សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មួយរយៈចុងក្រោយនេះ ភាពតានតឹងរវាងភាគីកម្ពុជា និងថៃ បានកើនឡើងគួរឱ្យកត់សម្គាល់។ ភាពតានតឹងនេះបានជំរុញឱ្យប្រជាជនកម្ពុជាជាច្រើននាក់ងាកមកគាំទ្រផលិតផលក្នុងស្រុកជំនួសឱ្យការប្រើប្រាស់ផលិតផលនាំចូលពីថៃ។ យ៉ាងណាក៏ដោយ ថ្វីត្បិតថា ផលិតផលក្នុងស្រុកត្រូវបានប្រជាជនដែលជាអ្នកទិញលើកឡើងពីគុណភាពទាបជាងផលិតផលនាំចូល ប៉ុន្តែ ពេលវេលានេះគឺជាឱកាសដ៏ល្អបំផុតសម្រាប់ម្ចាស់សិប្បកម្មក្នុងការពង្រឹងគុណភាព បង្កើនការផលិត ដើម្បីដាក់លក់នៅលើទីផ្សារ ខណៈដែលការគាំទ្របានកើនឡើងយ៉ាងផុសផុល។
សិប្បកម្ម តារាហ្វូត គឺជាសិប្បកម្មក្នុងស្រុកមួយដែលប្រមូលទិញគ្រាប់ធុញ្ញជាតិ ដើម្បីយកទៅកែច្នៃផលិតធ្វើជាប្រេងសម្រាប់ប្រើប្រាស់ប្រចាំថ្ងៃ ដែលល្អចំពោះសុខភាព។ សិប្បកម្មនេះ ជាសិប្បកម្មខ្នាតតូច ផ្តោតលើការផលិតប្រេង ដូចជា ប្រេងល្ង ប្រេងដូង ប្រេងសណ្ដែកដី និងប្រេងសណ្ដែកផ្កាយជាដើម។ ក្រៅពីចម្រាញ់ប្រេងពីគ្រាប់ធុញ្ញជាតិនេះ សិប្បកម្មខាងលើក៏មានការកែច្នៃកសិផលក្នុងស្រុកមួយចំនួនឱ្យទៅជាផលិតផលសម្រេចផ្សេងទៀតដូចជា ម្សៅល្មៀត តែខ្ចី តែម្រុំ តែស្លឹកគ្រៃ និងគ្រាប់ស្វាយចន្ទីជាដើម។
បើតាមការឱ្យដឹងពីលោក ម៉ៅ ចន្ទតារា ជាម្ចាស់សិប្បកម្មបានឱ្យដឹងថា រយៈពេលច្រើនឆ្នាំមកហើយ ដែលលោក និងក្រុមគ្រួសារតែងនាំផលិតផលរបស់ខ្លួនដាក់តាំងលក់នៅតាមព្រឹត្តិការណ៍នានាដូចជា ព្រឹត្តិការណ៍ពិព័រណ៍ផលិតផល វេទិកាផ្គូផ្គងអ្នកទិញ-អ្នកលក់ និងព្រឹត្តិការណ៍ផ្សេងៗទៀតនៅតាមផ្សារទំនើបក្នុងស្រុក។ មិនត្រឹមតែប៉ុណ្ណោះ ថ្មីៗនេះ ផលិតផលរបស់លោកក៏មានវត្តមាននៅតំបន់ផ្លូវថ្មើជើងចតុមុខ រាជធានីភ្នំពេញ (Walk Street) នៅរៀងរាល់ចុងសប្ដាហ៍ផងដែរ។ ក្នុងនាមជាម្ចាស់សិប្បកម្ម លោក តារា បានបង្ហាញនូវក្ដីរំភើប ដែលឃើញប្រជាជនកម្ពុជាចាប់ផ្ដើមងាកមកគាំទ្រផលិតផលក្នុងស្រុកយ៉ាងផុសផល។
ជាមួយនឹងបទពិសោធន៍ក្នុងការបើកសិប្បកម្មប្រមាណជាជិត ១០ ឆ្នាំមកនេះ លោក តារា បានគូសបញ្ជាក់ថា លោកតែងតែចង់ឃើញប្រជាពលរដ្ឋចូលរួមគាំទ្រផលិតផលក្នុងស្រុកឱ្យបានច្រើន ជាជាងការគាំទ្រផលិតផលក្រៅស្រុក ដែលនាំឱ្យខាតបង់ដល់សេដ្ឋកិច្ច។ យ៉ាងណាមិញ រហូតមកដល់ពេលនេះ ផលិតផលជាច្រើនមុខរបស់លោក ទទួលបានការគាំទ្រគួរឱ្យកត់សម្គាល់ រហូតបានជំរុញឱ្យលោកពង្រីកសង្វាក់ផលិតកម្មបន្ថែមទៀត។
លោក ម៉ៅ ចន្ទតារា បានគូសបញ្ជាក់ឱ្យដឹងផងដែរថា៖ លោកមិនមានការព្រួយបារម្ភរឿងថា នៅពេលដែលទំនាក់ទំនងកម្ពុជា-ថៃ ល្អឡើងវិញ ប្រជាជននឹងត្រឡប់ទៅប្រើប្រាស់ផលិតផលគេវិញនោះទេ ព្រោះលោកជឿជាក់លើគុណភាពផលិតផលរបស់លោក។ មិនត្រឹមតែប៉ុណ្ណោះ ការពង្រីកសង្វាក់ផលិតកម្ម នឹងជួយសម្រាលតម្លៃថ្លៃដើមនៅក្នុងការផលិត ហើយកាលណាតម្លៃដើមថមថយ ច្បាស់ណាស់ ផលិតផលដែលលក់ចេញក៏នឹងមានតម្លៃទាបជាងមុនផងដែរ៕
Account
Security
Favourite Content