ភ្នំពេញ ៖ អង្គការកម្ពុជាអភិវឌ្ឍន៍សហគមន៍ និងបរិស្ថាន និងអង្គការ អុកស្វាម បានសហការរៀបចំពិព័រណ៍ “ឥទ្ធិពលនៃបរិយាបន្ន” កាលពីចុងសប្តាហ៍នៅរាជធានីភ្នំពេញ។ កម្មវិធីពិព័រណ៏ នេះមានគោលបំណងអបអរសារទរខួប ៨ឆ្នាំ នៃកិច្ចសហប្រតិបត្តិការ វឌ្ឍនភាព និងសមិទ្ធិផល ដែលសម្រេចបានជាមួយអង្គការដៃគូ និងក្រុមគោលដៅ និងការសម្រេចបានជោគជ័យគួរជាទីមោទននៃគម្រោង  វ៉យ ក្នុងប្រទេសកម្ពុជា។

កម្មវិធីនេះមានការតាំងបង្ហាញស្តង់ពិព័រណ៍, សិក្ខាសាលាចែករំលែក និងរៀនសូត្រ, សកម្មភាពជាក្រុម និងការដាក់បង្ហាញសមិទ្ធផលនៃគម្រោងពីអង្គការដៃគូទាំង២៦របស់កម្មវិធីវ៉យវគ្គទី២ (២០២១- ២០២៤)។ តាមរយៈការបង្ហាញសាច់រឿង,ការជជែកពិភាក្សានិងការសម្តែង និងលើកឡើងអំពីដំណើរវិវត្តន៏ឆ្ពោះទៅកាន់បរិយាបន្នរបស់សហគមន៍នៃក្រុមគោលដៅទាំងអស់ រួមមានក្រុមជនមានពិការភាព ក្រុមអ្នកស្រលាញ់ភេទដូចគ្នា អ្នកប្តូរយេនឌ័រ (LGBTQI) ក្រុមស្ត្រីដែលប្រឈមមុខនឹងការកេងប្រវ័ញ្ច អំពើហិង្សា និង/ឬការរំលោភបំពាន ក្រុមយុវជន និងមនុស្សវ័យចាស់ដែលងាយរងគ្រោះ ក្រុមជនជាតិដើមភាគតិច និងជនជាតិភាគតិច។

លោកស្រី ភាណ សោភ័ណ នាយិកាអង្គការអុកស្វាម បានមានប្រសាសន៍ថា ៖

«អង្គការអុកស្វាម មានសេចក្តីសោមនស្សរីករាយក្នុងការគាំទ្រ និងធ្វើការជាមួយអង្គការដៃគូរបស់យើង ដើម្បីលើកកម្ពស់ និងពង្រឹងការផ្សព្វផ្សាយ បង្កើនការយល់ដឹងអំពីបរិយាបន្ន និងភាពចម្រុះ។ យើងបានពង្រឹងភាពអង់អាចដល់សហគមន៍ដែលយើងធ្វើការជាមួយដើម្បីពួកគេមានលទ្ធភាពចូលរួមយ៉ាងពេញលេញលើគ្រប់កម្រិត និងនៅក្នុងវេទិកានានា ចាប់ផ្តើមពីកម្រិតការអភិវឌ្ឍន៍សហគមន៍ រហូតដល់កិច្ចពិភាក្សាកម្រិតគោលនយោ​បាយ ដោយឈរទៅលើគោលការណ៍ ” បរិយាបន្ន ដោយមិនទុកនរណាម្នាក់ចោលឡើយ»។

