ពិភពលោកស្ថិតនៅក្នុងមាត់ជ្រោះមរណនៃការប្រឈមមុខដាក់គ្នានូវអាវុធប្រល័យលោកចាប់តាំងតែពីជម្លោះរវាងរុស្ស៊ី និងអ៊ុយក្រែនបានផ្ទុះឡើង។ រុស្ស៊ីបានគំរាមកំហែងក្នុងការប្រើប្រាស់អាវុធនុយក្លេអ៊ែរជាបន្តបន្ទាប់បើទោះបីជាបានកាន់កាប់ទឹកដីមួយចំនួនទៀតបន្ថែមពីលើតំបន់គ្រីមៀទៅហើយក្តី។

ជម្លោះដែលបានបង្ហាញពីអស្ថិរភាពនៅតំបន់អឺរ៉ុបនេះមិនគ្រប់គ្រាន់ បច្ចុប្បន្នជម្លោះរវាងអ៊ីស្រាអែល និងក្រុមហាម៉ាសប៉ាឡេស្ទីននៅមជ្ឈឹមបូព៌ាក៏បាន និងកំពុងតែធ្វើឲ្យពិភពលោកកាន់តែភ្ញាក់ផ្អើលខ្លាំងបន្ថែមទៀត។ ជម្លោះប្រដាប់អាវុធទាំងនេះត្រូវបានក្រុមអ្នកជំនាញវិភាគអន្តរជាតិអះអាងថា វាសបញ្ជាក់អំពីភាពកំសោយ និងការរលត់ទៅនៃសណ្តាប់ធ្នាប់ពិភពលោកចាស់ដែលបានប្រើប្រាស់ចាប់តាំងតែពីចុងសង្គ្រាមលោកទី២មកម្ល៉េះ។

ក្រៅតែពីបញ្ហាភូមិសាស្ត្រនយោបាយរបស់មហាអំណាចហើយនោះគេសង្កេតឃើញថា ពិភពលោកក៏កំពុងប្រឈមមុខនឹងបញ្ហាវិបត្តិធំៗជាច្រើនផ្សេងទៀតដូចជាការបាត់បង់ជីវចម្រុះ បញ្ហាបម្រែបម្រួលអាកាសធាតុ បញ្ញាសិប្បនិម្មិត AI ព្រមទាំងគ្រោះមហន្តរាយធម្មជាតិផ្សេងទៀតផង។

ក្នុងពេលដែលអ្នកសេដ្ឋកិច្ចវិទូជាច្រើនមើលឃើញថា ពិភពលោកនឹងឆ្ពោះទៅមុខដើម្បីទទួលយកសណ្តាប់ធ្នាប់ថ្មី New World Order នោះ ពួកគេក៏បានបង្ហើបប្រាប់គ្រប់គ្នាឲ្យត្រៀមខ្លួនដើម្បីសម្របខ្លួនជាមួយនឹងសណ្តាប់ធ្នាប់សេដ្ឋកិច្ចថ្មី NIEO (New International Economic Order) ផងដែរ។

New International Economic Order ឬ NIEO ត្រូវបានបង្កើតឡើងដំបូងតាំងតែពីទសវត្សរ៍ឆ្នាំ១៩៧០ ពោលគឺនៅក្រោយសង្គ្រាមលោកទី២ក្នុងគោលបំណងសំខាន់ដើម្បីលើកកម្ពស់ផលប្រយោជន៍របស់បណ្តាប្រទេសដោយការកែលម្អនូវលក្ខខណ្ឌពាណិជ្ជកម្ម ការបង្កើនជំនួយអភិវឌ្ឍន៍ ការកាត់បន្ថយពន្ធរបស់ប្រទេសអភិវឌ្ឍន៍ និងមធ្យោបាយផ្សេងទៀត ហើយជាពិសេសដោះស្រាយបញ្ហាសេដ្ឋកិច្ចនៃប្រទេសដែលស្ថិតនៅក្រោមនយោបាយអាណានិគម។ ទោះបីជាយ៉ាងណាក្តី កិច្ចខិតខំប្រឹងប្រែងនេះមិនទទួលបានជោគជ័យនោះទេ ហើយថែមទាំងត្រូវបានអង្គការសហប្រជាជាតិអនុម័តទៅហើយ ដោយសារកត្តាសំខាន់ៗមួយចំនួន។

ថ្មីៗនេះ នៅក្នុងកិច្ចប្រជុំមួយនាទីក្រុងហាវ៉ាណាប្រទេសគុយបា គំនិតផ្តួចផ្តើមអំពីការទទួលយកសណ្តាប់ធ្នាប់សេដ្ឋកិច្ចថ្មី NIEO ត្រូវបានគណៈប្រតិភូមកពីប្រទេសចំនួន២៥បានបង្ហាអំពីការប្តេជ្ញាចិត្តដើម្បីលើកយកកិច្ចការងារនេះមកពិនិត្យ និងពិភាក្សាគ្នាឡើងវិញដោយសង្ឃឹមយ៉ាងមុតម៉ាំថា នឹងក្លាយទៅជាគោលនយោបាយគ្រប់គ្រងសេដ្ឋកិច្ចសកលថ្មីមួយស្របទៅតាមពិភពលោកក្នុងសតវត្សរ៍ទី២១នេះ ជាពិសេសដើម្បីអាចគ្រប់គ្រងបញ្ហា និងវិបត្តិទាំងអស់ដែលកំពុងកើតមានឡើង។

ម្ចាស់ហត្ថលេខីទាំង២៥បានព្យាយាមទាញយកឳកាសដែលគុយបាក្នុងនាមជាប្រធានក្រុមទី៧៧ ឬ Group of 77 នៅអង្គការសហប្រជាជាតិដើម្បីធានាឲ្យបានថានឹងមានការពិភាក្សាគ្នាជាទូទៅនៅក្នុងសមាជិកទាំងអស់របស់អង្គការសហប្រជាជាតិដើម្បីបង្កើតឲ្យបាននូវ NIEO នេះឡើងវិញព្រមទាំងអាចដាក់បង្ហាញផែនការនេះនៅក្នុងមហាសន្និបាតអង្គការសហប្រជាជាតិនៅឆ្នាំក្រោយចំពេលខួបទី៥០ឆ្នាំនៃការបង្កើត NIEO តែម្តង៕