ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំអន្តរក្រសួង ដើម្បីពិនិត្យវាយតម្លៃជាបឋមទៅលើការជ្រើសរើសទីតាំងសម្រាប់រៀបចំលំនៅឋានបណ្តោះអាសន្នជូនកងទ័ព និងប្រជាពលរដ្ឋភៀសសឹកនៅតាមបណ្ដោយព្រំដែន

(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំអន្តរក្រសួង ដើម្បីពិនិត្យវាយតម្លៃជាបឋមទៅលើការជ្រើសរើសទីតាំងសម្រាប់រៀបចំលំនៅឋានបណ្តោះអាសន្នជូនកងទ័ព និងប្រជាពលរដ្ឋភៀសសឹកនៅតាមបណ្ដោយព្រំដែន ដោយភ្ជាប់ជាមួយការធ្វើសមាហរណកម្មទៅនឹងភូមិចាស់ដែលនៅជុំវិញនោះ លើគ្រប់ហេដ្ឋារចនាសម្ព័ន្ធឱ្យមានភាពប្រទាក់ក្រឡាគ្នា ជាប្រយោជន៍បម្រើដល់វិស័យកសិកម្ម ដើម្បីកសាងជីវភាពរស់នៅរបស់ប្រជាពលរដ្ឋឱ្យប្រសើរឡើង ដោយភ្ជាប់ជាមួយការសាងសង់លេណដ្ឋាននៅតាមលំនៅឋាន ឬសាលារៀនជាដើម ដើម្បីរក្សាសុវត្ថិភាពផងដែរ ។

កិច្ចប្រជុំអន្តរក្រសួង ស្ដីពីការជ្រើសរើសទីតាំងក្នុងការរៀបចំផ្ទះជាបណ្តោះអាសន្នជូនកងទ័ពតាមបណ្ដោយព្រំដែន ដែលបានធ្វើឡើងនៅទីស្ដីការក្រសួង នារសៀលថ្ងៃទី២៦ ខែមករា ឆ្នាំ២០២៦ ក្រោមអធិបតីភាព ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដោយមានការអញ្ជើញចូលរួមដោយផ្ទាល់ពីឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការសមាគមអតីតយុទ្ធជនកម្ពុជា, តំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួមតាមរយៈប្រព័ន្ធអនឡាញពីរដ្ឋបាលខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដី ទាំង៥ខេត្ត រួមមានខេត្តបាត់ដំបង បន្ទាយមានជ័យ ពោធិសាត់ ឧត្តរមានជ័យ និងព្រះវិហារ ផងដែរ ។

នៅក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា ការជួបជុំគ្នានាពេលនេះ គឺដើម្បីប្រមូលមតិយោបល់បន្ថែមពីអន្តរក្រសួងពាក់ព័ន្ធ ទៅលើអ្វីដែលក្រុមការងារជំនាញបានវាយតម្លៃជាបឋមលើការជ្រើសរើសទីតាំងសម្រាប់រៀបចំលំនៅឋានបណ្តោះអាសន្នជូនកងទ័ព និងប្រជាពលរដ្ឋភៀសសឹកចំនួន ៣ ក្រុមគឺ ៖ ក្រុមទី១ ជាប្រជាពលរដ្ឋដែលបានភៀសសឹកកាលពីពេលកន្លងមក និងមិនអាចវិលត្រឡប់ទៅរកលំនៅឋានរបស់ខ្លួនវិញបាន ហើយអាចទៅកាន់ទីតាំងមានសុវត្ថិភាពថ្មី ដែលរាជរដ្ឋាភិបាលបានរៀបចំជូន, ក្រុមទី២ គឺជាក្រុមដែលរង់ចាំពេលវេលាណាមួយសមស្របអាចវិលត្រឡប់ទៅរកលំនៅដ្ឋានរបស់ខ្លួនវិញបាន ហើយក្រុមទី៣ គឺជាក្រុមដែលកំពុងស្នាក់នៅមណ្ឌលសុវត្ថិភាពបណ្ដោះអាសន្នក្នុងរយៈពេលខ្លីជាងក្រុមទី២ ។

ឯកឧត្តមឧបនាយករដ្ឋមន្ត្រី បានបញ្ជាក់ថា ក្រុមការងារអន្តរក្រសួងបានដឹងពីទីតាំងដែលបានជ្រើសរើសទាំងនេះរួចមកហើយ និងបានចូលរួមក្នុងការស្វែងរក និងកំណត់ជាបឋមនូវទីតាំងមួយចំនួននៅតាមបណ្ដោយព្រំដែន ដូច្នេះ ឯកឧត្តមឧបនាយករដ្ឋមន្ត្រី ក៏បានស្នើសុំមតិយោបល់បន្ថែមទៀតពីអន្តរក្រសួង ដើម្បីពិនិត្យមើលថា តើទីតាំងដែលបានជ្រើសរើសទាំងនេះសមស្របក្នុងការរៀបចំជូនដល់ប្រជាពលរដ្ឋភៀសសឹក ឬយ៉ាងណា ។

ឯកឧត្តមឧបនាយករដ្ឋមន្ត្រី បានបន្ថែមថា ការងារបន្ទាប់ដែលត្រូវធ្វើនោះ គឺត្រូវកំណត់អំពីសុវត្ថិភាពសុរិយោដី មានន័យថា ជាដីដែលមិនមានពាក់ព័ន្ធកម្មសិទ្ធិរបស់ជនណាម្នាក់ឡើយ ហើយក្រុមការងាររៀបចំដែនដី នគរូបនីយកម្ម ត្រូវមានភារកិច្ចគូសប្លង់ ធ្វើយ៉ាងណាឱ្យទីតាំងថ្មីដែលរាជរដ្ឋាភិបាលបានរៀបចំលំនៅឋានបណ្តោះអាសន្នជូនប្រជាពលរដ្ឋភៀសសឹកនេះ មានការធ្វើសមាហរណកម្មទៅនឹងភូមិចាស់ដែលនៅជុំវិញនោះ លើគ្រប់ហេដ្ឋារចនាសម្ព័ន្ធ ដូចជា ផ្លូវថ្នល់ ទឹកស្អាត និងអគ្គិសនី ជាដើម ឱ្យមានភាពប្រទាក់ក្រឡាគ្នា ជាប្រយោជន៍បម្រើដល់វិស័យកសិកម្ម ដើម្បីកសាងជីវភាពរស់នៅរបស់ប្រជាពលរដ្ឋ ក្នុងនោះក៏ត្រូវគិតគូរអំពីការសាងសង់សំណង់រឹងមាំប្រកបដោយនវានុវត្តន៍ដែលអាចប្រើប្រាស់បានច្រើនយ៉ាង ដោយភ្ជាប់ជាមួយការសាងសង់លេណដ្ឋាននៅតាមទីតាំងផ្សេងៗ ដូចជា លំនៅឋាន ឬសាលារៀនជាដើម ដើម្បីរក្សាសុវត្ថិភាពផងដែរ ៕ អត្ថបទ ៖ ហេង វណ្នា