់ដីតាមសក្តានុពលនៃបណ្តាខេត្តនីមួយៗ ដើម្បីជួយលើកស្ទួយជីវភាពប្រជាពលរដ្ឋ, ជំរុញកិច្ចអភិវឌ្ឍន៍ និងពង្រឹងខឿនសេដ្ឋកិច្ចជាតិឱ្យកាន់តែរឹងមាំ ។
បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីការសិក្សាមួយឱ្យដឹងថា បឹងទន្លេសាបធនធានធម្មជាតិរបស់កម្ពុជា អាចផ្ដល់ប្រយោជន៍សេដ្ឋកិច្ចដល់កម្ពុជាគិតជាទំហំទឹកប្រាក់រាប់ពាន់លានដុល្លារតាមរយៈការផ្ដល់ជាផលត្រី និងទឹកសាបសម្រាប់ប្រើប្រាស់ក្នុងវិស័យកសិកម្ម ក៏ដូចជាផ្លូវសម្រាប់ដឹកជញ្ជូនតាមផ្លូវទឹកផងដែរ ៕
Account
Security
Favourite Content