សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឡុងកុង គឺជាផ្លែឈើដែលមានរាងពងក្រពើ និងជាចង្កោម មានសំបកពណ៌លឿង សាច់ពណ៌សថ្លា ដែលមានរសជាតិផ្អែមឆ្ងាញ់ ហើយមានជីវជាតិបំប៉នផងដែរ ក៏ដូចជាផ្ទុកនូវសារធាតុប្រូតេអ៊ីន កាបូអ៊ីដ្រាត រ៉ែ វីតាមីន និងជាតិសរសៃ ខណៈដែលនៅក្នុងអំឡុងខែនេះ ជារដូវប្រមូលផលជាបណ្តើរៗហើយ។
ជាការកត់សម្គាល់ ចាប់តាំងពីដើមខែកញ្ញាមកម្លេះ នៅផ្សារកសិផល ស្រីអូន បាន និងកំពុងដាក់លក់ផ្លែឡុងកុង ក្នុងតម្លៃ ១៥០០០រៀល ក្នុងមួយគីឡូក្រាម ហើយមានអតិថិជនមកទិញជាហូរហែ ព្រោះជាកសិផលក្នុងស្រុក ដែលម្ចាស់ហាងនេះទទួលទិញពីចំការផ្ទាល់ ហើយតំបន់ដែលមានដាំដំណាំឡុងកុងនេះភាគច្រើនមាននៅតាមតំបន់មួយចំនួនដែលស្ថិតនៅក្នុងខេត្តកំពត កំពង់ចាម បាត់ដំបង និងខេត្តប៉ៃលិន ។ ដំណែករដូវដែលគេនិយមដាំគឺនៅរដូវស្សាមានទឹកផ្គត់ផ្គង់គ្រប់គ្រាន់ និងអាចប្រើរយៈពេលដាំដុះ និងលូតលាស់ប្រមាណ ២ឆ្នាំសម្រាប់ដើមថ្មី ឬប្រើពេលតិចជាងនេះសម្រាប់ពូជដើមដែលធំស្រាប់ ឬដើមធ្លាប់ផ្លែហើយ។
បើតាមអ្នកជំនាញកសិកម្មបានលើកឡើងថា ចំពោះអ្នកដែលចង់ដាំ គេអាចធ្វើការបណ្ដុះគ្រាប់ដោយខ្លូនឯងក៏បាន ឬអាចរកទិញពូជពីឈ្មួញដែលមានលក់កូនឈើក៏បាន ដែលគេអាចមានពូជច្រើនជម្រើសសម្រាប់អ្នកទិញយកទៅដាំនៅតាមដីចំការនានា។ យ៉ាងណាក៏ដោយ អ្នកដាំក៏ត្រូវយកចិត្តទុកដាក់ទៅលើការថែទាំដូចជាការស្រោចទឹក ដាក់ជី ជាពិសេសដំណាំនេះភាគច្រើនគេដាំជាមួយនឹងដើមទុរេន ដើម្បីចំណេញជីដែលដាក់ទុរេនផង និងអាចបានផលដល់ដើមឡុងកុងផង។
គួរបញ្ជាក់ដែរថា ឡុងកុង ជាផ្លែឈើដែលមានអត្ថប្រយោជន៍ច្រើនសម្រាប់អ្នកទទួលទាន ត្បិតវាមានសារធាតុប្រឆាំងនឹងអុកស៊ីតកម្មសម្រាប់ការពារជំងឺមហារីក ផ្ទុកជាតិសរសៃសម្រាប់ការពារជំងឺបេះដូង មានផ្ទុកជាតិ Niacin នៅក្នុងការគ្រប់គ្រង់កម្រិតកូលេស្តេរ៉ុល មានផ្ទុកជាតិ Riboflavin សម្រាប់ប្រព័ន្ធប្រសាទ ជាពិសេសមានវីតាមីន A សម្រាប់ជួយដល់ការលូតលាស់របស់ឆ្អឹង។ ក្រៅពីនេះ គ្រាប់របស់ឡុងកុងអាចប្រឆាំងនឹងជំងឺគ្រុនចាញ់ សំបកដើម និងសំបកផ្លែអាចជួយព្យាបាលជំងឺរាគរូស ជួយកាត់បន្ថយអាការៈជំងឺគ្រុនក្តៅ និងព្យាបាលការរលាក៕
Account
Security
Favourite Content