ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងវិទ្យាស្ថានគោលនយោបាយវិទ្យាសាស្ត្រ និងបច្ចេកវិទ្យា (STEPI) នៃសាធារណរដ្ឋកូរ៉េ បានចាប់ផ្តើមកិច្ចសហប្រតិបត្តិការផ្លូវការ ក្នុងភាពជាដៃគូយុទ្ធសាស្ត្រ ដើម្បីគាំទ្រដល់ការអភិវឌ្ឍ “តំបន់ប្រមូលផ្តុំនវានុវត្តន៍ឧស្សាហកម្ម ស្រាវជ្រាវ និងអភិវឌ្ឍន៍”នៅក្នុងប្រទេសកម្ពុជា។

នៅថ្ងៃទី២៩ ខែមេសា ឆ្នាំ២០២៥ ភាគីទាំងពីរបានចុះអនុស្សរណៈនៃការយោគយល់ ដែលនេះជាមូលដ្ឋានគ្រឹះសម្រាប់ការពង្រឹងកិច្ចសហប្រតិបត្តិការផ្នែកគោលនយោបាយក្នុងរយៈពេល ៥ ឆ្នាំខាងមុខ។

ឯកឧត្តម ហែម វណ្ណឌី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា៖

«តាមរយៈការប្រើប្រាស់ជំនាញគោលនយោបាយផ្នែកវិទ្យាសាស្ត្រ និងបច្ចេកវិទ្យារបស់វិទ្យាស្ថាន STEPI និងការកែទម្រង់ជាបន្តបន្ទាប់របស់ក្រសួងនេះ នឹងជួយលើកកម្ពស់វិស័យឧស្សាហកម្ម និងនវានុវត្តន៍ នៅកម្ពុជាបានកាន់តែប្រសើរ»។

ឯកឧត្តមរដ្ឋមន្ត្រី បានបន្តថា៖អនុស្សរណៈនេះ នឹងបង្កើតបរិយាកាសអំណោយផល ដែលគាំទ្រដល់កំណើនសេដ្ឋកិច្ចរយៈពេលវែងនិងភាពប្រកួតប្រជែងរបស់កម្ពុជា។

សូមរំលឹកដែរថា រាជរដ្ឋាភិបាលមានទិសដៅអភិវឌ្ឍប្រទេសឱ្យកាន់តែប្រសើរប្រកបដោយបរិយាបន្ន និងចីរភាព ផ្តល់ឱ្យប្រជាជននូវសេចក្តីសុខ រក្សាបាននូវឯករាជ្យភាព បូរណភាពដែនដី និងប្រទេសជាតិមានសន្តិសុខ និងសុវត្ថិភាពសង្គមល្អ។ សម្រាប់ទិសដៅនេះ រាជរដ្ឋាភិបាលបានដាក់ចេញនូវចក្ខុវិស័យ កម្ពុជាឆ្នាំ២០៥០ សំដៅធ្វើឱ្យកម្ពុជាបានក្លាយជាប្រទេសដែលមានចំណូលមធ្យមកម្រិតខ្ពស់នៅ ឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

ជាមួយគ្នានេះ ដើម្បីឆ្លើយតបទៅនឹងការកើនឡើងនៃតម្រូវការរបស់ប្រទេសជាតិ និងនៅក្នុងបរិការណ៍ដែលធនធានធម្មជាតិមានកម្រិត ការប្រកួតប្រជែងក្នុងតំបន់ និងសកលលោកកាន់តែស្រួចស្រាវ ដូច្នេះ ត្រូវតែរួមគ្នាខិតខំអភិវឌ្ឍវិទ្យាសាស្ត្រ បច្ចេកវិទ្យា និងនវានុវត្តន៍ ឱ្យបានជាកម្លាំងជំរុញ និងជាកាតាលីករសម្រាប់ជួយឱ្យសម្រេចបាននូវតម្រូវការអភិវឌ្ឍន៍។

ការដាក់ចេញនូវគោលនយោបាយជាតិស្តីពី វិទ្យាសាស្ត្រ បច្ចេកវិទ្យា និងនវានុវត្តន៍ នេះ គឺជាឆន្ទៈ និងជាការតម្រង់ទិសរបស់រាជរដ្ឋាភិបាលដើម្បីជម្នះកត្តាប្រឈមនានា សំដៅជំរុញការស្រាវជ្រាវ វិទ្យាសាស្ត្រនិងនវានុវត្តន៍ ឱ្យបានជាផលិតផលដែលកាន់តែប្រសើរ វិធីសាស្ត្រដែលលើកកម្ពស់ផលិតភាព និងសេវាកម្ម ដែលមានការពេញចិត្តពីប្រជាជនទូទៅ៕