សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីតួនាទីនៃនវានុវត្តន៍ និងស្តង់ដា ក្នុងការពង្រឹងឧស្សាហកម្មស្រូវអង្កររបស់កម្ពុជានៅក្នុងពិធីបិទមហាសន្និបាតរបស់សហព័ន្ធស្រូវអង្ករកម្ពុជា អាណត្តិទី៤ កាលពីថ្ងៃទី២៦ ខែសីហា ឆ្នាំ២០២៥។ ក្រៅពីនេះ ឯកឧត្តមបានអបអរសាទរចំពោះថ្នាក់ដឹកនាំសហព័ន្ធស្រូវអង្ករកម្ពុជា អាណត្តិទី៥ និងការដាក់ឱ្យប្រើប្រាស់ “យុទ្ធសាស្ត្រពង្រីក និងពិពិធកម្មទីផ្សារនាំចេញអង្ករកម្ពុជា២០២៥-២០៣០”។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖
«សមត្ថភាពផលិតស្រូវអង្ករ ការកិន និងការកែច្នៃទៅជាផលិតផលមានតម្លៃបន្ថែម ដោយប្រើប្រាស់បច្ចេកវិទ្យា និងនវានុវត្តន៍ថ្មីៗ ព្រមជាមួយភាពប្រជែងឈ្នះផ្សេងទៀត និងកេរ្តិ៍ឈ្មោះលើឆាកអន្តរជាតិ គឺជានិមិត្តរូបនៃមោទនភាពសម្រាប់វិស័យដ៏មានសារៈសំខាន់នៃសេដ្ឋកិច្ចជាតិ»។
ឯកឧត្តមបានរំលេចការរួមចំណែករបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដល់ឧស្សាហកម្មស្រូវអង្ករ រួមទាំងការងារសុវត្ថិភាព និងបច្ចេកទេសផលិតកម្ម ការលើកកម្ពស់ផលិតភាពតាមរយៈគ្រឿងម៉ាស៊ីនទំនើបៗ និងការផ្តល់សេវាហេដ្ឋារចនាសម្ព័ន្ធគុណភាពជាតិ ដើម្បីគាំទ្រដល់រោងម៉ាស៊ីនកិនស្រូវ និងសហគ្រាសធុនតូច និងមធ្យម។
ឯកឧត្តម ហែម វណ្ណឌី បានជំរុញ និងលើកទឹកចិត្តក្រសួង-ស្ថាប័ន ដែលជាប្រធានគណៈកម្មការបច្ចេកទេសពាក់ព័ន្ធឧស្សាហកម្មស្រូវអង្ករនៃក្រុមប្រឹក្សាស្តង់ដារជាតិ និងផ្នែកឯកជន ឱ្យចូលរួមអភិវឌ្ឍស្តង់ដាថ្មីៗបន្ថែមទៀតសម្រាប់ផលិតផលអង្ករ និងស្រឡាយផលិតផលពីអង្ករ។
កំណែទម្រង់ថ្មីៗរបស់ក្រសួងឧស្សាហកម្ម វិទ្យាសាស្ត្រ បច្ចេវិទ្យា និងនវានុវត្តន៍ ដូចជាការប្រែក្លាយមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ ទៅជាគ្រឹះស្ថានសាធារណៈរដ្ឋបាលដែលមានសមត្ថភាពធ្វើតេស្តវិភាគជាអន្តរជាតិ និងការសម្ពោធមជ្ឈមណ្ឌលបច្ចេកវិទ្យាកែច្នៃអាហារ កម្ពុជា-កូរ៉េ នាពេលថ្មីៗនេះ មានគោលដៅបង្កើនភាពប្រកួតប្រជែង និងជំរុញការនាំចេញ រួមទាំងផលិតផលអង្កររបស់កម្ពុជា។
ឯកឧត្តមបានបន្ថែមថា៖ ក្រសួងក៏បានតម្រង់ទិសនិងកំណត់យក “បច្ចេកវិទ្យាម្ហូបអាហារ” ជាអាទិភាពមួយរបស់វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍។ ក្រសួងក៏កំពុងជំរុញភាពជាដៃគូ និងកិច្ចសហប្រតិបត្តិការជាមួយវិស័យឯកជន វិស័យឧត្តមសិក្សាស្រាវជ្រាវ និងវិស័យសាធារណៈនានា ដើម្បីឆ្លើយតបនឹងតម្រូវការក្នុងការពង្រឹងសក្តានុពលនៃវិស័យកសិឧស្សាហកម្ម ចំណីអាហារ ភេសជ្ជៈ និងលើកម្ពស់អធិបតេយ្យភាពស្បៀងអាហារ និងសន្តិសុខស្បៀងរបស់កម្ពុជា៕
Account
Security
Favourite Content