បរទេស ៖ រថយន្តអគ្គិសនីត្រូវបានចាត់ទុកថាជាពេលនៃការផ្លាស់ប្តូររបស់ពិភពលោកឆ្ពោះទៅរកវិស័យធ្វើដំណើរដែលមាននិរន្តភាពបំផុតចំពោះភពផែនដីនាពេលអនាគត។

Tesla ដែលធ្លាប់តែជាកំពូលក្រុមហ៊ុន និងក្រុមហ៊ុនដំបូងគេបង្អស់ដែលលេចធ្លោបំផុតសម្រាប់បច្ចេកវិទ្យារថយន្តអគ្គិសនីមិនអាចប្រកែកបានទេ និងត្រូវជួបគូប្រជែងថ្មីៗជាបន្តបន្ទាប់ក្នុងរយៈពេលជាច្រើនឆ្នាំចុងក្រោយនេះសូម្បីតែនៅអឺរ៉ុប និងទៅដល់អាស៊ី ជាពិសេសក្រុមហ៊ុនផលិតរថយន្តអគ្គិសនីរបស់ចិនដែលមានចំនួនកើនឡើងខ្លាំងជាងគេ។

ចុងក្រោយនេះគ្រប់គ្នាបានដឹងបានឮហើយថាក្រុមហ៊ុនរថយន្តអគ្គិសនីកំពូលរបស់ចិន BYDបានបង្ហាញពិភពលោកថាខ្លួនគឺជាគូប្រជែងទីផ្សាររថយន្តអគ្គិសនីរបស់ពិភពលោករបស់ Tesla ដោយកាលពីឆ្នាំ២០២៣ BYD បានវ៉ាដាច់ Tesla ក្នុងការផលិតរថយន្តអគ្គិសនីបានច្រើនជាងគេបំផុតរបស់ពិភពលោកទោះបីជាជាក់ស្តែង Tesla នៅតែជាក្រុមហ៊ុនអ្នកផលិតរថយន្តអគ្គិសនីសុទ្ធសាធ​ ឬ BEV (Pure Electric Vehicle) នាំមុខគេរបស់ពិភពលោកក្តី ខណៈដែល BYD មានទាំងផលិតរថយន្តអគ្គិសនីកូនកាត់ផងរថយន្តអគ្គិសនីសុទ្ធសាធផងតម្រូវទីផ្សារគ្រប់អតិថិជន។

តើអ្វីជាទិចនិកនិងល្បិចទីផ្សារសំខាន់ៗដែល BYD បានប្រើប្រាស់កន្លងមកដើម្បីអាចក្លាយទៅជាកំពូលក្រុមហ៊ុនរថយន្តអគ្គិសនីទីផ្សាររបស់ពិភពលោក​ ? ខាងក្រោមនេះគឺជាអ្វីដែលយើងគួររៀនសូត្រ និងស្វែងយល់ទាំងអស់គ្នា៖

តាមពិតវាមិនមានអ្វីប្លែក និងមិនគួរឲ្យជឿនោះទេសម្រាប់មូលហេតុសំខាន់ៗដែលនាំឲ្យ BYD ចាប់យកឳកាសដ៏អស្ចារ្យនេះ ប៉ុន្តែក្នុងចំណោមក្រុមហ៊ុនរបស់ចិនទាំងអស់ BYD អាចចាប់ផ្តើមបានលឿនជាងគេនិងខ្លាំងជាងគេ។

ទីមួយ BYD ជាក្រុមហ៊ុនដែលមានផលិតកម្មផលិតគ្រឿងបន្លាស់សំខាន់ៗទាំងអស់របស់រថយន្តផ្ទាល់ខ្លួននៅក្នុងសង្វាក់ប្រតិបត្តិការធំរបស់ខ្លួនចាប់រួមទាំងពីការផលិតថ្មរថយន្តដោយខ្លួនបន្ទះឈីប ឬហៅថា semiconductor ព្រមទាំងគ្រឿងបន្លាស់ផ្សេងទៀតដែលនេះនាំឲ្យតម្លៃថ្លៃដើមនៃការផលិតរថយន្តមានតម្លៃទាបខ្លាំងធៀបទៅនឹង Tesla ។ កត្តាខាងលើបាននាំឲ្យតម្លៃរថយន្តរបស់ BYD ទាំងអស់មានតម្លៃខុសពី Tesla ពី ៥០ ទៅ ៧៥ ភាគរយ ដែលច្បាស់ណាស់វានាំឲ្យ BYD អាចចាប់យកបានទីផ្សារទាបទៅមធ្យម និងប្រណិតបានច្រើនជាងខុសពី Tesla។

មួយវិញទៀត មនុស្សភាគច្រើនក៏បានដឹងហើយដែរថា BYD គឺជាក្រុមហ៊ុនដែលកើតចេញដំបូងកាលពីអំឡុងទសវត្សរ៍ឆ្នាំ៩០ជាអ្នកជំនាញផលិតថ្មអគ្គិសនីដែលជាបច្ចេកវិទ្យាដ៏ចាំបាច់ក្នុងការយកទៅប្រើប្រាស់ក្នុងថ្មរថយន្ត។បូករួមទាំងបច្ចេកវិទ្យាថ្មីៗក្រោយមកទៀតវាបានធ្វើឲ្យមុខងាររបស់ BYD កាន់តែទំនើប និងមានប្រសិទ្ធភាពលើសគេក្នុងការប្រើប្រាស់។

ក្រៅពីនោះ អ្វីដែលជាភាពខ្លាំងរបស់ BYD ដោយសារតែក្រុមហ៊ុនបានផ្តោតសំខាន់ខ្លាំងតែទៅលើទីផ្សារចិនដំបូងគេប៉ុណ្ណោះដែលជាទីផ្សាររថយន្តធំជាងគេបំផុតលើពិភពលោកហើយនេះជាកត្តាដែលធ្វើឲ្យ BYD អាចឈរជើងបានយ៉ាងរឹងម៉ាំគិតជាទំហំលក់ជារៀងរាល់ឆ្នាំ ហើយជាចុងក្រោយដែលយើងអាចគិតដល់ចំពោះសក្តានុពលទីផ្សារដ៏ខ្លាំងរបស់ BYD នោះគឺថាវាគឺជាចាប់យកទីផ្សារចម្រុះចំពោះអតិថិជនទាំងឡាយណាដែលមិនទាន់ត្រៀមខ្លួនរួចជាស្រេចក្នុងការប្រើប្រាស់បច្ចេកវិទ្យាអគ្គិសនីសុទ្ធសាធតាមរយៈការប្រើប្រាស់រថយន្តអគ្គិសនីកូនកាត់ plug-in hybrid របស់ខ្លួនហើយ BYD បានអភិវឌ្ឍរថយន្តជាច្រើនជម្រើស និងច្រើនតម្លៃស្របទៅតាមគ្រប់ទីផ្សារទាំងអស់៕