បរទេស ៖ យោងតាមប្រភពពី Weforum បានលើកឡើងថា គុណភាពខ្យល់កំពុងធ្លាក់ចុះកាន់តែធ្ងន់ធ្ងរនៅទូទាំងពិភពលោក ដោយសារឥទ្ធិពលនៃការឡើងកំដៅផែនដី។ បញ្ហានេះបង្កឱ្យមានការព្រួយបារម្ភយ៉ាងខ្លាំងចំពោះសុខភាពមនុស្ស និងបរិស្ថាន។

អង្គការសុខភាពពិភពលោកបានបង្ហាញថា ការបំពុលខ្យល់បណ្តាលឱ្យមនុស្សប្រហែល ៧ លាននាក់ស្លាប់មុនអាយុជារៀងរាល់ឆ្នាំដោយសារតែការបំពុលខ្យល់ក្នុងផ្ទះ និងខាងក្រៅ។  ការវាយតម្លៃសន្ទស្សន៍នៃគុណភាពខ្យល់ AQLI បានលើកឡើងថា រូបភាពនៃការបំពុលជាសកលមានភាពខុសគ្នាពីតំបន់មួយទៅតំបន់មួយ ។ លើសពីនេះ ការបំពុលខ្យល់ប៉ះពាល់សុខភាពតាមរយៈភាគល្អិតតូចៗនៃការបំពុលជ្រៀតចូលទៅក្នុងសួត ចរន្តឈាម និងរាងកាយរបស់មនុស្ស ហើយវាបង្កជាជំងឺដាច់សរសៃឈាមខួរក្បាល ជំងឺផ្លូវដង្ហើម ជំងឺមហារីកសួត និងជំងឺគាំងបេះដូង។

ក្នុងការប្រយុទ្ធប្រឆាំងនឹងការបំពុលខ្យល់ ដើមឈើមានសារៈសំខាន់ណាស់សម្រាប់ទ្រទ្រង់ជីវិតរបស់មនុស្ស ជួយបន្ថយសីតុណ្ហភាព រក្សាគុណភាពដី ទ្រទ្រង់ជីវិតសត្វ និងកម្ចាត់កាបូនឌីអុកស៊ីតរាប់លានតោនចេញពីបរិយាកាស។ កាលពីឆ្នាំ២០២០ កន្លងទៅនេះ Weforum បានចាប់ផ្តើមគំនិតផ្តួចផ្តើមជាសកលដើម្បីដាំ ស្តារ និងអភិរក្សដើមឈើ ១ ទ្រីលានដើមនៅជុំវិញពិភពលោក ក្នុងគោលបំណងស្តារឡើងវិញនូវជីវចម្រុះ និងជួយប្រយុទ្ធប្រឆាំងនឹងការប្រែប្រួលអាកាសធាតុ។ ទន្ទឹមនឹងនេះ កម្មវិធីច្នៃប្រឌិតចំនួន ៤ កំពុងអនុវត្តគម្រោងបង្កើនគុណភាពខ្យល់ជាសកល និង ទប់ទល់ពីបម្រែបម្រួលអាកាសធាតុ។

កម្មវិធីទីមួយគឺ Acacia Eco ដែលជាគម្រោងនាំយកដើមឈើត្រឡប់មកវិញនៅប្រទេសឥណ្ឌា។ Ajaya Mehta សហស្ថាបនិកក្រុមហ៊ុន Acacia Eco និយាយថា ពួកគេមានការប្តេជ្ញាចិត្តពិតប្រាកដចំពោះដើមឈើ ដោយពួកគេនឹងដាំដើមឈើឱ្យបានគ្រប់គ្រាន់នៅតាមទីប្រជុំជន សាលារៀន រោងចក្រ និងសហគមន៍ជាដើម។ រហូតមកដល់ពេលនេះ ពួកគេបានដាំដើមឈើជាង ៨២៥ ០០០ ដើមនៅតាមតំបន់ជាង ៩១ រួមទាំងបានស្តារផ្ទៃដីជាង ៣៦,៤ ហិកតា។ កម្មវិធីនេះយកគំរូតាមវិធីសាស្រ្ត Miyawaki របស់អ្នករុក្ខសាស្ត្រជនជាតិជប៉ុន Dr Akira Miyawaki ។ វិធីសាស្រ្តនេះគឺជាការ​ដាំ​ដើម​ឈើ​ឱ្យ​ជិតៗ​គ្នា ដើម្បី​ចៀសវាង​ការ​បាត់បង់​ដី​ពី​ទឹកភ្លៀង ហើយបច្ចេកទេសនេះអាចជួយក្នុងការបង្កើតព្រៃក្នុងទីក្រុងយ៉ាងឆាប់រហ័ស។ លើសពីនេះ ឥណ្ឌាសន្យាថានឹងបង្កើនព្រៃឈើរបស់ខ្លួនឱ្យដល់ ៣៣ ភាគរយនៅឆ្នាំ២០៣០ ដែលកើនឡើងពីប្រហែល ២៥ ភាគរយនៅបច្ចុប្បន្ននេះ។

