សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ ចក្រភពអង់គ្លេសបានក្លាយជាទីផ្សារបរទេសដ៏ធំបំផុតរបស់ក្រុមហ៊ុនផលិតរថយន្តចិន BYD បន្ទាប់ពីការលក់របស់ខ្លួននៅទីនោះបានកើនឡើង រហូតដល់ ៨៨០% ក្នុងខែកញ្ញា បើធៀបនឹងឆ្នាំមុន។
ស្ថាប័នឧស្សាហកម្មរថយន្ត សមាគមក្រុមហ៊ុនផលិត និងពាណិជ្ជកររបស់អង់គ្លេស (SMMT) បានបង្ហាញថា ការលក់រថយន្តអគ្គិសនី (EVs) បានកើនឡើងដល់កម្រិតខ្ពស់បំផុតនៅក្នុងខែកញ្ញា ដោយការលក់រថយន្តអគ្គិសនីប្រើថាមពលថ្មសុទ្ធបានកើនឡើងដល់ជិត ៧៣ ០០០ គ្រឿង។ នៅក្នុងចំណោមប្រភេទរថយន្តដែលមានតម្រូវការទីផ្សារដូចជា Kia Sportage, Ford Puma និង Nissan Qashqai គឺជារថយន្តដែលលក់ដាច់បំផុតនៅក្នុងខែកញ្ញា ហើយម៉ូដែលចិន – Jaecoo 7 និង BYD Seal U ក៏ស្ថិតក្នុងលំដាប់កំពូលទាំង ១០ ផងដែរ។
ក្រុមហ៊ុន BYD បានបង្ហើបថា ខ្លួនបានលក់រថយន្តចំនួន ១១ ២៧១ គ្រឿងនៅក្នុងចក្រភពអង់គ្លេសកាលពីខែមុន ដោយម៉ូដែលកូនកាត់ Seal U លក់ដាច់ជាងគេ។ ចក្រភពអង់គ្លេសមានភាពទាក់ទាញជាពិសេសចំពោះក្រុមហ៊ុនដូចជា BYD ដោយសារប្រទេសនេះមិនបានដាក់ពន្ធលើរថយន្ត EV របស់ចិន មិនដូចទីផ្សារធំៗផ្សេងទៀតដូចជា សហភាពអឺរ៉ុប និងសហរដ្ឋអាម៉េរិក។ មិនត្រឹមតែប៉ុណ្ណោះ BYD មានសមត្ថភាពផលិតម៉ូដែលឡានថោកជាងគូប្រជែងលោកខាងលិចជាច្រើន។ ការលក់របស់ BYD ធ្លាក់ចុះនៅក្នុងប្រទេសចិន ប៉ុន្តែនៅតែនាំមុខគូប្រជែងអាម៉េរិក Tesla នៅទូទាំងពិភពលោក។ ការលក់របស់វាក៏បានវ៉ាដាច់គូប្រជែងនៅអឺរ៉ុបផងដែររួមមាន Jaguar និង BMW ។
យ៉ាងណាក៏ដោយ បើទោះបីជាមានការកើនឡើងនៃការលក់រថយន្ត EV នៅក្នុងចក្រភពអង់គ្លេសក៏ដោយ ប៉ុន្តែរថយន្តប្រើសាំង និងម៉ាស៊ូតនៅតែមានចំនួនច្រើនជាងពាក់កណ្តាលនៃការលក់រថយន្តថ្មីកាលពីខែមុនផងដែរ។ នៅក្នុងខែកក្កដាឆ្នាំនេះ រដ្ឋាភិបាលចក្រភពអង់គ្លេសបានប្រកាសពីការបញ្ចុះតម្លៃ ៦៥០ លានផោន (៨៧៥ លានដុល្លារ) សម្រាប់អ្នកទិញរថយន្ត ក្នុងគោលបំណងលើកទីកចិត្តដល់ការប្រើប្រាស់រថយន្ត EV ។ អ្នកទិញរថយន្តអាចទាមទារប្រាក់ឧបត្ថម្ភរហូតដល់ ៣ ៧៥០ ផោនលើការទិញម៉ាករថយន្តល្បីៗរួមមាន Nissan, Peugeot និង Vauxhall។ យ៉ាងណាមិញ ផែនការនេះមិនរាប់បញ្ចូលរថយន្តដែលផលិតដោយប្រទេសចិននោះទេ ដោយសារមានការបំភាយឧស្ម័ននៅក្នុងការផលិតកម្មរបស់ពួកគេ។ BYD បានរិះគន់ការសម្រេចចិត្តនេះ ហើយបាននិយាយថា វានឹងធ្វើឱ្យខូចទីផ្សាររថយន្តរបស់ចក្រភពអង់គ្លេសក្នុងរយៈពេលវែង ៕
Account
Security
Favourite Content