ប្រទេសអ៊ូហ្គង់ដា គឺជាអ្នកផលិត និងអ្នកប្រើប្រាស់ចេកច្រើនជាងគេបំផុតទី២របស់ពិភពលោក ខណៈដែលប្រទេសឥណ្ឌាគឺជាប្រទេសឈរនៅលេខរៀងទី១។

យោងតាមការស្រាវជ្រាវចុងក្រោយបានបង្ហាញថា បច្ចុប្បន្នទំហំផលិតកម្មសកលប្រហែល១០លានតោនជារៀងរាល់ឆ្នាំក្នុងពេលដែលការប្រើប្រាស់ចេកសម្រាប់មនុស្សម្នាក់ស្ទើរតែមួយគីឡូក្រាមក្នុងមួយថ្ងៃ ដោយក្នុងនោះពលរដ្ឋអ៊ូហ្គង់ដាដល់ទៅជាង៧៥ភាគរយគឺជាអ្នកដែលពឹងផ្អែកលើផ្លែកចេកជាអាហារប្រចាំថ្ងៃចាំបាច់របស់ពួកគេ។

ផ្លែ​ចេកដែលទុំនៅក្នុងប្រទេសអ៊ូហ្គង់ដា ជាទូទៅ​ត្រូវ​បាន​គេ​យក​ទៅ​ចម្អិន​ជា​ម្ហូប​មាន​រសជាតិ​ឈ្ងុយ​ឆ្ងាញ់ ហើយ​ប្រើប្រាស់ចម្អិនធ្វើជា​បង្អែមផង ​ជា​ស្រាផង ទឹកផ្លែឈើ ស្រាបៀរ និងអាហារសម្រន់​​ជា​ច្រើនមុខផ្សេង​ទៀត។

យ៉ាងណាក៏ដោយ បើទោះបីជាបច្ចុប្បន្នទំហំប្រើប្រាស់មានកំណើនច្រើន និងកំពុងបានបង្កទៅជាបញ្ហាកាកសំណល់ក្តី ប៉ុន្តែក្នុងកិច្ចខិតខំប្រឹងប្រែងដោយវិស័យរដ្ឋ និងឯកជន រួមគ្នាកាត់បន្ថយកាកសំណល់ទាំងនោះបន្តិចម្តងៗកំពុងបានក្លាយទៅជាឱកាសយ៉ាងធំធេងសម្រាប់សេដ្ឋកិច្ចប្រទេសអ៊ូហ្គង់ដាទាំងមូលមិនគួរនឹកស្មានដល់។

ការរួមបញ្ចូលគ្នានៃរបៀបកែច្នៃកាកសំណល់ដើម និងផ្លែចេកតាមបែប្រពៃណី និងបច្ចេកវិទ្យាទំនើបបានធ្វើឲ្យអ៊ូហ្គង់ដាកំពុងទាញបានអត្ថប្រយោជន៍កាន់តែច្រើនឡើងរហូតដល់ធ្វើឲ្យកិច្ចការងារនេះក្លាយទៅជាឧស្សាហកម្មដ៏សំខាន់មួយសម្រាប់ការអភិវឌ្ឍប្រទេសជាតិថែមទៀតផង។ ​ឧស្សាហកម្មកែច្នៃដើមចេក តាមរយៈបច្ចេកវិទ្យាទំនើបអាចឲ្យគេផលិតបានទៅជាធនធានសរសៃដ៏ចាំបាច់ក្នុងការផលិតបានទៅជាផលិតផលវាយនភណ្ឌ និងឧបករណ៍ធ្វើពីដៃជាច្រើនផ្សេងទៀត។

ក្រៅតែពីផ្តល់ការងារដល់ពលរដ្ឋក្នុងស្រុកជាច្រើនហើយ ក្នុងនោះសង្វាក់ផលិតកម្មកែច្នៃកាកសំណល់ពីដើមចេកត្រូវបានអ្នកជំនាញជាច្រើនធ្វើការវិភាគថា អ៊ូហ្គង់ដា នឹងអាចក្លាយទៅជាទីតាំងដ៏សំខាន់របស់អាហ្វ្រិកទាំងមូលក្នុងនាមជាអ្នកផលិតទ្រង់ទ្រាយធំនូវវត្ថុធាតុដើមដែលគិតគូរពីបរិស្ថានដែលកត្តានេះនឹងអាចរុញច្រានឲ្យអ៊ូហ្គង់ដាអាចទាញបានប្រាក់ចំណូលយ៉ាងច្រើននាពេលខាងមុខជាមិនខាន ស្របពេលដែលទីផ្សារប្រើប្រាស់ផលិតផលកកើតឡើងវិញកំពុងមានសន្ទុះខ្លាំងក្នុងបរិបទដែលពិភពលោកកំពុងប្រឈមមុខទៅនឹងបញ្ហាបម្រែបម្រួលអាកាសធាតុខ្លាំងក្លាបែបនេះ។

គួរឲ្យដឹងដែរថា ផ្លែកចេក គឺជាប្រភពដ៏ល្អដែលមានសារធាតុចិញ្ចឹមសំខាន់ៗ រួមទាំងវីតាមីន B6 ប៉ូតាស្យូម និងសរសៃអាហារ ហើយពួកវាត្រូវបានគេប្រើដើម្បីបង្កើតជាអាហារព្យាបាលដែលត្រៀមរួចជាស្រេចដើម្បីប្រយុទ្ធប្រឆាំងនឹងបញ្ហាកង្វះអាហារូបត្ថម្ភផងដែរ៕