សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជាទើបតែដាក់ដំណើរការសាកល្បងអាកាសយានដ្ឋានអន្តរជាតិសៀមរាបអង្គរកាលពីថ្ងៃទី១៦ ខែតុលា ឆ្នាំ២០២៣កន្លងទៅនេះ ហើយក្រោយការដាក់ដំណើរការសាកល្បងនេះឃើញថា ទទួលបានការចាប់អារម្មណ៍ពីភ្ញៀវទេសចរ និងមានជើងហោះហើរជាច្រើនបានចុះចតនៅអាកាសយាន្ដដ្ឋានថ្មីរបស់កម្ពុជា ។
ប្រតិបត្តិករក្នុងវិស័យអចលនទ្រព្យប្រចាំខេត្តសៀមរាបមួយរូប លោក កែវ សុធារ៉ា បានប្រាប់ AMS Economy ឱ្យដឹងថា អាកាសយានដ្ឋានសៀមរាបអង្គរនឹងទាក់ទាញវិនិយោគិន និងភ្ញៀវទេសចបរទេសមកកាន់កម្ពុជាកាន់តែច្រើននៅពេលខាងមុខដ៏ខ្លីនេះ។
លោក កែវ សុធារ៉ា បានមានប្រសាសន៍តាមទូរសព្ទឱ្យដឹងថា ចាប់តាំងពីកម្ពុជាបានដាក់ដំណើរការនូវអាកាសយានដ្ឋានអន្តរជាតិសៀមរាបអង្គរមក ឃើញថាមានអ្នកវិនិយោគក្នុង និងក្រៅប្រទេសចាប់ផ្ដើមសម្លឹងមើលពីសក្ដានុពលវិនិយោគក្នុងខេត្តសៀមរាប ហើយលោករំពឹងថា នៅពេលខាងមុខឆាប់ៗនេះ សៀមរាបនឹងទទួលបានការវិនិយោគកាន់តែខ្លាំងបន្ថែមទៀត ។
លោកបន្តថា សម្រាប់រូបលោកដែលជាអ្នកវិនិយោគមួយរូបនៅកម្ពុជាលើវិស័យអចលនទ្រព្យលោកមានសុទិដ្ឋិនិយមខ្ពស់ចំពោះភាពទាក់ទាញអ្នកវិនិយោគ និងភ្ញៀវទេសក្រោយពីអាកាសយានដ្ឋានអន្តរជាតិសៀមរាបអង្គរដាក់ដំណើរការ ពីព្រោះថាអាកាសយានដ្ឋានមួយនេះ អាចទទួលបានយន្តហោះខ្នាតធំៗចុះចតបាន និងអាចទទួលបានភ្ញៀវទេសចរពីគ្រប់ទិសទីចូលមកកាន់តែច្រើន ដើម្បីមកទស្សនានៅតំបន់រមណីយដ្ឋាននានាក្នុងខេត្តសៀមរាប ។
លោក សុធារ៉ា បានបន្តទៀតថា នៅតំបន់ជុំវិញអាកាសយានដ្ឋានអន្តរជាតិមួយនេះ ក៏មានគម្រោងអភិវឌ្ឍន៍មួយ ត្រៀមផ្ទៃដីរហូតដល់ ១០០០ហិចតា ប៉ុន្តែភ្លាមៗគម្រោងនេះ មិនទាន់ចេញជារូបរាងនៅឡើយទេ តែលោករំពឹងថា មិនយូរទេគម្រោងនេះអាចនឹងចាប់ផ្ដើមដំណើរការអភិវឌ្ឍ ដើម្បីបំពេញតម្រូវអាជីវកម្ម និងការអភិវឌ្ឍនាពេលខាងមុខនេះ ។
លោកបានបន្ថែមថា សម្រាប់ស្ថានភាពនៃទីផ្សារអចលនទ្រព្យនៅខេត្តសៀមរាបក្នុងរយៈពេល ២-៣ខែចុងក្រោយនេះ ចាប់ផ្ដើមមានសកម្មភាពកម្រើកឡើងវិញបន្តិចហើយ ដោយមានអ្នកវិនិយោគនិងធុរកិច្ចចូលមកកាន់ខេត្តសៀមរាប និងត្រៀមបង្កើតអាជីវកម្មនៅក្នុងខេត្តនេះឡើងវិញ ។ យ៉ាងណាក្ដី លោកក៏បានស្នើឱ្យអ្នកផ្ដល់សេវាកម្មទេសចរណ៍ក្នុងខេត្ត ត្រូវពង្រឹងសេវាកម្ម បម្រើភ្ញៀវទេសចរបរទេស ធ្វើយ៉ាងណាដើម្បីឱ្យគេចង់មកលេងសៀមរាប ឬប្រទេសកកម្ពុជាម្ដងហើយម្ដងទៀតនៅពេលគេត្រលប់ទៅប្រទេសកំណើតវិញ ។
គួរបញ្ជាក់ថា បច្ចុប្បន្ននេះ កម្ពុជាមានអាកាសយានដ្ឋានចំនួន៣កំពុងដំណើរការរួមមាន អាកាសយានដ្ឋានភ្នំពេញ អាកាសយានដ្ឋានអន្តរជាតិខេត្តព្រះសីហនុ និងអាកាសយានដ្ឋានអន្តរជាតិសៀមរាបអង្គរ ខណៈអាកាសយានដ្ឋានចំនួន២ទៀត រួមមានអាកាសយានដ្ឋានខេត្តកោះកុង និងអាកាសដ្ឋានអន្តរជាតិតេជោ នៅស្រុកកណ្ដាលស្ទឹងកំពុងសាងសង់ និងត្រៀមដំណើរការនៅពេលខាងមុខផងដែរ ៕
Account
Security
Favourite Content