ភ្នំពេញ ៖ ស្ពាន​ឆ្លងកាត់ទន្លេ​ចំនួនពីរ ដែលកំពុងសម្រុកការសាងសង់ដើម្បីបញ្ចប់តាមផែនការដែលបានគ្រោងទុក រួមមាន​ស្ពានឆ្លងកាត់ទន្លេ​មេគង្គក្រោម ស្ថិតនៅក្នុងឃុំដីឥដ្ឋ ស្រុកកៀនស្វាយ និង​ស្ពានមួយទៀត ឆ្លងកាត់​ទន្លេបាសាក់ តភ្ជាប់​ពី​សង្កាត់ចាក់អង្រែក្រោម​ ខណ្ឌមានជ័យ ទៅកាន់សង្កាត់ព្រែកប្រា ខណ្ឌច្បារអំពៅ នឹង​ជួយជំរុញ​ ​បង្កើន​សក្ដានុពលក្នុងតំបន់ ទាំងផ្នែកវិស័យ​ដីធ្លី និងសំណង់ ក៏ដូចជាសកម្មភាពសេដ្ឋកិច្ចផងដែរ។

ស្ពាន​ឆ្លងកាត់​ទន្លេមេគង្គ​ក្រោម ដែលតភ្ជាប់ពីផ្លូវជាតិលេខ​១ ក្នុងភូមិសាស្ត្រ​ក្នុងឃុំដីឥដ្ឋ ស្រុក​កៀន​ស្វាយ ទៅ​ឃុំថ្មគរ ស្រុក​ល្វា​ឯម ខេត្តកណ្ដាល គឺជាស្ពាន​ដែលស្ថិតនៅក្នុង​គម្រោងផ្លូវ​ល្បឿនលឿន​ភ្នំពេញ-បាវិត គ្រោង​ចំណាយថវិកា​ប្រមាណ ២៣០លានដុល្លារ​​។ បច្ចុប្បន្ន វឌ្ឍនភាពនៃការសាងសង់ស្ពាននេះសម្រេច​បាន​ប្រមាណ ២៣ភាគរយ​ហើយ (គិតត្រឹម​ដើមខែកញ្ញា​ ឆ្នាំ២០២៥) បន្ទាប់ពីចាប់ផ្ដើម​បើក​ការដ្ឋាន​កាលពីថ្ងៃទី០៧ ខែមិថុនា ឆ្នាំ២០២៣ ក្រោមអធិបតីភាព​សម្ដេច​អគ្គមហាសេនា​បតីតេជោ ហ៊ុន សែន អតីតនាយករដ្ឋមន្ត្រីនៃ​ព្រះរាជាណាចក្រកម្ពុជា និងឯកឧត្តម ​វ៉ាង វិនធៀន អតីត​ឯកអគ្គរដ្ឋទូត​​នៃ​សាធារណរដ្ឋប្រជា​មានិតចិន ប្រចាំព្រះរាជាណាចក្រកម្ពុជា ។ ស្ពានមួយខ្សែនេះ ជាប្រភេទស្ពានបេតុង ដោយតួស្ពាន និងផ្លូវតភ្ជាប់ក្បាលស្ពានមានប្រវែងសរុប ៣ ៧០០ម៉ែត្រ តួស្ពានមានប្រវែងសរុប ១ ៦០០ម៉ែត្រ និងទទឹង២៦ម៉ែត្រ។

ដោយឡែក ​ស្ពានឆ្លងកាត់ទន្លេ​បាសាក់​ ភ្ជាប់ពីសង្កាត់ចាក់អង្រែ​ក្រោម ខណ្ឌមានជ័យ ទៅកាន់​សង្កាត់ព្រែកប្រា​ ខណ្ឌច្បារអំពៅ ក៏បាន និងកំពុងសាងសង់​យ៉ាង​មមាញឹក​ ដោយ​បានសម្រេច​សមិទ្ធផល​ប្រមាណជាង ​៤១ភាគរយហើយ ។ ស្ពាននេះ ត្រូវ​បាន​រាជរដ្ឋាភិបាលគ្រោងចំណាយថវិកាប្រមាណ ៦០លានដុល្លារអាមេរិក ខណៈដែលវឌ្ឍនភាពសាងសង់សម្រេចបាន ដូចជា ការងារខាងកើតស្ពាន ១/គ្រឹះស្ពាន សម្រេចបានប្រមាណ ៦១,៥០% ក្នុងនោះសសរគ្រឹះចំនួន ១៥៦ដើម សម្រេចបាន ១៣៧ដើម ២០ជើងតាង សម្រេចបានចំនួន៩ និងធ្នឹមភ្ជាប់ក្រោមចំនួន១២ សម្រេចបាន ៨ធ្នឹម។ ២/រចនាសម្ព័ន្ធក្រោមស្ពានសម្រេចបាន២៦,១២% រួមមាន៖តួសរសរស្ពាន១២ សម្រេចបាន៦សរសរ, សរសរស្ពាន ៥២ សម្រេចបាន២៤ និងធ្នឹមភ្ជាប់ក្បាលសរសរទទឹងស្ពានចំនួន៣៤ សម្រេចបាន១០ធ្នឹម។ 

