សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា និងសមាគមភស្តុភារកម្មកម្ពុជា បានសហការគ្នា និងប្តេជ្ញាចិត្តរួមដើម្បីធ្វើកំណែទម្រង់ភាពជាដៃគូ និងការកសាងប្រព័ន្ធអេកូឡូជីស្ទីកសម្រាប់ត្រៀមខ្លួនប្រឈមនឹងសមាហរណកម្មក្នុងតំបន់ និងពាណិជ្ជកម្មពិភពលោក។
ក្នុងគោលបំណងសម្រេចបានគោលដៅរួម អគ្គនាយកដ្ឋានគយ និងរដ្ឋាករកម្ពុជា និងសមាគមភស្តុភារកម្មកម្ពុជានាពេលថ្មីៗនេះបានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើការផ្លាស់ប្តូរព័ត៌មានលើទំនិញនាំចេញ-នាំចូល ឆ្លងកាត់ និងការផ្ទេរមធ្យោបាយដឹកជញ្ជូន។
ពិធីចុះហត្ថលេខានេះ ក្រោមវត្តមាន ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និង លោក ហាក់ លាងហ៊ ប្រធានសមាគមភស្តុភារកម្មកម្ពុជា។
ឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តី បានថ្លែងថា៖ អគ្គនាយកដ្ឋានគយនិងរដ្ឋាករកម្ពុជា នាពេលកន្លងមក បានធ្វើទំនើបកម្មស្ថាប័ន និងកិច្ចសម្រួលពាណិជ្ជកម្ម មានជាអាទិ៍៖ការដាក់ឱ្យអនុវត្តប្រព័ន្ធបញ្ជរតែមួយជាតិ (National Single Window), ការធ្វើស្វ័យប្រវត្តិកម្មពេញលេញនូវនីតិវិធីបំពេញបែបបទបញ្ចេញទំនិញពីគយ, ការដាក់ឱ្យអនុវត្តកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (AEO), ការអនុវត្តនីតិវិធីបំពេញបែបបទគយមុនពេលទំនិញមកដល់ (Pre-Arrival Processing), និងការពង្រីកវិសាលភាពការប្រើប្រាស់ e-Payment ជាដើម។
ឯកឧត្តមរដ្ឋមន្ត្រីប្រតិភូ ក៏បានគូសបញ្ជាក់ថា៖
«ការចុះMOUនេះ គឺជាវឌ្ឍនភាពថ្មីមួយទៀតក្នុងការពង្រីកកិច្ចសហប្រតិបត្តិការជាមួយវិស័យឯកជន ដើម្បីលើកកម្ពស់កិច្ចសម្រួលពាណិជ្ជកម្ម,ពង្រឹងអនុលោមភាពច្បាប់, កែលម្អបរិយាកាសធុរកិច្ចនិងវិនិយោគនៅកម្ពុជា, ក៏ដូចជាការចូលរួមចំណែកជាមួយរាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអភិវឌ្ឍសេដ្ឋកិច្ចជាតិ តាមរយៈការធ្វើឱ្យប្រសើរឡើងនូវវិស័យភស្តុភារកម្ម»។
គួរបញ្ជាក់ផងដែរថា កន្លងមក អគ្គនាយកដ្ឋានគយនិងរដ្ឋាករកម្ពុជា ធ្លាប់បានចុះអនុស្សរណៈនៃការយោគយល់គ្នាជាមួយស្ថាប័នឬក្រុមហ៊ុនមួយចំនួន ដូចជា សមាគមអេឡិចត្រូនិចនិងបច្ចេកវិទ្យាកម្ពុជា (CETA), ក្រុមហ៊ុន Chipmong Insee Cement Corporation, ក្រុមហ៊ុន DHL EXPRESS (CAMBODIA) និងជាពិសេសគឺ MOU ជាមួយប្រៃសណីយ៍កម្ពុជាលើកិច្ចសហការផ្លាស់ប្តូរព័ត៌មានកញ្ចប់បញ្ញើប្រៃសណីយ៍ សំដៅផ្ដល់កិច្ចសម្រួលបន្ថែមទៀត ក៏ដូចជាលើកកម្ពស់អនុលោមភាពនៃការបំពេញបែបបទបញ្ចេញទំនិញពីគយ។
លោក ហាក់ លាងហ៊ បានសម្ដែងនូវអំណរគុណចំពោះអគ្គនាយកដ្ឋានគយ និងរដ្ឋាករកម្ពុជាដែលបានផ្ដល់ការគាំទ្រដល់វិស័យឯកជន ក៏ដូចជាដែលបានធ្វើទំនើបកម្ម និងសាមញ្ញកម្មនីតិវិធីគយជាបន្តបន្ទាប់ និងបានប្ដេជ្ញាចូលរួមជាមួយរាជរដ្ឋាភិបាល ជាពិសេសអគ្គនាយកដ្ឋានគយ និងរដ្ឋាករកម្ពុជា ក្នុងការធ្វើឱ្យប្រសើរឡើងវិស័យឡូជីស្ទិកនៅកម្ពុជាតាមរយៈការលើកកម្ពស់ស្តង់ដារវិជ្ជាជីវៈ, សុចរិតភាព, និងគុណភាពសេវា។ លោកប្រធានសមាគម ក៏បានបន្ថែមទៀតថា៖ ការចុះហត្ថលេខាលើអនុស្សរណៈនៃការយោគយល់គ្នានេះ បានឆ្លុះបញ្ចាំងពីការប្តេជ្ញាចិត្តរួមក្នុងការធ្វើកំណែទម្រង់ ភាពជាដៃគូ និងការកសាងប្រព័ន្ធអេកូឡូជីស្ទីកឱ្យកាន់តែមានភាពប្រកួតប្រជែងស្របតាមស្ថានភាពនៃសមាហរណកម្មសេដ្ឋកិច្ចក្នុងតំបន់និងពាណិជ្ជកម្មពិភពលោក៕
Account
Security
Favourite Content