សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមទិន្នន័យផ្លូវការដែលបង្ហាញដោយការិយាល័យស្ថិតិជាតិរបស់ចិនកាលពីថ្ងៃចន្ទ ដើមសប្ដាហ៍នេះបានឱ្យដឹងថា ចំនួនពលរដ្ឋចិននៅតែបន្តធ្លាក់ចុះក្នុងរយៈពេល៤ឆ្នាំជាប់គ្នាចុងក្រោយនេះ ដែលកំពុងក្លាយជាក្ដីប្រាម្ភមួយរបស់រដ្ឋាភិបាល។
តាមរយៈតួលេខក្នុងរបាយការណ៍ដដែលបានរកឃើញថា នៅឆ្នាំ២០២៥ ចំនួនប្រជាជនបានធ្លាក់ចុះប្រមាណជា ៣,៣៩លាននាក់ ខណៈដែលនៅឆ្នាំ២០២៤ ចំនួនប្រជាជនមានរហូតដល់ ១៤០៥លាននាក់ ។អត្រាចាប់កំណើតថ្មីនៅទូទាំងប្រទេសចិនក្នុងឆ្នាំ២០២៥ ត្រូវបានកត់ត្រាចំនួនត្រឹមតែប្រមាណ ៧,៩២លាននាក់ ដែលជាអត្រាមានកម្រិតទាបបំផុតមិនធ្លាប់មានឡើយក្នុងរយៈពេលប៉ុន្មានទសវត្សរ៍មកនេះ ខណៈដែលតួលេខកំណើតថ្មីមានត្រឹមតែ ៩,៥៤លាននាក់កាលពីឆ្នាំ២០២៤។
ផ្ទុយពីការចាប់កំណើតថ្មីដែលមានចំនួនដូចបានបង្ហាញជូននៅខាងលើនេះ ងាកមកតួលេខនៃចំនួនពលរដ្ឋដែលទទួលមរណភាពវិញ មានកំណើនខ្លាំងរហូតដល់ប្រមាណ ១១,៣១លាននាក់នៅក្នុងឆ្នាំ២០២៥ ខណៈដែលកាលពីឆ្នាំ២០២៤ ចំនួនអ្នកទទួលមរណភាពមានចំនួន ១០,៩៣លាននាក់។
ជាការកត់សម្គាល់ ចំនួនពលរដ្ឋចិនបានបន្តធ្លាក់ចុះតាំងតែពីឆ្នាំ២០២២ ស្របពេលដែលពលរដ្ឋមានវ័យចំណាស់មានការកើនឡើងខ្ពស់ ហើយក្រៅពីនោះ បញ្ហាដែលពាក់ព័ន្ធធ្វើឲ្យកំណើនពលរដ្ឋដើរថយក្រោយបែបនេះ ដោយសារតែរាល់ខ្ទង់ចំណាយរបស់ពលរដ្ឋស្ថិតក្នុងភាពប្រុងប្រយ័ត្នខ្ពស់ បូករួមទាំងបញ្ហាបំណុល និងអត្រាពលរដ្ឋអត់ការងារធ្វើច្រើនផង ប៉ះពាល់ដល់ប្រាក់ចំណូល។
ដោយឡែក ងាកមកចាប់អារម្មណ៍ជាមួយចំនួនអ្នករៀបការនៅក្នុងប្រទេសចិន ក៏មើលឃើញថា មានការធ្លាក់ចុះខ្លាំងដែរ ដោយនៅក្នុងឆ្នាំ២០២៤ ចំនួនអ្នកចុះឈ្មោះរៀបការថ្មីមានត្រឹមតែ ១ ភាគ ៥ ប៉ុណ្ណោះធៀបទៅនឹងឆ្នាំចាស់ ហើយក៏ជាឆ្នាំដែលមានចំនួនពលរដ្ឋចិនរៀបការថ្មីតិចតួចបំផុត និងមិនធ្លាប់មាន។ កាលពីឆ្នាំ២០២៤ មានអ្នកចុះឈ្មោះរៀបអាពាហ៍ពិពាហ៍ចំនួន ៦,១លានគូ ខណៈដែលកាលពីឆ្នាំ២០២៣ មានប្រមាណជា ៧,៦៨លានគូ។ ការរៀបអាពាហ៍ពិពាហ៍ គឺជាសូចនាករដ៏សំខាន់ក្នុងការជួយជំរុញឱ្យអត្រាកំណើតថ្មីនៅទូទាំងប្រទេសចិនកើនឡើង។ យ៉ាងណាក្តី រដ្ឋាភិបាលចិន បានដាក់ចេញនូវផែនការយុទ្ធសាស្ត្រថ្មីៗមួយចំនួន ដើម្បីអាចធ្វើឱ្យកំណើនពលរដ្ឋកើនឡើងវិញនៅឆ្នាំបន្ទាប់ ដោយក្នុងនោះ កាលពីខែឧសភា ឆ្នាំ២០២៥ កន្លងទៅ រដ្ឋាភិបាលចិន បានប្រកាសឲ្យគូស្នេហ៍ថ្មីថ្មោងអាចរៀបការបាននៅគ្រប់ទីកន្លែងណាក៏បាន ខុសពីច្បាប់ចាស់ដែលតម្រូវឲ្យពួកគេអាចរៀបការនៅទីកន្លែងពួកគេរស់នៅប៉ុណ្ណោះ ៕
Account
Security
Favourite Content