អ្នក​ជំនាញក្នុងវិស័យអចលនទ្រព្យ​បាន​លើកឡើងថា ការ​សាងសង់ស្ពានឆ្លងទន្លេ​ មិនថានៅតំបន់ណានោះទេ តែងតែផ្ដល់​ផលប្រយោជន៍យ៉ាងច្រើនសម្រាប់ប្រជាពលរដ្ឋ និងអាជីវកម្មនៅក្នុងតំបន់ទាំងនោះ ពីព្រោះការធ្វើដំណើរ​ឆ្លងកាត់កាន់តែងាយស្រួល ការ​ដឹកជញ្ជូន​ទំនិញក៏កាន់តែលឿន​រហ័ស ។

អ្នកឧកញ៉ាបណ្ឌិត ​សំ សុខ​នឿន ប្រធានក្រុមប្រឹក្សាភិបាល​នៃសម្ព័ន្ធក្រុមហ៊ុន​ KW Sam NS Group បានលើកឡើ​ងថា នៅពេល​មានស្ពានឆ្លងកាត់ទន្លេ​មេគង្គដូចដែលប្រធានបទបានលើកឡើងខាងលើ នឹងធ្វើ​ឱ្យ​តំបន់​ល្វា​ឯម និងអរិយក្សត្រ ​កាន់តែ​មានសក្ដានុពល​ និងភាពទាក់ទាញ ជាពិសេស​ទៅលើការអភិវឌ្ឍលំនៅឋាន​ ដោយជំហានដំបូងអ្នកអភិវឌ្ឍ​ន៍នឹង​ចូលទៅអភិវឌ្ឍ​ន៍​លំនៅឋាន ហើយបន្តបន្ទាប់​ពលរដ្ឋ​នឹងចាប់ផ្ដើមផ្លាស់ទីទៅតំបន់​នោះកាន់តែច្រើន​ ពីព្រោះការធ្វើដំណើរ​ចេញចូលរាជធានីកាន់តែងាយស្រួល និងឆាប់រហ័ស ។

ដោយឡែក សម្រាប់​ស្ពាន​ឆ្លងកាត់ទន្លេ​បាសាក់​ តភ្ជាប់ពីសង្កាត់ចាក់​អង្រែក្រោម ខណ្ឌមានជ័យ និងសង្កាត់ព្រែក​ប្រា ខណ្ឌច្បារអំពៅ រាជធានីភ្នំពេញ វិញ អ្នកស្រី អាន សុធីតា​ អគ្គនាយិកា ក្រុមហ៊ុន​ PropNex Cambodia ក៏បានលើកឡើងដែរថា ទាំងវិស័យដីធ្លី និងសំណង់លំនៅដ្ឋានក្នុងតំបន់​នៅជុំវិញគម្រោង​ស្ពាន​ចាក់អង្រែក្រោម​- ព្រែកប្រា នៅពេលអនាគត​ នឹង​កាន់តែល្អប្រសើរ ។ ជាក់ស្ដែង​នៅតំបន់ផ្លូវ​៦០ម៉ែត្រ តំបន់ប៉ែកខាងត្បូងរាជធានីភ្នំ​ពេញ​​ ក្នុងរយៈពេលប៉ុន្មានឆ្នាំចុងក្រោយនេះ​ មានការអភិវឌ្ឍ​លើ​ហេដ្ឋារចនាសម្ព័ន្ធកាន់តែច្រើន ហើយជាលទ្ធ​​ផលក៏ទទួល​ការ​ចាប់អារម្មណ៍ពីសំណាក់​វិនិយោគិន​ និងបាន​បណ្ដាក់ទុនវិនិយោគជា​ហូរហែ ដែលអាចជំរុញឱ្យតម្លៃដីទូទៅស្ថិតក្នុងកម្រិតប្រមាណ ២៥០០ដុល្លារក្នុងមួយម៉ែត្រការ៉េរួចទៅហើយ ។

អ្នក​ស្រីរំពឹងថា តំបន់​នេះ​​នឹង​កាន់តែ​ល្អប្រសើរថែមទៀតនៅពេលស្ថានភាពសេដ្ឋកិច្ចកម្ពុជា ក៏ដូចជាស្ថាន​ភាពសេដ្ឋកិច្ចសាកល​បានវិល​ទៅរកស្ថានភាពល្អដូច​មុនវិបត្តិកូវីដ១៩​ ជាពិសេស នៅពេលអាកាសយានដ្ឋានអន្តរជាតិ​តេជោ​ ​ចាប់ផ្ដើមបើក​ប្រតិបត្តិការ​ជាផ្លូវការ​ ដែលអាចជួយរុញ​សក្ដានុពលតំបន់​ភាគខាងត្បូង និងនៅជុំវិញ ផ្លូវ​៦០ម៉ែត្រ​កាន់តែ​មានភាពទាក់ទាញថែមមួយកម្រិតទៀត ៕