សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្អែកតាមស្ថានភាពជាក់ស្ដែង វិស័យអចលនទ្រព្យកម្ពុជាក្នុងឆ្នាំ២០២៤នេះ ត្រូវបានអ្នកជំនាញមួយចំនួនបង្ហាញពីសញ្ញាវិជ្ជមានថានឹងល្អប្រសើរឡើងវិញ ជាមួយនឹងការព្យាករថា វិស័យមួយនេះនឹងងើបឡើងវិញឆាប់ ខណៈដែលកំណើនសេដ្ឋកិច្ចរបស់កម្ពុជាត្រូវបានរំពឹងថាកើនឡើងក្នុងកម្រិតខ្ពស់។
លោក ឡាត់ ចន្ទដារា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានឱ្យដឹងថា វិស័យអចលនទ្រព្យក្នុងឆ្នាំ២០២៤នេះ បានចាប់ផ្ដើមមានសញ្ញាវិជ្ជមានឡើងវិញជាបណ្តើរៗ ដោយក្នុងនោះតម្លៃជួលអចលនទ្រព្យ ជាពិសេសអាផាតមិន អាចនឹងងើបឡើងវិញ ប្រសិនបើស្ថានភាពសេដ្ឋកិច្ចនៅបន្តមានកំណើន ជាពិសេសរំហូរនៃការវិនិយោគផ្ទាល់ពីបរទេសបន្តចូលមកកម្ពុជាកាន់តែច្រើន។
លោកបញ្ជាក់ថា ៖
«ទីផ្សារជួលអចលនទ្រព្យ ក្នុងនោះនិយាយដោយឡែកតែអាផាតមិន ហាក់មានកំណើនល្អក្នុងត្រីមាសទី៣ ឆ្នាំ២០២៤នេះ ជាពិសេសគម្រោងដែលមានទីតាំងអំណោលផល និងផ្តល់ភាពងាយស្រួលក្នុងការរស់នៅ ក៏ដូចជានៅទីប្រជុំជន លើកលែងតែគម្រោងដែលស្ថិតនៅតាមជាយក្រុងដែលមិនសូវមានតម្រូវការ។ ដោយឡែកសម្រាប់ការជួលខុនដូប្រភេទសមរម្យ ក៏មានតម្រូវការឡើងវិញជាបណ្តើរៗផងដែរ»។
ស្រដៀងនឹងការលើកឡើងខាងលើ អ្នកឧកញ៉ា សំ សុខនឿន អគ្គនាយកក្រុមហ៊ុន KW Sam SN ក៏បានឱ្យដឹងដែរថា ក្នុងឆ្នាំ២០២៤នេះ ចំពោះសកម្មភាពការវិនិយោគនៅក្នុងទីផ្សារអចលនទ្រព្យបានកើតឡើងវិញខ្លះបើទោះជាគម្រោងវិនិយោគភាគច្រើនមានទំហំតូច និងមធ្យម។
អ្នកឧកញ៉ាបានបន្តថា ៖
«តាមខ្ញុំមើលឃើញ អចលនទ្រព្យនៅក្នុងប្រទេសកម្ពុជាមានភាពល្អប្រសើរឡើងវិញបន្តិចបើប្រៀបធៀបទៅនឹងឆ្នាំ២០២២ និងឆ្នាំ ២០២៣ ។ ជាក់ស្ដែង យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងរយៈពេលប៉ុន្មានខែមកនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគថ្មីៗជាច្រើន ដោយគម្រោងទាំងនោះ មានទាំងការវិនិយោគដោយអ្នកក្នុងស្រុក និងគម្រោងថ្មីដែលហូរចូលមកពីបរទេស ជាពិសេសប្រទេសចិន» ។
យ៉ាងណាក៏ដោយ ថ្វីត្បិតតែអ្នកជំនាញ ក៏ដូចជាប្រតិបត្តិការមួយចំនួនបានលើកឡើងពីសញ្ញាវិជ្ជមាននៃវិស័យអចលនទ្រព្យ ប៉ុន្តែក៏មានមតិមួយចំនួនលើកឡើងដែរថា ចាប់ពីពេលនេះតទៅ សកម្មភាពនៃវិស័យអចលនទ្រព្យក្នុងប្រទេសកម្ពុជានឹងមិនដូចស្ថានភាពនៅមុនឆ្នាំ២០២០នោះទេ ដោយសារតែតម្លៃមានឡើងថ្លៃដល់ពិដានរួចទៅហើយ ជាពិសេសទីផ្សារអចលនទ្រព្យនៅក្នុងក្រុងព្រះសីហនុ ដែលពិបាកក្នុងការទិញលក់បន្តយកចំណេញណាស់។
គួរបញ្ជាក់ថា បើតាមការកត់សម្គាល់ ចាប់តាំងពីរដ្ឋាភិបាលបានប្រកាសឱ្យប្រើប្រាស់នូវច្បាប់វិនិយោគថ្មីនៃព្រះរាជាណាចក្រកម្ពុជា និងការដាក់ចេញនូវវិធានការកម្មវិធីជំរុញការវិនិយោគនៅខេត្តព្រះសីហនុឃើញថា មានការចាប់អារម្មណ៍ពីសំណាក់វិនិយោគិនទាំងក្នុង និងក្រៅប្រទេស ហើយក៏ឃើញថាគម្រោងដែលជាប់គាំងមិនដំណើរការនៅក្នុងខេត្តព្រះសីហនុជាច្រើន បានចាប់ផ្ដើមដំណើរការ និងមានសកម្មភាពឡើងវិញផងដែរ ៕
Account
Security
Favourite Content