វ៉យ គឺជាកម្មវិធីផ្តល់ជំនួយប្រកបដោយភាពច្នៃប្រឌិត ដើម្បីគាំទ្រមនុស្ស និងក្រុមដែលប្រឈមនឹងភាពងាយរងគ្រោះ ឬការរើស​អើង ដើម្បីពួកគេមានលទ្ធភាពនិងឥទ្ធិពល ទទួលបានធនធានសម្រាប់បង្កើនផលិតភាពទទួលបានសេវាសង្គម និងឱកាសចូលរួមក្នុងការធ្វើសេចក្តីសំរេចលើការអភិវឌ្ឍកម្រិតគោលនយោបាយ។ កម្មវិធី វ៉យ មានគោលបំណងពង្រឹងសមត្ថភាព និងភាពអង់អាចរបស់អង្គការសង្គមស៊ីវិលតំណាងឪ្យក្រុមគោលដៅដែលងាយរងគ្រោះ និងក្រុមដែលមានសម្លេងភាគតិច ដើម្បីមានឥទ្ឋិពលក្នុងការស្វែងរកមតិគាំទ្រ និងដើម្បីធានាថាសំឡេងរបស់ពួកគេត្រូវបានព្ញ និងឆ្លើយតប។ កម្មវិធី វ៉យ បានអនុវត្តនូវវិធីសាស្រ្តប្រកបដោយភាពច្នៃប្រឌិត ក្នុងការពង្រឹងភាពអង់អាច ពង្រឹងសមត្ថភាព និងដើម្បីបង្កើនឥទ្ធិពលរបស់ក្រុមគោលដៅទាំង៥។ កម្មវិធីនេះគឺជាគំនិតផ្តួចផ្តើម និងគាំទ្រហិរញ្ញប្បទានដោយក្រសួងការបរទេសនៃប្រទេសហូឡង់។ កម្មវិធីត្រូវបានអនុវត្តដោយកិច្ចសហការវាងអង្គការអុកស្វាម និង ហ៊ីវ៉ូស នៅក្នុង១០ ប្រទេសនៅអាស៊ីអាគ្នេយ៍ អាហ្វ្រិកខាងកើត និងខាងលិច។

គួររំលឹកថា នៅកម្ពុជា អង្គការអុកស្វាម បានអនុវត្តកម្មវិធី វ៉យ ដែលជាប្រទេសដំបូងគេដែលបានចាប់ផ្តើម នៅក្នុងខែធ្នូ ឆ្នាំ ២០១៦ ហើយបានដំណើរការអស់រយៈពេល ៨ ឆ្នាំមកហើយ។ អង្គការអុកស្វាម បានសម្របសម្រួល និងគាំទ្រអង្គការដៃគូក្នុងស្រុករបស់យើងចំនួន ៥៤ គម្រោង។ កម្មវិធី វ៉យ បានផ្តល់លទ្ធផលជាវិជ្ជមានដោយផ្ទាល់ទៅដល់ក្រុមគោលដៅងាយរងគ្រោះចំនួន ៦៨,៩៦៨នាក់។ យើងធ្វើការជាមួយក្រុមគោលដៅងាយរងគ្រោះចំនួន ៥ រួមមានជនមានពិការ រួមមានក្រុមជនមានពិការភាព ក្រុមអ្នកស្រលាញ់ភេទដូចគ្នា អ្នកប្តូរយេនឌ័រ (LGBTQI)  ក្រុមស្ត្រីដែលប្រឈមមុខនឹងការកេងប្រវ័ញ្ច អំពើហិង្សា និង/ឬការរំលោភបំពាន ក្រុមយុវជន និងមនុស្សចាស់ដែលងាយរងគ្រោះ ក្រុមជនជាតិដើមភាគតិច និងជនជាតិភាគតិច។

លោក ស៊ូ សុជាតិ នាយកប្រតិបត្តិរបស់អង្គការ Live & Learn Cambodia មានប្រសាសន៍ថា ៖វាពិតជាមានសារៈសំខាន់ណាស់ដែលមនុស្ស ឬក្រុមដែលប្រឈមនឹងភាពងាយរងគ្រោះ ឬការរើសអើង មានកន្លែងសម្រាប់បញ្ចេញនិងលើកឡើងនូវកង្វល់របស់ពួកគេ ដើម្បីដោះស្រាយតម្រូវការ និងអាទិភាពរបស់ពួកគេ។