ភ្នំពេញ ៖  អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយ អប់រំ អំពាវនាវឱ្យប្រជាពលរដ្ឋបង្កើនការប្រយ័ត្នល្បិចឆបោកប្រាក់ថ្មី​ តាមរយៈការបញ្ជាទូរស័ព្ទពីចម្ងាយ (Wireless Paring) ដោយសារតែករណីពាក់ព័ន្ធល្បិចឆបោកថ្មីនេះ មានច្រើននាពេលបច្ចុប្បន្ន។

នាយកដ្ឋានការពារសុវត្ថិភាពបច្ចេកវិទ្យាឌីជីថល​នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានឱ្យដឹងថា ថ្មីៗនេះ ខ្លួន​បានទទួលពាក្យបណ្តឹង​ និងសេចក្តីរាយការណ៍ជាច្រើនករណីពាក់ព័ន្ធល្បិចឆបោកថ្មី​ ដោយប្រើប្រាស់វិធីសាស្ត្រវិស្វកម្មបណ្តាញសង្គម​ (Social Engineering) លើបច្ចេកទេសបញ្ជាទូរស័ព្ទពីចម្ងាយ​ (Wireless Pairing) និងធ្វេីការលួចផ្ទេរប្រាក់ពីគណនីធនាគារចល័ត​ (Mobile Banking) របស់ជនរងគ្រោះ។

ក្នុងនោះ នាយកដ្ឋានក៏បានបង្ហាញអំពីវិធីសាស្ត្រដែលឧក្រិដ្ឋជនជ្រៀតចូល​ និងឆបោកតាមដំណាក់កាល​ដូចជា៖ ដំបូងឡើយ ឧក្រិដ្ឋជនធ្វើការប្រមែប្រមូលព័ត៌មាន​ និងសាវតាជនរងគ្រោះ​ (អាសយដ្ឋាន​ និងលេខទូរស័ព្ទ) បន្ទាប់មក ឧក្រិដ្ឋជនលួចភ្ជាប់បណ្តាញ​ (WiFi) របស់ជនរងគ្រោះ ហើយទូរស័ព្ទទៅកាន់លេខជនរងគ្រោះ​ ដោយបន្លំខ្លួនជាអ្នកផ្តល់សេវាចាំបាច់ផ្សេងៗ​ (តួយ៉ាងសេវាផ្គត់ផ្គង់ទឹក​ ឬភ្លើងអគ្គិសនី)​ ដោយណែនាំជនរងគ្រោះដំឡើងកម្មវិធី​និងរបៀបភ្ជាប់មុខងារបង់ថ្លៃសេវាតាមអ៊ីនធឺណិត​។ ក្នុងអំឡុងពេលណែនាំនោះ​ ឧក្រិដ្ឋជនបានឱ្យជនរងគ្រោះបើកដំណើរការ​ “Developer Mode” បើកជម្រើស​ “Wireless Debugging” និង​ភ្ជាប់ទូរស័ព្ទជនរងគ្រោះទៅកាន់ម៉ាស៊ីនកុំព្យូទ័រឧក្រិដ្ឋជន​ “Paring Device”។ ក្រោយបានភ្ជាប់ទូរស័ព្ទជនរងគ្រោះហើយ ឧក្រិដ្ឋជន​ប្រើប្រាស់កម្មវិធីជំនួយក្នុងការបញ្ជាកម្មវិធីធនាគារចល័ត​ (Mobile Banking) របស់ជនរងគ្រោះ​ និងលួចផ្ទេរប្រាក់ចេញទៅគណនីធនាគារផ្សេងទៀត។

អមជាមួយនឹងវិធីសាស្ត្ររបស់ជនឆបោក នាយកដ្ឋាបច្ចេកវិទ្យាឌីជីថល ក៏បានក្រើនរំលឹកដល់ប្រជាពលរដ្ឋឱ្យប្រុងប្រយ័ត្នចំពោះបុគ្គលដែលបានទាក់ទងអំពីការផ្តល់សេវាតាមស្ថាប័នរដ្ឋ ឬឯកជននានា ដោយអាចអនុវត្តវិធីសាស្រ្តដូចខាងក្រោម ៖ ផ្ទៀងផ្ទាត់អត្តសញ្ញាណអ្នកផ្គត់ផ្គង់សេវាឱ្យបានច្បាស់លាស់មុនសម្រចធ្វើតាមការណែនាំផ្សេងៗ ដាក់ប្រព័ន្ធការពារគណនី​ (រួមមាន៖​ 2FA​ លេខកូដរាល់ប្រតិបត្តិការ​ កំណត់ចំនួនទឹកប្រាក់នៃប្រតិបត្តិការ។ ល។)​  ពិនិត្យសមតុល្យ​ និង​កំណត់ត្រាប្រើប្រាស់​គណនីធនាគារជាប្រចាំ ហើយក្នុងករណីមានការសង្ស័យណាមួយ​ ត្រូវទាក់ទងទៅកាន់ធនាគារដែលខ្លួនកំពុងប្រើប្រាស់សេវាកម្មជាបន្ទាន់។

បន្ថែមពីនេះ នាយកដ្ឋានបច្ចេកវិទ្យាឌីជីថលក៏បានលើកទឹកចិត្តពលរដ្ឋឱ្យរាយការណ៍ ឬដាក់ពាក្យបណ្តឹងទៅកាន់សមត្ថកិច្ចជំនាញ ករណីដែលខ្លួនជួបប្រទះការចាញ់បោកឧក្រិដ្ឋជនបច្ចេកវិទ្យា៕