សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការធ្វើកសិកម្ម មិនត្រឹមតែត្រូវការត្រឹមតែបច្ចេកទេសដាំដុះ កត្តាអំណោយផលដី ប្រភពទឹក ឬធនធានប៉ុណ្ណោះទេ ប៉ុន្តែអ្វីដែលសំខាន់មួយទៀតនោះគឺទីផ្សារក្នុងការលក់កសិផល ដែលជាកត្តាចម្បងក៏ដូចជាបញ្ហាដែលកសិករតែងតែជួបប្រទះ។ ជាដំណោះស្រាយទៅលើបញ្ហាទីផ្សារនេះ អ្នកជំនាញ និងកំពុងប្រឡូកយ៉ាងមមាញឹកនៅក្នុងវិស័យមួយនេះបានលើកឡើងថា កសិករគួរតែចងក្រងជាសហគមន៍កសិកម្មមួយដើម្បីរួមគ្នារកទីផ្សារ ផ្គត់ផ្គង់ ក៏ដូចជារក្សានូវតម្លៃកសិផលមិនឱ្យឡើងចុះតាមតែឈ្មួញខិលខូចដាក់នោះទេ។
ពាក់ព័ន្ធនឹងបញ្ហានេះ ឯកឧត្តម បណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយបានមានប្រសាសន៍ថា៖ កសិករគួរតែរួមគ្នាចងក្រងជាសហគមន៍ ឬសហគ្រាសដូចដែលពាក្យគេតែងលើកឡើងថា «ចង្កឹះមួយបាច់កាច់មិនបាក់» ដោយសារសហគមន៍កសិកម្មប្រៀបដូចជាក្រុមហ៊ុនរបស់កសិករ ដែលអាចឱ្យកសិករធ្វើជាឈ្មួញខ្លួនឯងបាន មិនមែនកសិករបានត្រឹមតែជាកសិករនោះទេ ហើយការប្រមូលផ្ដុំនេះក៏ផ្ដល់នូវប្រយោជន៍ជាច្រើនមិនថាការកាត់បន្ថយថ្លៃដើម ការរកទីផ្សារ និងបរិមាណផ្គត់ផ្គង់ក្នុងទីផ្សារ។
ជាក់ស្ដែង សហគមន៍សំបូរមានជ័យ ជាសហគមន៍កសិកម្មមួយដែលប្រមូលផ្ដុំកសិករក្នុងតំបន់ប្រមាណជាង ១ពាន់គ្រួសារដើម្បីដាំដុះដំណាំ ដោយមានការរកទីផ្សារ ផ្គត់ផ្គង់ ក៏ដូចជាផ្ដល់នូវជំនួយផ្សេងៗដល់ការដាំដុះរបស់កសិករក្នុងគោលបំណងអភិឌ្ឍ និងលើកកម្ពស់ជីវភាពក្នុងសហគមន៍ទាំងមូល។
លោក ឆេង ថុង ជាប្រធានសហគមន៍ខាងលើបានលើកឡើងពីអត្ថប្រយោជន៍នៃការចូលជាសមាជិកសហគមន៍ថា ៖ ការចូលជាសមាជិកសហគមន៍ អាចជួយឱ្យកសិករលក់កសិផលក្នុងតម្លៃល្អ ចៀសវាងការកេងប្រវ័ញ្ចពីឈ្មួញខិលខូចដែលអាចបន្លំភ្នែកជញ្ជីង បន្ទាបតម្លៃតាមចិត្ត ជាពិសេសគឺអាចផ្គត់ផ្គង់ឱ្យឈ្មួញធំៗបានក្នុងបរិមាណមួយជាក់លាក់។ មិនត្រឹមតែការរកទីផ្សារទេ តាមរយៈសហគមន៍ សមាជិកក៏អាចទទួលបាននូវជំនួយផ្សេងៗពីរដ្ឋាភិបាល ក៏ដូចជាអង្គការផ្សេងៗ មិនថាការបណ្ដុះបណ្ដាលបច្ចេកទេសកសិកម្ម ការសាងសង់ឃ្លាំង ការជីកប្រឡាយទឹក ក៏ដូចជាជំនួយផ្សេងៗទៀតផងដែរ។
និយាយជារួម អ្នកជំនាញទាំង២នាក់ខាងលើនេះបានជំរុញឱ្យកសិករគួរគិតគូរពីការប្រមូលផ្ដុំគ្នាចងក្រងជាសហគមន៍មួយដែលអាចផ្ដល់នូវអត្ថប្រយោជន៍ឱ្យគ្នាទៅវិញទៅមក និងមានភាពស្ថិតស្ថេរ ទទួលបានចំណូលច្រើន៕
Account
Security
Favourite Content