កម្មវិធីទីពីរ​ គឺ SUGi ដែលជាវេទិកាសកលផ្សារភ្ជាប់ម្ចាស់ជំនួយជាមួយសហគមន៍នៃអ្នកដាំស្តារព្រៃឈើ និងអ្នកការពារសមុទ្រក្នុងគោលបំណងស្ដារប្រព័ន្ធអេកូឡូស៊ីជុំវិញពិភពលោក។ ក្រុមហ៊ុនបានផ្តល់មូលនិធិដល់ព្រៃឈើជាលើកដំបូងនៅទីក្រុង Beirut ប្រទេសលីបង់កាលពីឆ្នាំ ២០១៩ កន្លទៅនេះ។ ឥឡូវ កម្មវីធីនេះបានពង្រីកដល់ ១៦០ កន្លែងនៅទូទាំងពិភពលោករួមមាន កាមេរូន ចក្រភពអង់គ្លេស សហរដ្ឋអាមេរិក និងអូស្ត្រាលី។ កម្មវីធីនេះគឺជាការដាំដើមឈើជាព្រៃខ្នាតតូច Miyawaki ដែលលូតលាស់ក្នុងអាកាសធាតុចាប់ពីតំបន់ត្រូពិចសើម តំបន់មហាសមុទ្រពាក់កណ្តាលស្ងួត និង តំបន់មេឌីទែរ៉ាណេ។ នៅឆ្នាំ២០២២ ការដាំព្រៃឈើលើផ្ទៃដីសរុបមាន ៩៣ ៩០៥ ម៉ែត្រការ៉េ ដែលមានរុក្ខជាតិជាង ២ សែន។ ទន្ទឹមនឹងនេះ ម្ចាស់ជំនួយអាចផ្តល់ប្រាក់តិចបំផុត ៥ ដុល្លារក្នុងការជួយរួមចំណែកនៃការដាំដើមឈើ និង​ការពារព្រៃឈើនៅក្នុងកម្មវិធីនេះ។

កម្មវិធីទីបីគឺ Earthwatch Europe – ដាំបណ្តាញព្រៃឈើតូចៗនៅចក្រភពអង់គ្លេស ហើយការដាំដើមឈើខ្នាតតូចជាលើកដំបូងគេនៅ Witney រដ្ឋ Oxford ។ ចាប់តាំងពីពេលនោះមក កម្មវិធីនេះពង្រីកបានដល់ជាង ២០០ តំបន់នៅទូទាំងចក្រភពអង់គ្លេស។ កម្មវិធីនេះក៏យកគំរូយុទ្ធសាស្ត្រ Miyawaki ផងដែរ ដោយដាំព្រៃតូចៗ និងលូតលាស់លឿន។ Earthwatch លើកឡើងថា ខ្លួនកំណត់ទីតាំងសមស្របនៅក្នុងទីក្រុងដែលត្រូវការធម្មជាតិបំផុត ហើយបន្ទាប់មកចូលរួមជាមួយសហគមន៍មូលដ្ឋានដើម្បីដាំ ថែទាំ និងតាមដានព្រៃឈើរបស់ពួកគេតាមពេលវេលា។ កាលពីឆ្នាំ ២០២២ កន្លងទៅនេះ ព្រៃឈើខ្នាតតូចចំនួន ៨០ ត្រូវបានត្រួតពិនិត្យដោយអ្នកស្ម័គ្រចិត្ត ដោយមានការចូលរួមពីពលរដ្ឋជាអ្នកវិទ្យាសាស្ត្រជិត ៣ ៥០០ នាក់។ កម្មវិធីនេះបានជួយការផ្សារភ្ជាប់ទំនាក់ទំនងរវាងមនុស្សជាមួយធម្មជាតិ និងលើកកម្ពស់ការយល់ដឹងអំពីវិបត្តិអាកាសធាតុ។

កម្មវីធីទីបួនគឺ Urban Reef ដែលជាការព្រីន​បោះពុម្ពថ្មប៉ប្រះទឹកបែប 3D របស់ប្រទេសហូឡង់។ លើសពីនេះ ការព្រីនបោះពុម្ព 3D នេះមានដូចជា ផ្សិត mycelium ការបូមទឹកពីសំបកសត្វសមុទ្រ និងដីឥដ្ឋជាដើម ដើម្បីបង្កើនជីវចម្រុះនៅក្នុងទីក្រុង។ ពួកវាអាចស្រូបយកទឹក និងមានលក្ខណៈពិសេសជាច្រើនដោយផ្តល់នូវជម្រកដែលអាចឱ្យរុក្ខជាតិ សត្វល្អិត និងសត្វជាច្រើនប្រភេទរស់នៅ និងលូតលាស់នៅក្នុងទីក្រុង។ សហស្ថាបនិក Pierre Oskam និង Max Latour ជឿថា ដើម្បីរស់នៅដោយមានផាសុកភាពជាមួយនឹងបរិស្ថានជុំវិញខ្លួន ពួកគេត្រូវផ្តល់កន្លែងទំនេរបន្ថែមទៀតដល់ធម្មជាតិ៕