សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ជាផ្នែកមួយនៃការវិនិយោគដ៏ធំបំផុតលើវិស័យការពារជាតិរបស់ខ្លួន ប្រទេស ណ័រវេស កាលពីពេលថ្មីៗនេះបានប្រកាសថា នឹងត្រៀមបំពាក់បន្ថែមនូវនាវាចម្បាំងដ៏ទំនើបថ្មីៗមួយចំនួនទៀតដែលផលិតដោយអង់គ្លេសទៅក្នុងកងកម្លាំងទ័ពជើងទឹករបស់ខ្លួន។
ណ័រវេស បានសម្រេចចិត្តជ្រើសយកអង់គ្លេសជាដៃគូផលិតនាវាចម្បាំងថ្មីដែលអាចមានសមត្ថភាពក្នុងការរារាំង និងប្រឆាំងនាវាមុជទឹកបាន។ តាមផែនការបញ្ជាទិញ នាវាចម្បាំងម៉ូដេលប្រភេទ Type-26 ជាច្រើនគ្រឿងដែលត្រូវផលិតដោយក្រុមហ៊ុនអង់គ្លេស BAE Systems ជាមួយនឹងទំហំវិនិយោគប្រមាណជា ១៣,៥ពាន់លានដុល្លារ។
យ៉ាងណាក្តី ក្នុងចំណោមលក្ខខណ្ឌមួយចំនួននោះគេសង្កេតឃើញថា នាវាចម្បាំងយ៉ាងហោចណាស់ ៥គ្រឿង នឹងចាំបាច់ត្រូវតែផលិតឡើងនៅក្នុងរោងចក្ររបស់ក្រុមហ៊ុន BAE ដែលស្ថិតនៅក្នុងទីក្រុង Glasgow ប្រទេសស្កុតឡេន។
កិច្ចព្រមព្រៀងបញ្ជាទិញនេះត្រូវបានចាត់ទុកថាជាជ័យជំនះរបស់ឧស្សាហកម្មផលិតសព្វាវុធរបស់ចក្រភពអង់គ្លេស ពីព្រោះថាការចរចាគ្នាបានប្រព្រឹត្តទៅអស់រយៈពេល៩ខែមកហើយរវាងអ្នកបញ្ជាទិញ និងប្រទេសអ្នកផលិតផ្សេងទៀតបូករួមទាំងបារាំង អាល្លឺម៉ង់ និងអាម៉េរិកផងដែរ។
នាយករដ្ឋមន្ត្រី ណ័រវេស លោក Jonas Gahr Støre បានលើកឡើងថា៖
« វាគឺជាការសម្រេចចិត្តដ៏តានតឹងមួយសម្រាប់យើងជាមួយនឹងបេក្ខភាពទាំង៤ប្រទេសនេះ ហើយម្យ៉ាងពួកគេសុទ្ធតែជាសម្ព័ន្ធមិត្តរបស់យើងផងនោះ»។
តាមកិច្ចសន្យា នៅត្រឹមឆ្នាំ២០៣០ ក្រុមហ៊ុន BAE នឹងត្រូវចាប់ផ្តើមដឹកជញ្ជូននាវាដំបូងជូនទៅប្រទេស ណ័រវេស ខណៈដែលរដ្ឋាភិបាលទីក្រុង Oslo បានបង្ហាញការតាំងចិត្តដែរថា នឹងប្រើប្រាស់នាវាចម្បាំងទាំងនោះក្នុងរយៈពេលជាច្រើនទសវត្សរ៍ទៅមុខទៀត ហើយក៏នឹងមានផែនការបំពាក់ឧទ្ធម្ភាគចក្រសម្រាប់ប្រឆាំងនាវាចម្បាំងផងដែរ ប៉ុន្តែមិនទាន់បានធ្វើការបញ្ជាក់លំអិតអំពីម៉ូដេលណានៅឡើយនោះទេ។
យោងតាមការបញ្ជាក់ដោយគេហទំព័ររបស់ក្រុមហ៊ុន BAE បានអះអាងថា មុខងារសំខាន់ៗមួយចំនួនដែលអាចបំពាក់ទៅលើនាវា Type-26 នោះមានដូចជា កាំភ្លើងខ្នាតមធ្យម ម៉ូដេល medium caliber gun មីស៊ីលការពារដែនអាកាសប្រភេទ Sea Ceptor ដែលផលិតដោយ MBDA ក៏ដូចជាប្រព័ន្ធរ៉ាដាកម្រិតចម្ងាយមធ្យមដែលផលិតដោយ BAE ផ្ទាល់ផងដែរ។
គួរឲ្យដឹងដែរថា Type-26 បច្ចុប្បន្នស្ថិតនៅក្នុងដំណើរការផលិតត្រឹមតែ៨គ្រឿងនៅឡើយសម្រាប់ប្រើប្រាស់ដោយកងកម្លាំងទ័ពជើងទឹកអង់គ្លេសខ្លួនឯង ហើយ Type-26 ទាំង៨គ្រឿងផលិតឡើងគឺដើម្បីជំនួសម៉ូដេលចាស់ Type-23 ៕
Account
Security
Favourite Content